ދިވެހި ސިފައިންގެ ޕްރޮފެޝަންގެ މައިގަނޑު އެއް ޢަސާސަކީ އަމިއްލަ ނަފްސަށްވުރެ ޤައުމީ ޚިދުމަތް އިސްކުރުން: ޑިފެންސް މިނިސްޓަރ
ރައީސް ސޯލިހްގެ ސަރުކާރުން ސިފައިންގެ ފުރާނަ ދެކެނީ ނުހަނު އަގުބޮޑު އެއްޗެއްގެ ގޮތުގައި
ޑިފެންސް މިނިސްޓަރ މާރިޔާ އަހްމަދު ދީދީ ނަސްރުގެ ޖަލްސާގައި ވާހަކަ ދައްކަވަނީ
ދިވެހި ސިފައިންގެ ޕްރޮފެޝަންގެ މައިގަނޑު އެއް ޢަސާސަކީ އަމިއްލަ ނަފްސަށްވުރެ ޤައުމީ ޚިދުމަތް އިސްކުރުން ކަމަށް ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވެއްޖެއެވެ.
ނަޞްރުގެ ދުވަހުގެ ޖަލްސާގައި ވާހަކަ ދައްކަވަމުން މިނިސްޓަރ މާރިޔާ ވިދާޅުވީ ރައީސް ޞާލިޙްގެ ސަރުކާރުން ސިފައިންގެ ފުރާނަ ދެކެނީ ނުހަނު އަގުބޮޑު އެއްޗެއްގެ ގޮތުގައި ކަމަށެވެ. އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުގެ ޢަމާޒަކީ ސިފައިންގެ ޤާބިލުކަން އިތުުރުކުރުން ކަމަށާއި ބޭރުގެ އަސްކަރިއްޔާގެ ހިލޭ އެހީގެ ދަށުން އަސްކަރީ ހަތިޔާރާއި އެކި ތަފާތު ޓްރެއިނިންގްތައް ސިފައިންނަށް މިހާތަނަށް ހޯދައިދީފައިވާނެ ކަމަށެވެ. ސިފައިންނަށް ބޭނުންވާ ހަތިޔާރާއި އިކުއިޕްމަންޓްތައް ހޯދުމަށް ކެނޑިނޭޅި މަސައްކަތް ކުރަމުންދާ ކަމަށް ވެސް މިނިސްޓަރު ވިދާޅުވިއެވެ.
ޝަހީދުންގެ ނަންތައް ދިވެހި ތާރީޚުގައި ދެމި އޮންނާނެކަން ފާހަގަކުރައްވާ މާރިޔާ ވިދާޅުވީ އެ ޝަހީދުންގެ ޒިކުރާ އާ ކުރުމަކީ އެ ޢާއިލާތަކަށް ލިބޭނެ ކުޑަނަމަވެސް ތަޞައްލީއެއް ކަމަށެވެ. ނޮވެމްބަރު 3 ގައި ހިނގި ޢުދުވާނީ ޙަމަލާއަށް އިޝާރަތްކުރައްވާ މާރިޔާ ވިދާޅުވީ އެ ޙާދިޘާ ހިނގިއިރު ރާއްޖެއަށް އެމީހުން ހަނގުރާމަވެރި ހަތިޔާރާއެކު އެރިއިރު އެކަން ކުރިޔާލާ ދެނެގަނެވިފައި ނުވާކަމަށެވެ. އަދި އޭރުގެ ދައުލަތުގެ ހަމައެކަނި ދިފާޢު އޮތީ ބަންޑާރަކޮށްޓަށް ބަރޯސާވެފައި ކަން މިނިސްޓަރ ފާހަގަކުރެއްވިއެވެ.
އިންޑިއާގެ ލަޝްކަރުން ރާއްޖެއަށް އެހީތެރިވެދިނުމަށް ރާއްޖެއައުމަށް މަސައްކަތް ކުރަމުންދިޔައިރު މަތިންދާ ބޯޓު ޖައްސަން އޮތް މާލޭގެ އަދި ހުޅުލޭގެ ހާލަތު ނޭނގުމުގެ އިތުރުން ތަފްސީލީ ޗާޓެއް ނެތްކަމަށާއި ޓޫރިސްޓް މެޕެއް މެދުވެރިކޮށް އިންޑިއާގެ ސިފައިން މި އޮޕަރޭޝަން ޕްލޭން ކޮށްފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ސިފައިންގެ ލަޝްކަރަކީ ސިޔާސީ ނުފޫޒުން އެއްކިބާވެ ޤާނޫނުގެ ވެރިކަމަށް ބޯލަނބާ، ކިޔަމަންތެރިވާ، ރައްޔިތުންގެ ލޯތްބާ އިހްތިރާމާއި ފުރިހަމަ އިތުބާރު ލިބިފައިވާ ބައެއްގެ ގޮތުގައި ބައްޓަން ކުރުމަށް ސިފައިންގެ ލީޑަރޝިފުން ގިނަ މަސައްކަތް ކުރައްވާ ކަމަށެވެ.
ސިފައިންގެ ލަޝްކަރު ތިބާ ވަރަށް ވެސް ބަދަހިކޮށް ކަމަށް މިނިސްޓަރު ވިދާޅުވިއެވެ.
