ކޮމިޓީއަށް ލިބުނު މައުލޫމާތު ސާފުކުުރުމަށް ނިންމާ ތިން ހުށަހެޅުމެއް ޖުޑިޝަރީ ކޮމިޓީއަށް

އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ބައިވެރިވެވަޑައިގެން ގާނޫނީ ދައުރަށް ހުރަސްތަކެއް ކުރިމަތިކުރުވަން މަސައްކަތް ކުރައްވާ ކަމަށް ބުނެ ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް ލިބުނު މައުލޫމާތު ކަށަވަރުކޮށް ތިން ހުށަހެޅުމެއް ކޮމިޓީއަށް ހުށަހަޅައިފިއެވެ.

ހުކުރު ދުވަހުގެ ރޭ ކުއްލިގޮތަކަށް ޖުޑިޝަރީ ކޮމިޓީން ބައްދަލުވުމެއް ބާއްވާފައިވަނީ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ބައިވެރިވެވަޑައިގެން ގާނޫނުތަކަށް އަމަލު ނުކުރެއްވުމަށާއި، ޖޭއެސްސީ އަދި ޑީޖޭއޭގެ ގާނޫނީ ދައުރަށް ހުރަސްތައް ކުރިމަތިކުރެއްވުމަށް މަސައްކަތް ކުރައްވަމުން ގެންދަވާކަމުގެ މައުލޫމާތު ލިބިފައިވާތީއެވެ.

ކޮމިޓީގައި ހިންނަވަރު ދާއިރާގެ މެންބަރު ޖީހާން މަހުމޫދު ވަނީ އެކަންކަމުގެ ސައްހަކަން ބަލާ މައުލޫމާތު ސާފްކުރުމަށް ތިންކަމެއް ހުށަހަޅުއްވާފައެވެ. އެގޮތުން ކޮމިޓީއަށް ލިބިފައިވާ މައުލޫމާތު ސާފްކުރުމަށްޓަކައި އެކަން ހިނގާތޯ ދެނެގަތުމަށްޓަކައި ޑީޖޭއޭ އަށާއި ޖޭއެސްސީއަށް އެފަދަ ޝަކުވާތަކެއް ލިބިފައިވޭތޯ ސާފްކުރުމަށް ސިޓީ ފޮނުއްވުމާއި، އެފަދަ ޝަކުވާތަކެއް ލިބިފައިވާނަމަ އެ ޝަކުވާތަކަށް އަވަހަށް އަމަލުކުރުމަށް ޖޭއެސްސީގައި އެދިވަޑައިގަތުމަށް ޖީހާން ހުށަހެޅުއްވިއެވެ.

އަދި ފަހު ކަމަކަށް ޖީހާން ހުށަހެޅުއްވީ ޖޭއެސްސީއާއި ޑީޖޭއަށް ފޮނުވާ ސިޓީގެ ޖަވާބު ލިބުމާއެކު ވީ އެންމެ އަވަސް ފުރުސަތެއްގައި ޖޭއެސްސީއާއި ޑީޖޭއާ ބައްދަލުކޮށް މިކަން ސާފްކުރުމަށެވެ.

ޖީހާންގެ ހުށަހެޅުމަށް ތާއިދު ކުރެއްވީ ފޮނަދޫ ދާއިރާގެ މެންބަރު މޫސާ ސިރާޖު އެވެ. އަދި ޖީހާންގެ ހުށެހެޅުމާއި ގުޅޭގޮތުން މެންބަރުންގެ އިއުތިރާޒެއް އޮތްތޯ ބެލުމަށް މުގައްރިރު އިމްތިޔާޒު އެއްސެވުމުން އެއްވެސް މެންބަރަކު އެކަމަށް އިއުތިރާޒެއް ނުކުރެއްވިއެވެ.

ނަމަވެސް އެ ކޮމިޓީގައި ހިމެނިވަޑައިގަންނަވާ ގުރައިދޫ ދާއިރާގެ މެންބަރު އިބްރާހިމް ރިޒާގެ ބަދަލުގައި ކޮމިޓީއަށް ވަޑައިގެންނެވި ނައިފަރު ދާއިރާގެ މެންބަރު ވަނީ ކޮމިޓީ ބައްދަލުވުން ބާއްވަނީ ގަވާއިދާ ހިލާފަށް ކަމަށް ބުނެ އަޑު އުފުލާފައެވެ.