ލާމަރުކަޒީ ގާނޫނާއި އެކު ހަކަތައިގެ ސިނާއަތަށް އިންގިލާބީ ބަދަލެއް އަންނާނެ: ނަޝީދު
1 ނޮވެމްބަރު 2019 | ހުކުރު 08:33ގާނޫނީ އޮނިގަނޑެއް ލިބެން ޖެހޭ
މަޖީލިހުގެ ރައީސް މުހައްމަދު ނަޝީދު
ލާމަރުކަޒީ ގާނޫނާއި އެކު ރާއްޖޭގެ ހަކަތައިގެ ސިނާއަތަށް އިންގިލާބީ ބަދަލެއް އަންނާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މި ސަރުކާރުގެ ސިޔާސަތުގެ ތެރޭގައި ހިމެނޭ އިދާރީ ދާއިރާތައް ލާމަރުކަޒީކޮށް ހިންގުމުގެ ގާނޫނަަށް އިސްލާހު ގެނައުމުގެ ބިލު ރައްޔިތުންގެ މަޖިލީހުން ބަލައިގެންފައިވަނީ ނިމިގެންދިޔަ ހަފްތާގެ ހޯމަ ދުވަހުއެވެ.
ގއ. ވިލިނގިލީ ގައި އަލަށް އިމާރަތް ކުރި އިންޖީނު ގޭގެ ބިންގާ އަޅުއްވައި ވާހަކަ ދައްކަވަމުން ރައީސް ނަޝީދު ވިދާޅުވީ، ކަރަންޓުގެ ހިދުމަތް ރައްޔިތުންނަށް އެންމެ ރަނގަޅަށް ފޯރު ކޮށްދިނުމަކީ އެމްޑީޕީގެ އަމާޒެއް ކަމަށެވެ. އަދި ހަމައެއާއި އެކު ކަރަންޓުގެ ހިދުމަތް ފޯރުކޮށްދޭއިރު، އެއީ ވިޔަފާރީގެ ގޮތުން ރައްޔިތުންނަށް ރަނގަޅު ހިދުމަތެއް ގޮތުގައި ހެޔޮ އަގުގައި ލިބޭ ގޮތް ހަމަޖެހެން ޖެހޭ ކަމަށް ވިދާޅުވިއެވެ.
އެމަނިކުފާނުގެ ވެރިކަމުގައި އުފެއްދި ފެނަކަ ކުންފުނީގެ ތާރިހަށް އަލިއަޅުއްވާލަމުން ނަޝީދު ވިދާޅުވީ، އެމްޑީޕީ އަށް އޭރު އެންމެ ރަނގަޅު ގޮތެއްގައި ފެނުނީ އެއް ކުންފުންޏަކުން ކުރުމަށްވުރެ ހަތް ކުންފުންޏަކަށް ބަހާލައިގެން ކަރަންޓު ފޯރުކޮށްދިނުމަކީ އެންމެ ބުއްދިވެރި ގޮތް ކަމަށެވެ.
ކަރަންޓު އުފެއްދުމަކީ ހަމައެކަނި ސަރުކާރު ހިއްސާވަ ކުންފުނިން ފޯރުކޮށްދޭ ހިދުމަތެއްގެ ގޮތުގައި ނުބޭއްވުން ކަމަގައި އެމަނިކުފާނު ފާހަގަކުރެއްވިއެވެ.
އަވިން ހަކަތަ އުފައްދާ ''ސޯލާ ޕެނަލް''ތައް ގަތުމަށް ބޭންކުތަކުން ލޯނު ދޭން ތައްޔާރަށް ތިބިކަން ފާހަގަކުރައްވަމުން ނަޝީދު ވިދާޅުވީ، އެ ހުރިހާ ކަމަކަށް ބޭނުންވާ ގާނޫނީ އޮނިގަނޑު ލިބެން ޖެހޭ ކަމަށެވެ. އަދި އެކަން ތަންފީޒުވުމުން ކަރަންޓުގެ 70 ޕަސެންޓް ޑީސެލް ނޫން ގޮތަށް އިޔާދަ ކުރަނިވި ހަކަތައިން ކަރަންޓު ދެވޭނެ ކަމަށް ވިދާޅުވިއެވެ.
ކަރަންޓުގެ އަގުހެޔޮ ކުރުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ.
