ހާމަކަން ބޮޑު ގޮތެއްގައި ކުންފުނިން ހިންގާ ޕްރޮޖެކްޓްތަކުގެ މައުލޫމާތު ފޯރުކޮށްދިނުމަށް އޯޕަން ޕްރޮކިއުމަންޓް ލޯންޗްކޮށްފި
31 އޮކްޓޯބަރު 2019 | ބުރާސްފަތި 07:59މީގެ ސަބަބުން ކޮރަޕްޝަން ނައްތާލުމަށް ފަސޭހަވެގެން ދާނެ
އާސަންދަ ކުންފުނިން ބޭއްވި ނޫސްވެރިންގެ ބައްދަލުވުމުގެ ތެރެއިން
ކޮރަޕްޝަން ނައްތާލައި ކުންފުނިން ހިންގާ ހުުރިހާ ޕްރޮޖެކްޓެއްގެ މައުލޫމާތު ރައްޔިތުންނަށް ފޯރުކޮށްދިނުމުގެ ބޭނުމުގައި އާސަންދަ ކުންފުނިން އޯޕަން ޕްރޮކިއުމަންޓް ލޯންޗްކޮށްފިއެވެ.
މިކަމަށް ހާއްސަކޮށް ބުރާސްފަތި ދުވަހުގެ ހެނދުނު އާސަންދަ ކުންފުނީގައި ބޭއްވި ރަސްމިއްޔާތެއްގައި އެކުންފުނީގެ އެސިސްޓެންޓް މެނޭޖިންގް ޑިރެކްޓަރ އިބްރާހިމް ރަޝީދު ވިދާޅުވީ، ތައާރަފްކުރެވިގެން ދިޔަ ޕޯޓަލްގެ ސަބަބުން ވީހާވެސް ހާމަކަންބޮޑު ގޮތެއްގައި ކުންފުނީގެ ފަރާތުން ހިންގާ ހުރިހާ ޕްރޮޖެކްޓެއްގެ މައުލޫމާތު ލިބިގެންދާނެކަމަށެވެ. ފާއިތުވެގެން ދިޔަ އަހަރުތަކުގައި އާސަންދަ ކުންފުނިން ގަވާއިދުތަކާއި އުސޫލުތަކާއި ހިލާފަށް އެތައް ކަމެއް ކޮށްފައިވާކަމަށާއި މި ޕޯޓަލްގެ ސަބަބުން ކުރިޔަށް އޮތް ތަނުގައި އެފަދަ އަމަލުތައް ނުހިންގޭނެކަމަށް ރަޝީދު ވިދާޅުވިއެވެ.
2 ސްޓޭޖަކަށް ބަހާލައިގެން ކުރިޔަށް ގެންދިޔުމަށް ހަމަޖެހިފައިވާ މަސައްކަތުގެ ފުރަތަމަ ސްޓޭޖްގެ އަމާޒަކީ ބޮޑެތި ޕްރޮޖެކްޓްތަކުގެ ޓެންޑަރސް ޓްރާންސްޕޭރެންޓްކޮށް ކުރިއަށް ގެންދިޔުންކަމަަށް އާސަންދަ ކުންފުނިން ވަނީ ބުނެފައެވެ. އެގޮތުން، މީގެ ފަހުން، -/25،000 ރުފިޔާއަށްވުރެ މަތީގެ އަގުތަކުގެ އެއްޗިހި ގަތުމަށް ކުރާ ޓެންޑަރ އިޢުލާނުތަކުގެ ހުރިހާ މަޢުލޫމާތެއް ވެބްސައިޓުން ފެންނާނެއެވެ.
މީގެ މަޤްޞަދަކީ،ޓެންޑަރ އިޢުލާނު ވެބްސައިޓަށް އަޕްލޯޑް ކުރުމުންފެށިގެން، މަޢުލޫމާތު ކަރުދާހާއި، މަޢުލޫމާތު ސެޝަނަށް ހާޒިރުވާ މީހުންގެ މަޢުލޫމާތާއި، ބިޑް ސަބްމިޓް ކުރާ މީހުންގެ މަޢުލޫމާތާއި، އިވެލުއޭޝަން ޝީޓާއި އަދި ޓެންޑަރ އެވޯޑް ކުރިނަމަ، އެވޯޑް ކުރިކަމުގެ ލިޔުމާ މުޅި ޓެންޑަރ ޕްރޮސެސްގެ، ހުރިހާ މަޢުލޫމާތެއް، ވެބްސައިޓުން ފެންނަން ހުރުން ކަމަށް އެ ކުންފުނިން މައުލޫމާތު ދެއެވެ.
ދެވަނަ ސްޓޭޖްގައި، ހުރިހާ ވެންޑަރސް ވެބްސައިޓް މެދުވެރިކޮށް ރަޖިސްޓްރީވާން ހުޅުވާލެވޭއިރު، އޭގެ ސަބަބުން ވެންޑަރއަކާ ގުޅޭ ދާއިރާއަކުން ޓެންޑަރއެއް އަޕްލޯޑްކޮށްފިނަމަ ވެންޑަރއަށް ނޮޓިފިކޭޝަނެއް ދާނެއެވެ. އެގޮތުން ދެވަނަ ސްޓޭޖް ނިމޭ އިރު ޕްރޮކިއުމަންޓްގެ އެންމެ ކުދި މުއާމަލާތްތަކުގެ މަޢުލޫމާތުވެސް ވެބްސައިޓަށް އަޕްލޯޑްކުރާނެއެވެ.
އޭގެ ސަބަބުން ކުންފުނިން ގަންނަ ހުރިހާ އެއްޗެއްގެ އަދި ކުންފުނީގެ ބޭނުމަށް ހޯދާ ހުރިހާ ޚިދުމަތެއްގެ، ޖުމުލަކޮށް ދަންނަވާނަމަ ޕްރޮކިއުމަންޓްގެ ހުރިހާ ޓްރާންސެކްޝަނެއްގެ ހުރިހާ ލިޔެކިޔުންތައް ވެބްސައިޓުން ފެންނަން ހުންނާނެކަމަށް އާސަންދައިން ވަނީ ބުނެފައެވެ.
އޯޕަން ޕްރޮކިއުމަންޓް ލޯންޗުކުރުމުގެ އެންމެ ބޮޑު މަޤްޞަދަކީ، ޒީރޯ-ޓޮލަރެންސްގެ ދަށުން، ވީހާވެސް ޓްރާންސްޕޭރެންޓްކޮށް ޕްރޮކިއުމަންޓްގެ މަސައްކަތްތައް ކުރިއަށް ގެންދިޔުމެވެ. އޯޕަން ޕްރޮކިއުމަންޓް ލޯންޗް ކުރުމަށް ނިންމީ، ކުންފުނީގެ މެނޭޖިން ޑިރެކްޓަރ މަރިޔަމް ޝަފީޤާއި ޓްރާންސްޕޭރެންސީ މޯލްޑިވްސްއާ ދެމެދު ކުރެވުނު މަޝްވަރާތަކަށްފަހުއެވެ. އޯޕަން ޕްރޮކިއުމަންޓް ލޯންޗްކުރުމުގައި ޓްރާންސްޕޭރެންސީ މޯލްޑިވްސްގެ ވަރަށް ބޮޑު އެހީތެރިކަމެއް ލިބިފައިވާކަމަށް އާސަންދައިން ވަނީ ބުނެފައެވެ.
