ކޮމެޓީގައި މުއިއްޒު އިތުރުފުޅު ހެއްދެވި ކަމަށްބުނެ އެމައްސަލަ ބަލަނީ!
ބަޔާން ދެވުނީ ކޮން ބަޔަކަށް ކަމެއް މުއިއްޒަށް ނޭނގުނު
ކުރީގެ ހައުސިން މިނިސްޓަރު ޑރ. މުއިއްޒު މަޖިލީހުގެ މާލިއްޔަތު ކޮމެޓީގެ ބައްދަލުވުމުގައި--
ރާއްޖޭގެ ގިނަ ރަށްތަކެއްގައި ފްލެޓް އެޅުމަށް ޙަވާލުކުރި ނޫމަޑި ރިސޯޓްސް އެންޑް ރެސިޑެންސަސް (ނޫމަޑި) މައްސަލާގައި މާލިއްޔަތު ކޮމެޓީގައި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު އިތުރުފުޅު ހެއްދެވި ކަމަށް ބުނާ މައްސަލަ ބެލުމަށް ކޮމެޓީއަށް ހުށަހަޅައިފި އެވެ.
ނޫމަޑި މައްސަލައާ ގުޅިގެން ރަައްޔިތުންގެ މަޖިލީހުގެ މާލިއްޔަތު ކޮމެޓީއަށް ކުރީގެ މިނިސްޓަރު މުއިއްޒު ހާޒިރު ކުރުމުން އޭނާއާ ވަނީ ކޮމެޓީގެ މެމްބަރުންގެ ގިނަ ސުވާލުތަކެއް ޢަމާޒުކޮށްފަ އެވެ.
އެގޮތުން، މެމްބަރުންގެ ބައެއް ސުވާލުތަކާއި ގުޅިގެން، ބައެއް މަޢުލޫމާތު ހާމަ ނުކުރެއްވުމާއި، އިތުރުފުޅު ހައްދަވާކަމަށް ކޮމެޓީގެ ބައެއް މެމްބަރުންނަށް ފާހަގަކުރެވޭތީ، މުއިއްޒުއާ ގުޅޭ ތިން މައްސަލައެއް ބެލުމަށް ކޮމެޓީއަށް ވަނީ ހުށަހަޅާފަ އެވެ. މުއިއްޒުއާ ގުޅޭ ދެ މައްސަލަ މާލިއްޔަތު ކޮމެޓީއަށް ހުށަހެޅުއްވީ އެކޮމެޓީގެ މެމްބަރު ދާންދޫ ދާއިރާގެ މެމްބަރު ޔައުޤޫބު ޢަބްދުﷲ އެވެ. އަނެއް މައްސަލަ ހުށަހެޅުއްވީ އައްޑޫ ސިޓީ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އިލްޔާސް ލަބީބު ވިދާޅުވީ ދައުލަތަށް ގެއްލުންވާގޮތަށް ކުރީގެ މިނިސްޓަރު މުއިއްޒު ޢަމަލުކުރައްވާފައިވާތީ އެ މައްސަލައަކީ ވެސް ބެލެންޖެހޭނެ މައްސަލައެއް ކަމަށާއި އެމައްސަލަ ބެލުމަށް ކޮމެޓީއަށް ހުށަހަޅުއްވާ ކަމަށެވެ.
މުއިއްޒާ ގުޅޭ އެތިން މައްސަލަ ކޮމެޓީއަށް ހުށަހެޅިފައިވީނަމަވެސް، އެ ބައްދަލުވުމުގެ ކޯރަމް އެވަގުތު ނެތުމުން އެމައްސަލަތަކަށް ވަކި ގޮތެއް ނިންމާފައެއް ނުވެއެވެ. އެހެންކަމުން ކޮމެޓީގެ މުޤައްރިރު އަދި ކިނބިދޫ ދާއިރާގެ މެމްބަރު މުޙައްމަދު ނާޝިޒު ވިދާޅުވީ ދެން ބޭއްވޭ ކޮމެޓީގެ ބައްދަލުވުމުގައި އެހުށަހެޅުންތަކާމެދު ގޮތެއް ނިންމަވާނެ ކަމަށެވެ.
ރައީސް ޔާމީނުގެ ސަރުކާރުން ބާޠިލުކުރި ނޫމަޑީގެ އެއްބަސްވުންތައް ބާޠިލުކުރިއިރު، ހައުސިން މިނިސްޓަރަކަށް ހުންނެވީ މުއިއްޒު އެވެ. އެ އެއްބަސްވުންތައް ހަދާފައިވަނީ ކުރީގެ ރައީސް މުޙައްމަދު ނަޝީދުގެ ސަރުކާރުން ނެވެ.
މުއިއްޒު ވަނީ ނޫމަޑި އެއްބަސްވުން ބާޠިލުކުރީ އެއްބަސްވުމާއި ޚީލާފަށް ކަމަށް ވިދާޅުވެ، ބަޔާނެއް ދެއްވާފަ އެވެ. ނޫމަޑިން ވަނީ އެބަޔާން އާރބިޓްރޭޝަނަށް ހުށަހަޅާފަ އެވެ. އެބަޔާން ވެފައިވަނީ ނޫމަޑިއަށް އެ މައްސަލަ ކާމިޔާބު ކުރުމަށް ލިބުނު ވަރަށް ބޮޑު ކުރިއެރުމެއްގެ ގޮތުގަ އެވެ.
ރައީސް ޔާމީނުގެ ސަރުކާރުން ބާޠިލުކުރި ދެ އެއްބަސްވުމެއްގެ މައްސަލަ ނޫމަޑިން ވަނީ ނެދަލޭންޑްސްގެ ދަ ހޭގްގައި ހުންނަ ޕާރމަނަންޓް ކޯޓް އޮފް އާރބިޓްރޭޝަނަށް ހުށަހަޅާފައެވެ. އެމައްސަލަތަކުގެ ގެއްލުމުގެ ބަދަލުގެ ގޮތުގައި ދައުލަތުން ނޫމަޑިއަށް 55 މިލިއަން ޑޮލަރު (849،750،000ރ) ދައްކަން ޖެހުނެވެ. އެފައިސާ މިސަރުކާރުން ވަނީ ދައްކާފައެވެ.
އެއްބަސްވުން އުވާލި މައްސަލަތަކުގައި ނޫމަޑިން، އާރބިޓްރޭޝަނަށް ހުށަހެޅީ 155 މިލިއަން ޑޮލަރު (2.3 ބިލިއަން ރުފިޔާ) ހޯދުމަށެވެ. ކޯޓުގައި މި މައްސަލަ ހިނގަމުން ދަނިކޮށް އެ ކުންފުންޏާ ވާހަކަ ދައްކައި ބަދަލުގެ ގޮތުގައި 55 މިލިއަން ޑޮލަރު ދިނީ، ރައީސް އޮފީހުގައި އޮންނަ ސެޓްލްމެންޓް ކޮމިޓީން ނިންމައިގެންނެވެ.
