އޭޕީއީސީ ސަމިޓާއި، ކޮޕް25 ކްލައިމެޓް ކޮންފަރެންސް ޗިލީގައި ނުބާއްވަން ނިންމައިފި

ޗިލީގައި ބޭއްވުމަށް ހަމަޖެހިފައި އޮތް އޭޕީއީސީ ސަމިޓާއި، ކޮޕް25 ކްލައިމެޓް ކޮންފަރެންސް މުޒާހަރާތަކުގެ ސަބަބުން އެގައުމުގައި ނުބާއްވަން ނިންމައިފިއެވެ.

މި ދެ ސަމިޓް ނުބާއްވާނެކަން އިއުލާން ކުރެއްވީ ޗިލީގެ ރައީސް ސަބިސްޓަން ޕިނޭރާއެވެ.

ސަމިޓް ނުބާއްވަން ނިންމިކަން އިއުލާން ކުރައްވަމުން ޕިނޭރާ ވިދާޅުވީ މި ދެސަމިޓް ނުބޭއްވޭކަމީ ލިބުނު ބޮޑު ހިތާމައެއް ކަމަށާއި ނަމަވެސް ޗިލީގައި މިހާރު ކުރަމުންދާ މުޒާހަރާގެ ސަބަބުން މި ދެސަމިޓް ބޭއްވުމަށް ތަން ނުދޭ ކަމަށެވެ.

އެހެން ކަމުން ނޮވެމްބަރު މަހުގެ 16 އަދި 17 ގައި ބޭއްވުމަށް ހަމަޖެހިފައިވާ އޭޕީސީ ސަމިޓާއި ޑިސެމްބަރު މަހުގެ 2 ކުން 13 އަށް ބާއްވަން ހަމަޖެހިފައިވާ ކޮޕް ކްލައިމެޓް ކޮންފަރެންސް ބޭއްވެން ނެތް ކަމަށް ޕިނޭރާ ވިދާޅުވިއެވެ.

ޕިނޭރާ އިތުރަށް ވިދާޅުވީ މި ދެސަމިޓް ނުބޭއްވުމަކީ ގައުމަށް ލިބުނު ބޮޑު ގެއްލުމެއް ކަމަށާއި މި ދެސަމިޓަކީ ވެސް ވަރަށް މުހިންމު ދެ ސަމިޓް ކަމުގައި ދެކިވަޑައިގަންނަވާ ކަމަށެވެ.

އޭޕީއީސީ ސަމިޓަކީ ދުނިޔޭގެ އެންމެ މަތީ ފަންތީގެ 20 ބޭފުޅުން ބައިވެރިވެ ވަޑައިގަންނަވާ ސަމިޓެކެވެ. މީގެ ތެރޭގައި އެމެރިކާގެ ރައީސް ޑޮނާލްޑް ޓްރަމްޕް ހިމެނިވަޑައިގަންނަވައެވެ.

ވައިޓް ހައުސްގެ އޮފިޝަލަކި ވިދާޅުވީ ޗިލީ އިން ސަމިޓް ނުބާއްވަން ނިންމާ އިއުލާން ކުރުމުން ލިބިގެންދިޔައީ ހައިރާން ކަމެއް ކަމަށެވެ.