ޢީދު ދުވަސް ފަދަ މުނާސަބަތުތަކަކީ، އިސްލާމީ ޢަޤީދާ އާއި ޤައުމުގައި ވަޙުދަތުގެ ބިންގާ ހަރުދަނާކޮށް އިތުރު ޢަޒުމުތައް އާކުރުމަށް ވަރަށް ވެސް އެކަށީގެންވާ މުނާސަބަތެއްކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނެ މިހެން ވިދާޅުވީ ބަރަކާތްތެރި ފިޠުރު ޢީދުގެ މުނާސަބަތުގައި ދިވެހި އެންމެހާ ރައްޔިތުންނަށް ފޮނުއްވި ތަހުނިޔާގެ ޚިޠާބުގައެވެ.
ރައީސް ޔާމިން ފޮނުއްވި ތަހުނިޔާގެ ޚިޠާބުގައި ފިޠުރު ޢީދުގެ އުފާވެރި މުނާސަބަތުގައި ދިވެހިރާއްޖޭގެ ލޮބުވެތި އެންމެހާ ރައްޔިތުންނަށް ވަރަށް އިޚުލާޞްތެރިކަމާ އެކު ތަހުނިޔާ ދަންނަވައި ހެޔޮއެދުންތައް އަރިސްކުރައްވާފައި ވެއެވެ. އަދި މިއުފާވެރި މުނާސަބަތުގެ އިޚުލާޞްތެރި ތަހުނިޔާ އާއި ހެޔޮއެދުންތައް، އިސްލާމީ ޤައުމުތަކުގެ ވެރިންނަށާއި ރައްޔިތުންނަށް ވެސް އަރިސްކުރައްވާފައި ވެއެވެ.
މި ތަހުނިޔާގައި ބައިނަލްއަޤްވާމީ އިސްލާމީ ޖަމާޢަތްތަކާއި ޖަމުޢިއްޔާތަކުގެ ވެރިންނާއި އެތަންތާނގެ އެންމެހާ ބައިވެރިން ޝާމިލުކުރައްވާކަމުގައި ރައީސްގެ ޚިޠާބުގައި ވިދާޅުވެފައި ވެއެވެ.
ޢީދު ދުވަހަކީ ވަކިން ޚާއްޞަކޮށް އަޅުގަނޑުމެންގެ ތެރެއިން އެހީއަށް ބޭނުންވާ މީހުންގެ މަތީން ހަނދާންކޮށް އެމީހަކަށް ވެވުނުވަރަކުން އެފަދަ ފަރާތްތަކަށް އެހީތެރިވާންވީ ދުވަސްކަމަށާއި، ޢާއިލީގުޅުން ބަދަހިކޮށް، އެކަކުއަނެކަކަށް ޒިޔާރަތްކޮށް، ބައްދަލުކޮށް އިސްލާމީ އަޚުވަންތަކަން އާލާކޮށް، އެކަކު އަނެކަކަށް ހެޔޮއެދުމުގެ ޝުޢޫރުތައް ފައުޅުކޮށް އުޅޭންވީ ދުވަސްކަމުގައި ވެސް އެމަނިކުފާނުގެ ޚިޔާބުގައި ވިދާޅުވެފައި ވެއެވެ.
އީދުގެ ތަހުނިޔާ އެންމެހާ ރައްޔިތުންނަށް ފޮނުއްވާފައިވާ އީދު ނަމާދަށް ފަހު ރައީސްގެ ދެކަނބަލުން އީދު ސަލާމް ކުރެއްވުން ވެސް މިއަދު އޮތެވެ. އީދު ސަލާމްކުރުމަށް ގިނަ ބަޔަކު ގޮސްފައި ވެއެވެ.
