އާއްމު ސިއްހަތުގެ މަހާސިންތާ ފަށައިފި
4 ނޮވެމްބަރު 2019 | ހޯމަ 07:59މިއީ ތިން ދުވަހަށް ކުރިއަށް ގެންދާ މަހާސިންތާއެއް
މަހާސިންތާގެ ތެރެއިން
ސިއްހަތު ހަރުދަނާ ކުރުމުގެ ގޮތުން "ނެޝަނަލް ކޮންފަރެންސް އޮން ރީވިޓަލައިޒިންގ ޕަބްލިކް ހެލްތު: ވާރކިންގ ޓުގެދަރ ފޯރ އަ ހެލްދިއަރ ނޭޝަން" ގެ ނަމުގައި މަހާސިންތާއެއް ފަށައިފިއެވެ.
ހޯމަ ދުވަހު ޕެރަޑައިސް އައިލެންޑް ރިސޯޓްގައި ފެށި މިމަހާސިންތާ އިފްތިތާހްކޮށްދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.
މިމަހާސިންތާއަކީ އާންމު ސިއްހަތު ކުރިއެރުވުމުގައި ކުރިމަތިވެފައިވާ މައިގަނޑު މައްސަލަތައް ކަމަށްވާ، ރާއްޖޭގެ އާބާދީ އެކި އުމުރުފުރާތަކަށް އަންނަ ބަދަލުތަކާއިއެކު އާބާދީގެ ސިއްހީ މައްސަލަތަކާއި، ރާއްޖޭގެ ރައްޔިތުން ދިރިއުޅޭ މާހައުލާއި، ރައްޔިތުންގެ ދިރިއުޅުމުގެ ވައްޓަފާޅިއާއި ކެއިންބުއިމުގެ އާދަތަކަށް އައި ބަދަލުތަކާއި، ރާއްޖޭގައި ގައިންގަޔަށް ނާރާ ބަލިތައް އިތުރުވުމާއި މީހުންގެ ދިރިއުޅުމުގެ މާހައުލާ ގުޅުންހުރި ކަންކަމުގެ ސަބަބުންނާއި ރާއްޖޭގައި ދިރިއުޅޭ ބޭރުމީހުންގެ އާބާދީ އިތުރުވަމުން ދިއުމުގެ ސަބަބުން ގައިންގަޔަށް އަރާ ބަލިތައް ކޮންޓްރޯލް ކުރުމުގައިދިމާވެފައިވާ ގޮންޖެހުންތައް ދެނެގަނެ އެކަންކަމާމެދު މަޝްވަރާކޮށް، އެކަންކަން ހައްލުކުރުމަށް ހުރިހާ ދާއިރާތަކެއް ހިމެނިގެން މަސައްކަތް ރާވާލެވޭނެ އިންތިޒާމްތަކާބެހޭ ގޮތުން ބޭއްވޭ މަހާސިންތާއެކެވެ.
ހެލްތް މިނިސްޓްރީން ބުނީ މިމަހާސިންތާގައި މައިގަނޑު ގޮތެއްގައި މަޝްވަރާ ކުރެވޭނީ އެހެން ދާއިރާތަކުގެ މަސައްކަތްތަކާއި ޕްލޭންތަކާއި ޕްރޮޖެކްޓްތަކުގައި ސިއްހަތުގެ ކަންތައްތަކަށް ބެލުމަށާއި އެފަރާތްތަކުބައިވެރިވުން އޮތުމާ ގުޅޭގޮތުން މަދަނީ ޖަމާއަތްތަކާއި އޮންނަ ގުޅުން ހަރުދަނާ ކުރުމާބެހޭގޮތުންނާއި އަދި އާންމު ސިއްހަތު ހިމެނޭގޮތަށް ސިއްހީ ޚިދުމަތްދިނުމުގެ ކަންކަން ބައްޓަން ކުރުމާއި އާންމު ސިއްހަތަށް ކުރެވޭ މަސައްކަތްތައް ހަރުދަނާ ކުރުމަށެވެ.
މީގެ އިތުރުން، އާއްމު ސިއްހަތަށް ކުރާ ހޭދަ އިތުރުކުރުމަށާއި އާއްމު ސިއްހަތު ރައްކާތެރިކުރުމަށް އިންސާނީ ވަސީލަތް ތަމްރީންކޮށް އެކަށީގެންވާގޮތެއްގައި ބޭނުންކުރުމާއި ބިނާކުރުމާ ބެހޭގޮތުން ވެސް މަޝްވަރާ ކުރެވޭނެއެވެ. މި މަހާސިންތާގައި މައިގަޑު 5 ދާއިރާގެ މައްޗަށް ކަރުދާސް ހުށަހަޅާ އެކަންކަމުގެ މައްޗަށް މަޝްވަރާ ކުރެވޭނެއެވެ. މި ހުށަހެޅުންތަކުގައި ރާއްޖޭގެ ފަންނީ މާހިރުންގެ އިތުރުން ބައިނަލް އަގްވާމީ މާހިރުން ބައިވެރިވެ ވަޑައިގަންނަވާނެ ކަމަށް ވެސް މިނިސްޓްރީން މައުލޫމާތުދެއެވެ.
ތިން ދުވަހަށް ކުރިއަށްދާ މި މަހާސިންތާގައި ސަރުކާރުގެ ކުރިއަށް އޮތް 5 އަހަރު ދުވަހުގެ ސްޓްރެޓިޖިކް އެކްޝަން ޕްލޭން 2019 - 2023 (ސެޕް) ގައިވާ ސިއްހީ ދާއިރާގެ މައިގަނޑު ލަނޑުދަނޑިތައް ޚާސިލް ކުރުމަށް މަގުޗާޓެއް އެކުލަވާލެވިގެން ދާނެއެވެ. އަދި މި މަހާސިންތާގެ ސަބަބުން ސިއްހީ ދާއިރާގެ ނަތީޖާތައް ޚާސިލް ކުރުމަށް ތަފާތު ދާއިރާތައް ގުޅިގެން އެކުގައި މަސައްކަތްކުރުމުގެ ފުރުސަތު ތަނަވަސްކުރުމަށްޓަކާ ޕަބްލިކް ހެލްތް ޗާރޓާއެއްގައިވެސް ސޮއިކުރެވޭނެއެވެ.
މި މަހާސިންތާގައި ސަރުކާރުގެ މިނިސްޓްރީތަކާއި ސިއްހީ ޚިދުމަތް ފޯރުކޮށްދޭ ފަރާތްތަކާއި ޔުނިވަރސިޓީ އާއި މަދަނީ ޖަމްއިއްޔާތަކާއި އަދި ސިއްހީ ޚިދުމަތް ފޯރުކޮށްދޭ އަމިއްލަ ފަރާތްތަށް ބައިވެރިވެވަޑައިގަންނަވާނެއެވެ.
