ރިޔާސީ އިންތިޚާބާ ގުޅޭ ގޮތުން ކުރީގެ ނައިބު ރައީސް ޑރ. ޖަމީލާއި އަލީ ވަހީދު އަދި އަމީން ވަނީ ގާސިމާ ބައްދަލުކުރައްވާފައި
ގާސިމް އިބްރާހިމް ޖަރުމަނުވިލާތުގައި ޑރ. ޖަމީލާއި އަލީ ވަހީދު އަދި އަމީންއާ ބައްދަލުކުރެއްވުމަށް ފަހު ފޮޓޯއަކަށް ހުއްޓިގެން
ރައްޔިތުން އެދޭ ފަދަ ގައުމީ އެއްބައިވަންތަކަމުގެ ސަރުކާރެއް އެކުލަވާލަން ހުރިހާ ފަރާތްތަކެއްގެ އެހީތެރިކަން ލިބުމަކީ ރައްޔިތުންގެ އުއްމީދު ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް މިއަދު ވިދާޅުވެއްޖެ އެވެ.
ޖަރުމަނުވިލާތުގައި ހުންނެވި ގާސިމް ބުދަ ދުވަހު މިގޮތަށް ޓުވީޓް ކުރެއްވީ ރިޔާސީ އިންތިޚާބާގުޅޭ ގޮތުން ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދާއި އެމްޑީޕީގެ ކުރީގެ ޗެއާޕާސަން އަލީ ވަހީދު އަދި ޖުމްހޫރީ ޕާޓީގެ ނައިބު ލީޑަރު އަމީން އިބްރާހިމްއާއެކު ބޭއްވި ބައްދަލުކުރެއްވުމަށް ފަހު އެވެ. އަމިއްލަ އަށް އަރުވާލެއްވިގެން އިނގިރޭސިވިލާތުގައި ދިރިއުޅުއްވާ ޖަމީލާއި އަލީ ވަހީދު އަދި އަމީން ގާސިމްއާ ބައްދަލުކުރައްވަން ޖަރުމަނަށް ވަޑައިގަތީ މިދިޔަ ހޯމަ ދުވަހެވެ.
މި ތިން ބޭފުޅުންނާއެކު ބޭއްވި ބައްދަލުވުމަށް ފަހު ގާސިމް ކުރެއްވި ޓުވީޓްގައި ވިދާޅުވެފައި ވަނީ "ރާއްޖޭގެ ޑިމޮކްރަސީގެ މަގަށް ގެނުވައި ރައްޔިތުން އެދޭ ފަދަ ގައުމީ އެއްބައިވަންތަކަމުގެ ސަރުކާރެއް އެކުލަވާލުމަށް ހުރިހާ ފަރާތްތަކެއްގެ އެހީތެރިކަން ލިބުމަކީ ރައްޔިތުންގެ އުއްމީދު" ކަމަށެވެ.
ގާސިމް އަކީ އިހްލާސްތެރިކަމާއެކު ޑިމޮކްރެޓިކް އިސްލާހު ގެނައުމަށް ކެރިވަޑައިގެން ހުންނެވި ލީޑަރެއް ކަމަށާއި އެ މަނިކުފާނާއެކު ބޭއްވި ބައްދަލުވުން ވަރަށް ކާމިޔާބު ކަމަށް ޑރ. ޖަމީލް ކުރެއްވި ޓްވީޓްގައި ވިދާޅުވެފައިވެ އެވެ.
އަލީ ވަހީދު ކުރެއްވި ޓުވީޓެއްގައި ވިދާޅުވި ގޮތުގައި ދުލާއި ހިތަށް ވުރެ، ސިކުނޑި އިސްކޮށްގެން ނޫނީ މި ހާލަތުން ރާއްޖެ އަރައިގަންނަން ދަތިވާނެ ކަމަށާއި ރާއްޖޭގެ ހުރިހާ ރައްޔިތުންނާއި ތަފާތު ފިކުރުގެ ޕާޓީތައް ހިމެނޭ، ގައުމީ އެއްބައިވަންތަކަމުގެ ސަރުކާރެއް އެކުލަވާލަން ގާސިމް ތައްޔާރު ކަމަށެވެ. އަންނަ މަހު އެ މަސައްކަތް ފެށޭނެ ކަމަށް ވެސް އަލީ ވަހީދު ވިދާޅުވި އެވެ.
