ފެންނަމުންދަނީ މިއަދުގެ ސަރުކާރަށް އެއްވެސް ކަމެއް އަމިއްލަ އިޚުތިޔާރުގައި ނުކުރެވޭތަން ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ނަސްރުގެ ދުވަސް ފާހަގަކުރުމުގެ ގޮތުން ޕްރޮގްރެސިވް ކޯލިޝަންގެ ފަރާތުން ބޭއްވި އެއްވުމަށްފަހު ނޫސްވެރިންނާ ބައްދަލުކޮށް ވާހަކަދައްކަވަމުން އަބްދުއްރަހީމް ވިދާޅުވީ އެންޑީއެން އިން ނެރުނު ރިޕޯޓްގެ މައްސަލާގައި ސަރުކާރަށް މިހާތަނަށް އާއިރުވެސް ފިޔަވަޅެއް އެޅިފައި ނުވަނީ ސަރުކާރަށް އެކަން ކުރުމުގެ އިޚުތިޔާރު ނެތުމުން ކަމަށެވެ. އަދި ރިޔާސީ އިންތިޚާބު ކާމިޔާބުކޮށްފައި މިއަދުގެ ސަރުކާރުން ވަނީ ކޮންބަޔަކާއެކު އެއްބަސްވުން ހަދައިގެން ކަން އެނގެން އެބައޮތް ކަމަށާއި ބޭރުގެ ބައެއް ޖަމާޢަތްތަކުން ނެރޭ ރިޕޯޓްތަކުން އެކަން އެނގޭކަމަށް އަބްދުއްރަހީމް ވިދާޅުވި އެވެ.
ނަސްރުގެ ދުވަސް ފާހަގަކުރުމަށް އިދިކޮޅުން އިންތިޒާމު ކުރި ހަރަކާތާއި ގުޅޭގޮތުން ވާހަކަ ދައްކަވަމުން އަބްދުއްރަހީމް ވިދާޅުވީ އިދިކޮޅު ކޯލިޝަނުން އެންމެ ފުރަތަމަ ނިންމީ ނަސްރުގެ ދުވަސް ފާހަގަކުރުމަށް ކާނިވަލުގައި ޖަލްސާއެއް ބޭއްވުމަށް ކަމުގައެވެ. ނަމަވެސް އެކަމަށް ސަރުކާރުން ހުއްދަ ނުދިނުމުން ޕީޕީއެމް އޮފީސް ދޮރުމައްޗަށް އެއްވުމަށް ގޮވާލީ ކަމަށް އަބްދުއްރަހީމް ވިދާޅުވިއެވެ.
ތަން ބަދަލުވެގެން ކުއްލި ގޮތަކަށް ގޮވާލީމާ މިތަނަށް އައޭ 2000 ދިވެހި ރައްޔިތުން. އަދިވެސް މިތާ މަގުމަތީގައި އެބައުޅޭ 500 ށް ހާ ދިވެހި ރައްޔިތުންޕީއެންސީގެ ރައީސް އަބްދުއްރަހީމް އަބްދުﷲ
އަބްދުއްރަހީމް ވަނީ މިއެއްވުން ރޫޅާލުމުން އެކަމަށް ފާޑުވިދާޅުވެ އެމްޑީޕީ އަކީ މުޒާހަރާތައް ދެކެ ބިރު ގަންނަ ޕާޓީއެއް ކަމަށް ވިދާޅުވެފައެވެ.
ނަސްރުގެ ދުވަސް ފާހަގަކުރުމަށް ޕްރޮގްރެސިވް ކޯލިޝަނުން ބޭއްވި އެއްވުމުގައި 12 މީހަކު ހައްޔަރުކުރުމަށްފަހު ފުލުހުން ފަހުން ވަނީ އެއެންމެން ދޫކޮށްލާފަ އެވެ. މިއެއްވުމާ ދިމާކޮށް ފުލުހުން ވަނީ ސުލްހަވެރިކަމާއެކު އެއްވެ އުޅުމުގެ ޤާނޫނާއި ޚިލާފަށް އެއްވެ އުޅުމުގެ ފުރުސަތު ނުދޭނެކަމަށް ބުނެ ޓްވީޓެއްކޮށްފަ އެވެ.
