ދިވެހިރާއްޖޭގެ ފަޚުރުވެރި 31 ވަނަ ނަޞްރުގެ ދުވަހުގެ މުނާސަބަތުގައި، އެމްއެންޑީއެފް ޑްރިލް ޑިސްޕްލޭ އާއި ބޭންޑުގެ ހަރަކާތްތައް، ހުޅުމާލޭގައި ބާއްވައިފިއެވެ.

ނަޞްރުގެ ދުވަހުގެ މުނާސަބަތުގައި، ޑްރިލް ޑިސްޕްލޭ އާއި ބޭންޑުގެ ހަރަކާތްތައް ހުކުރު ދުވަހުގެ ހަވީރު ހުޅުމާލެ ސެންޓްރަލް ޕާކްގައި ކުރިޔަށް ގެންގޮސްފައިވާ އިރު އާންމުންގެ ގިނަ ފަރާތްތަކުން ވަނީ މި ހަރަކާތްތައް ބަލާލުމަށް އެ ސަރަހައްދަށް ގޮސްފައެވެ. މީގެ އިތުރުން މި ހަރަކާތްތައް ބައްލަވައިލެއްވުމަށް ޑިފެންސް މިނިސްޓްރ މާރިޔާ ދީދީއާއި ޗީފް އޮފް ޑިފެންސް ފޯސް މޭޖަރ ޖެނަރަލް އަބްދުﷲ ޝަމާލްއާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފްވެސް ވަނީ ބައިވެރިވެވަޑައިގެންފިއެވެ.

މި ހަރަކާތްތައް ކުރިއަށްދިޔައިރު، އާންމުންނަށް ޑްރިލް ސްކޮޑާއި ބޭންޑް އެންޑް މިއުޒިކް ވިންގްގެ ސިފައިންނާއެކު ފޮޓޯ ނެގުމުގެ ފުރުޞަތު ވަނީ ހުޅުވާލައިފައެވެ.

މިއުޒިކަލް ޑްރިލް ޑިސްޕްލޭ އަކީ އަސްކަރީ ސިފަވަންތަކަމާއި ސަފުތަކުގެ ބަދަހިކަމާއި އެއްބައެއްގެ ގޮތުގައި މަސައްކަތްކުރުމުގެ މަތިވެރި ރޫޙު ވަރަށް ފުރިހަމައަށް ދައްކުވައިދޭ ހެވިކަމެކެވެ. އަދި މެހެތަރުގެ އެއްވެސް ކޮމާންޑެއް ނެތި ވަކި ސީކުއެންސަކަށް ސިފައިން އެއްބައެއްގެ ގޮތުގައި ހެވިކަމުގެ އެކިއެކި ހަރަކާތްތައް ދައްކުވައިދޭ މަންޒަރުތައް ހިމެނޭ ކަމެކެވެ.

ނަސްރުގެ ދުވަހުގެ މުނާސަބާގައި ގިނަ އަދަދެއްގެ ހަރަކާތްތަކެއް އެމްއެންޑީއެފުން ބާއްވަން ނިންމައިފައިވާއިރު، ނޮވެމްބަރު 2 ވަނަ ދުވަހު، ޖުމްހޫރީ މައިދާނުގައި އެމްއެންޑީއެފް މިއުޒިކަލް ޑްރިލް ޑިސްޕްލޭ އާއި ބޭންޑުގެ ހަރަކާތްތައް ދައްކާލުން އަދި އެއްފަހަރު އޮންނާނެކަމަށް އެމްއެންޑީއެފުން ބުނެއެވެ.