ނަސްރުގެ ދުވަހަކީ އެކުވެރިކަމާއި އެއްބައިވަންތަކަމުގެ އަގުވަޒަންކުރަންވީ ދުވަސް: އަބްދުﷲ ޝާހިދު
3 ނޮވެމްބަރު 2019 | އާދީއްތަ 08:38އެ ދުވަހު ދިވެހި ގައުމަށްޓަކާ ޝަހީދުވެވަޑައިގެންނެވި ބަތަލުންގެ ޒިކުރާ އާކުރަނީ ފަހުރުވެރިކަމާއި އެކު: ޝާހިދު
ހާރިޖީ ވަޒީރު އަބްދުﷲ ޝާހިދު
ނޮވެމްބަރު ތިނެއްގެ އުދުވާނީ ހަމަލާއާ ގުޅިގެން ދިވެހިން ފާހަގަކުރަމުންްދާ ނަސްރުގެ ދުވަހަކީ، އެކުވެރިކަމާއި އެއްބައިވަންތަކަމުގެ އަގުވަޒަންކުރަންޖެހޭ ދުވަހެއް ކަމަށް ހާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
ނަސްރުގެ ދުވަހާއި ގުޅިގެން މިނިސްޓަރ ޝާހިދު ނެރުއްވި ބަޔާނުގައި ވަނީ، އެ ދުވަހު ދިވެހި ގައުމަށްޓަކާ ޝަހީދުވެވަޑައިގެންނެވި ފަރާތްތަކުގެ ހަނދާން މުޅި ދިވެހި ގައުމުން އާކުރަނީ ނުހަނު ލޯތްބާއި އެކުގައި ކަމަށެވެ. އަދި މިވަރުގެ ހިތްވަރުގަދަ ފަހުލަވާނުންތަކެއް ދިވެހިންގެ ގޮތުގައި ތިބުމަކީ، އެންމެހޭ ދިވެހިންވެސް ޝުކުރުކުރާނެ ކަމެއް ކަމަށް ޝާހިދު ވިދާޅުވިއެވެ. އަދި އެ ދުވަހުގެ ބަތަލުންގެ ޒިކުރާ ދިވެހިން އާކުރަނީ ނުހަނު ފަހުރުވެރިކަމާއި އެކުކަން ވެސް މިނިސްޓަރ ޝާހިދު ފާހަގަކުރެއްވިއެވެ.
މިނިސްޓަރ ޝާހިދު ވަނީ އެ ދުވަހުގެ އުދުވާނީ ހަމަލާއިން ރާއްޖެ ސަލާމަތްކޮށްދިނުމުގައި އެހީތެރިވީ އިންޑިއާ ސިފައިންނަށްވެސް ޝުކުރުއަދާކުރައްވާފައެވެ. އަދި ދުވަހަކުވެސް އެ ދުވަހު ކޮށްދިން ހިދުމަތުގެ ހަނދާން ނުނެތޭނެ ކަމަށްވެސް ވިދާޅުވިއެވެ.
ޝާހިދު ވަނީ އެދުވަހުގެ އެ ހަމަލާއާ ގުޅިގެން ދިވެހި ސަރުކާރުން އދ.ގައި ކުރި މަސައްކަތްތަކުގެ ވާހަކަވެސް ބަޔާނުގައި ފާހަގަކުރައްވާފައެވެ. އެގޮތުން ދިވެހިރާއްޖެ ފަދަ ކުދި ޖަޒީރާ ގައުމުތަކަށް ބޭރުގެ ފަރާތްތަކުގެ އުދުވާނަކުން ދިމާވެދާނެ ނުރައްކާތަށް ދުނިޔޭގެ ސަމާލުކަމަށް ގެނެވުނެވެ. އަދި އެ މަސައްކަތުގެ ސަބަބުން، ބައިނަލްއަގްވާމީ ސަލާމަތާ ބެހޭ ބަހުސްގައި ކުދި ގައުމުތަކާއި މެދު ދެކޭގޮތް ބަދަލުވެގެން ދިޔަ ކަމަށް މިނިސްޓަރ ޝާހިދު ވިދާޅުވިއެވެ.
ބޭރުގެ ފަރާތްތަކުން މިހާރު ދިމާވެދާނެ އުދުވާނަކަށް ތައްޔާރުގެ ރައްކާތެރިވުމުގެ ގޮތުން، ގައުމީ ދިފާއީ ބާރުތަކުގެ ފެންވަރު މަތިކުރުމާ މެދު މިއަދު ހޭލުންތެރިކަން އިތުރުކުރެވިއްޖެ ކަމަށްވެސް މިނިސްޓަރ ޝާހިދު ވިދާޅުވިއެވެ. އަދި ގައުމީ ސަލާމަތާ ރައްކާތެރިކަން ކަށަވަރުކުރުމަށް ބޭރުގެ ފަރާތްތަކާއި އެކު އޮންނަ ގުޅުންތައް ވަރުގަދަ ކުރުމުގެ މުހިންމުކަމާއި މެދު އޮތް ހޭލުންތެރިކަންވެސް އިތުރުކުރެވިއްޖެ ކަމަށް މިނިސްޓަރ ޝާހިދު ފާހަގަކުރެއްވިއެވެ.
އަދި މި ގައުމުގެ އިސްތިގްލާލާއި މިނިވަންކަން ރައްކާތެރިކުރުމަށް، ފަސްޖެހުމެއް ނެތި ގަދަ އަޒުމާއި އެކު، މި ގައުމުގެ ބައިވެރިންނާއި އެކުވެރިންނާއި އެކު މަސައްކަތް ކުރުމުގައި ސަރުކާރުން ދެމިިތިބޭނެ ކަމުގެ ޔަގީންކަން މިނިސްޓަރ ޝާހިދު ހުރިހާ ދިވެހި ރައްޔިތުންނަށް އެރުވިއެވެ.
