ހައިކޯޓުގެ އިސް ފަނޑިޔާރު ޝުޖާއާއި ފަނޑިޔާރު ޝަހީދުގެ ސުލޫކީ މައްސަލައެއް ޖޭއެސްސީން ބަލަނީ
31 އޮކްޓޯބަރު 2019 | ބުރާސްފަތި 07:09ޝުޖާއު އުސްމާނަކީ ރައީސް ޔާމީންގެ ކެމްޕެއިން ހަރަކާތުގައި އުޅުއްވި ކަމުގެ ތުހުމަތު ވެސް ކުރެވިފައިވާ ފަނޑިޔާރެއް
ހައިކޯޓުގެ އިސްފަނޑިޔާރު ޝުޖާއު އުސްމާން
ހައިކޯޓްގެ އިސް ފަނޑިޔާރު ޝުޖާއު އުސްމާނު އަދި އެ ކޯޓްގެ ފަނޑިޔާރު ހުސައިން ޝަހީދުގެ ސުލޫކީ މައްސަލައެއް ބަލަން ނިންމާފައިވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) ބުނެފި އެވެ.
ޖޭއެސްސީން ބުނީ ބުދަ ދުވަހު އެކޮމިޝަނުން ބޭއްވި ބައްދަލުވުމަށް 19 މައްސަލައެއް ތާވަލުކުރެވުނު ކަމަށާއި އޭގެތެރެއިން، ދެ މައްސަލައެއް ބަލައިގަނެ ތަހުގީގު ކޮމެޓީ އެކުލަވާލާފައިވާ ކަމަށެވެ. އެގޮތުން ތަހުގީގު ކޮމެޓީ އެކުލަވާލާފައިވަނީ، ހައިކޯޓްގެ އިސް ފަނޑިޔާރު ޝުޖާއު އުސްމާނު އަދި އެ ކޯޓްގެ ފަނޑިޔާރު ހުސައިން ޝަހީދުގެ މައްސަލައިގެ އިތުރުން ރ. ހުޅުދުއްފާރު ކޯޓްގެ އިސްމެޖިސްޓްރޭޓް އަލީ މުސްތަފާގެ ސުލޫކީ މައްސަލައެވެ.
އެ ދެ މައްސަލަ ބެލުމަށް ނިންމާފައިވާ ކަމަށް ޖޭއެސްސީން ބުނި ނަމަވެސް، އެ ދެ މައްސަލައިގެ އިތުރު ތަފްސީލެއް ޖޭއެސްސީން އަދިހާމައެއް ނުކުރެވެއެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލިސް އެކުލަވާލެވި، ޖޭއެސްސީއަށް އަލުން މެމްބަރުން އައްޔަން ކުރެވުމާއެކު، ޖުޑީޝަރީ އިސްލާހު ކުރުމާއި ފަނޑިޔާރުންގެ ސުލޫކީ ގިނަ މައްސަލަތަކެއް ދަނީ ބަލަމުންނެވެ. އެގޮތުން، ވޭތުވެދިޔަ ފަސް އަހަރު މަގާމުގެ ބޮޑެތި ކުރިއެރުންތަކެއް ހޯއްދެވި، ސުޕްރީމް ކޯޓުގެ ކުރީގެ ފަނޑިޔާރު އަބްދުﷲ ދީދީގެ ސުލޫކީ ގިނަ މައްސަލަތަކެއް ފެންމަތިވެ، އޭނާ ވަނީ މަގާމުން ވަކިކޮށްފަ އެވެ.
އަބްދުﷲ ދީދީއަކީ ރައީސް އަބްދުﷲ ޔާމީންގެ ވެރިކަމުގައި ސަރުކާރުގެ ނުފޫޒުން ވަރަށް ގިނަ މައްސަލަތަކެއް ނިންމާފައިވާ ކަމަށް ތުހުމަތު ކުރެވިފައިވާ ފަނޑިޔާރެކެވެ. އޭނާއަކީ ރައީސް ޔާމީންގެ ވެރިކަމުގައި ކުރީކޮޅު ކްރިމިނަލް ކޯޓުގެ ގާޒީ އެވެ. އެދުވަސްވަރު ސިޔާސީ ގިނަ ފަރާތްތަކެއްގެ މައްޗަށް ދައުވާ ކުރުމުން އެ ބޭފުޅުންގެ މައްޗަށް ކްރިމިނަލް ކޯޓުގައި ޝަރީއަތް ކުރައްވަން އިންނެވި ގާޒީ އެކެވެ. އަބްދުﷲ ދީދީ ވަނީ ފަހުން ހައިކޯޓަށް ޕްރޮމޯޓްކޮށް، ހައިކޯޓުގެ އިސްފަނޑިޔާރުގެ މަގާމު ދެއްވާފަ އެވެ. އަދި ރައީސް ޔާމީންގެ ވެރިކަމުގެ ފަހު އަހަރު އަބްދުﷲ ދީދީ ވަނީ ސުޕްރީމް ކޯޓުގެ ފަނޑިޔާރުކަމަށް އައްޔަން ކުރައްވާފަ އެވެ.
ޝުޖާއު އުސްމާނަކީ އަބްދުﷲ ދީދީގެ އަރިސް ބޭފުޅެއްގެ އިތުރުން މިހާރު ހައިކޯޓުގެ އިސް ފަނޑިޔާރެވެ. އަދި ރައީސް ޔާމީންގެ ކެމްޕެއިން ހަރަކާތްތަކުގައި ވެސް ބައިވެރިވެވަޑައިގެންނެވި ކަމުގެ ތުހުމަތުކުރެވިފައިވާ ފަނޑިޔާރެކެވެ.
