ދޮގު ޚަބަރު ފެތުރުމުގެ ސަބަބުން މުޖުތަމަޢަށް ލިބޭ ގެއްލުމުން ސަލާމަތްކުރުމަކީ ކޮންމެ ފަރުދެއްގެވެސް ޒިންމާއެއް: ހޯމް މިނިސްޓަރު
4 ނޮވެމްބަރު 2019 | ހޯމަ 09:36ކޮންމެ މީހަކު ދޮގު ޚަބަރު ހުއްޓުވަންޖެހޭ
ހޯމް މިނިސްޓަރު އިމްރާން އަބްދުﷲ
ދޮގު ޚަބަރެއް ފެތުރުމުގެ ސަބަބުން މުޖުތަމަޢަށް، ފަރުދަކަށް، ނުވަތަ ޤައުމަށް ލިބިދާނެ ގެއްލުމަކުން ސަލާމަތްކުރުމަކީ އެމުޖުތަމަޢެއްގައި ދިރިއުޅޭ ކޮންމެ ފަރުދެއްގެ ޒިންމާއެއްކަމަށް ހޯމް މިނިސްޓަރު އިމްރާން ޢަބްދުﷲ ވިދާޅުވެއްޖެއެވެ.
"ދޮގު ޚަބަރު ހުއްޓުވާނީ އަހަރެން" ކެމްޕެއިން އިފްތިތާޙުކުރުމަށް ބޭއްވި ރަސްމިއްޔާތުގައި މިނިސްޓަރު އިމްރާން ވިދާޅުވީ ކޮންމެ ފަރުދަކުވެސް ދޮގު ޚަބަރު ފެތުރުން ހުއްޓުވަންޖެހެނީ އޭގެ ސަބަބުން މުޖުތަމަޢަށް ލިބިދާނެ ގެއްލުމަކާ ނިކަމެތިކަމެއްގެ ސަބަބުން ސަލާމަތްކުރުމުގެ ޒިންމާ ކޮންމެ މީހެއްގެ ކޮނޑުގައި އެޅިފައިވާތީކަމަށެވެ. މަޢުލޫމާތުގެ ރަން ޒަމާނުގައި ދުނިޔޭގެ މިޞްރާބު ހިފާ އެއްޗަކީ ބޮޑެތި ހަނގުރާމަވެރި ލަޝްކަރުތަކެއްނޫންކަމަށާއި، އަދި އެއީ ބަރު ހަތިޔާރު ނޫންކަން މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.
މިނިސްޓަރު އިމްރާން ވިދާޅުވީ މިއަދު ދުނިޔޭގެ މިޞްރާބު ޢަމާޒުކުރުމުގެ މައިގަނޑު އަސާސަކީ މީޑިއާކަމަށެވެ. ވަކިވަކި ފަރުދުންގެ ޢަމަލުތަކާއި، ވިސްނުމާއި ފިކުރާއި، ބޮޑެތި ވިޔަފާރި ކުންފުނިތަކާއި، ބޮޑެތި މުޢައްސަސާތަކާއި، ޤައުމުގެ ސިޔާސަތުތައް ބައްޓަންވެގެންދަނީ ފެތުރިގެންދާ ޚަބަރުތަކާ މަޢުލޫމާތުތަކުގެ މައްޗަށްކަމަށް މިނިސްޓަރު ވިދާޅުވިއެވެ.
އެހެންކަމުން ފެތުރެމުންދާ ޚަބަރާއި މަޢުލޫމާތަކީ ޙަޤީޤަތާއި ޚިލާފަށް ފަތުރާ މެސެޖުތަކެއްނަމަ، އޭގެ ސަބަބުން މުޅި ދުނިޔެއަށް އަންނާނެ ބަދަލާމެދު އެންމެން ވިސްނަންޖެހޭކަން ފާހަގަކުރައްވާ މިފަދަ ޢަމަލު ހުއްޓުވަންޖެހޭ ކަމަށް މިނިސްޓަރު ވިދާޅުވިއެވެ.
މިނިސްޓަރު އިމްރާން ވިދާޅުވީ ދުނިޔެއަށް އައިސްފައިވާ އިންޤިލާބީ ބޮޑެތި ބަދަލުތަކުގެ ތެރެއިން މީޑިއާ ކުންފުނިތައް ނުވަތަ މެއިންސްޓްރީމް މީޑިއާތަކުގެ ބަދަލުގައި މިއަދު މުޖުތަމަޢުގައި ހިމެނޭ އާންމު ފަރުދުން މިޑީއާތަކަށްވުރެ ކުރީގައި ޚަބަރުފަތުރަމުންދާކަމަށެވެ. އަދުގެ ދުނިޔޭގައި، ކޮންމެ މީހަކީ ނޫސްވެރިއެއްކަމަށާއި، ކޮންމެ މީހެއްގެ މުށުތެރޭގައި މީޑިއާ ސްޓޭޝަނެއް އެބައޮތްކަން މިނިސްޓަރ ފާހަގަކުރެއްވިއެވެ. މިއީ ދުނިޔެއަށް އައިސްފައިވާ ބޮޑުވެގެންވާ ބަދަލެއްކަމަށާއި، މިއަދުގެ ހަޤީގަތަކީ މިއީކަމަށް މިނިސްޓަރު އިމްރާން ވިދާޅުވިއެވެ.
ހޯމަ ދުވަހު ފެށި ކެމްޕެއިން 4 މަސްދުވަހަށް ކުރިއަށް ގެންދަން މިނިސްޓްރީން ވަނީ ނިންމާފައެވެ. ކެމްޕެއިން ކުރިއަށްގެންދަނީ ބައިސްކޯފް މޯލްޑިވްސްއާ ގުޅިގެންނެވެ. ކެމްޕެއިިންގައި މީޑިއާ ދާއިރާގެ 7 ބޭފުޅުން އެމްބެސެޑަރުންގެ ގޮތުގައި މަސައްކަތްކުރައްވާނެއެވެ.
