ގައުމީ ލޯބި ފޮހެވިއްޖެނަމަ ޕޯޗުގީޒުންގެ ފަރާތުން ލިބުނު ގެއްލުން ތަކުރާރުވުން އެކަށީގެންވޭ
ސުލްހަ މަސްލަސްކަން ދަމަހައްޓަން ޖެހޭ ކަމަށް ވިދާޅުވި
އެންވަޔަރުމެންޓް މިނިސްޓަރު ޑރ. ހުސައިން ވާހަކަފުޅު ދައްކަވަނީ
ގައުމަށް އޮންނަ ލޯތްބާއި، ގައުމާއި މެދު އަޅާލުން ކުޑަވެއްޖެނަމަ ޕޯޗުގީޒުންގެ ފަރާތުން ރާއްޖެ އަށް ލިބުނު ފަދަ ގެއްލުމެއް އިޔާދަވުން އެކަށީގެންވާ ކަމަށް އެންވަޔަރުމެންޓް މިނިސްޓަރު ޑރ. ހުސައިން ރަޝީދު ހަސަން ވިދާޅުވެއްޖެއެވެ.
މިނިސްޓަރު އެހެން ވިދާޅުވީ، ގައުމީ ދުވަސް ފާހަގަކުރުމަށް ހއ. އުތީމުގައި އަންގާރަ ދުވަހުގެރޭ ބޭއްވި ޖަލްސާއެއްގައި ވާހަކަ ދައްކަވަމުންނެވެ.
ކުރީގެ ލިޔުންތަކާއި ފަތްފުށްތަކުން ދައްކާ ގޮތުން ޕޯޗުގީޒުން ރާއްޖެއަށް އަތްގަދަ ކޮށްފައިވަނީ މީލާދީން 1558 ވަނަ އަހަރުއެވެ. އެއީ ރާއްޖެ، ބޭރުގެ ބައެއްގެ އަށްދަށަށް ދިޔަ ފުރަތަމަ ފަހަރެވެ. ޕޯޗުގީޒުންގެ އަޅުވެތި ކަމުގައި ދިވެހިރާއްޖެ 16 އަހަރު ވަންދެން އޮތުމަށް ފަހު އެމީހުން އަތުން ރާއްޖެ ސަލާމަތް ކުރެެއްވީ ބޮޑު ތަކުރުފާނެވެ.
އުތީމުގައި ބޭއްވި ޖަލްސާ ޝަރަފުވެރިކުރައްވާ ވާހަކަ ދައްްކަވަމުން މިނިސްޓަރު ވިދާޅުވީ، ގައުމުގައި ހަމަނުޖެހުންތަކާއި ދެބަސްވުންތައް އުފެދުނީމާ ވާހަކަ ދައްކައިގެން އެކަމަށް ހައްލު ނުހޯދޭނަމަ އޭގެ ނަތީޖާ ހިތިވާނެ ކަމަށެެވެ.
ވަކިން ހާއްސަކޮށް ގައުމުގެ އެތެރޭގެ ކަންތައްތައް ހަމަޔަކަށް އެޅުވުމަށް ބޭރުގެ ފަރާތްތަކަށް ދައުވަތުދޭނަމަ އޭގެ ނާޖާއިޒު ފައިދާ ހޯދައިގެން ވެރިކަން ފުރޮޅާލުމަށް މަސައްކަތް ކުރި ކޮންމެ ފަހަރަކު ރާއްޖޭގެ މިނިވަންކަން ގެއްލިގެން ދިޔަކަން ދިވެހި ތާރިހުން ހާމަވެފައިވާ ކަމަށްވެސް މިނިސްޓަރ ވިދާޅުވިއެވެ.
ޑރ. ހުސައިން ވިދާޅުވީ، ދިވެހިން މިނިވަން އަދި މުސްތަގިއްލު ކަމާއިއެކު ތިބޭނަމަ އެކަކު އަނެކަކަށް ކަމޭހިތަށާއި، އެކަކު ބުނާ ބަހަކީ ތިމާ ބުނާ ބަހެއް ކަމަށް ނުވިޔަސް އިހްތިރާމާއި އެކީ އެކަން ގަބޫލުކޮށް އެވާހަކަތައް ހިތްހަމަ ނުޖެހުމާއި އެކުވެސް ގަބޫލްކުރަން ޖެހޭ ކަމަށެވެ.
ސުލްހަމަސްލަސް ކަމާއިއެކު ދިރިނޫޅެވޭނަމަ އެތެރޭގެ ހަމަނުޖެހުން ހިނގާ ގައުމިއްޔަތު ގެއްލު ''ފުނޑި'' ހަލާކުގެ ތެރެއަށް ވެއްޓިގެން ހިނގާދާނެ ކަމަށް ވިދާޅުވިއެވެ.ޕޯޗުގީޒުންގެ އިތުރުން އިނގިރޭސީންގެ ބާރުގެ ދަށަށް ރާއްޖެ ދިޔުމުގައިވެސް ހަމަ އެމަގަށް ކަންތައް ހިނގާފައިވާ ކަމަށް އޭނާ ފާހަގަކުރެއްވިއެވެ.
ބޮޑު ތަކުރާފާނަށް ޒިކުރާ އަދާކުރުމުގެ ގޮތުން އައްޝެއިހް މުހައްމަދު ޖަމީލް ދީދީ ލިޔުއްވާފައިވާ ޅެންބައިތެއް ކިޔުއްވުމަށް ފަހު މިނިސްޓަރު ވިދާޅުވީ، ގައުމާއި މެދު ފަރުވާކުޑަ ކޮށްފިނަމަ ގައުމިއްޔަތުގެ އަގުތައް ވަޒަން ނުކުރާނަމަ އަދި ގައުމުދެކެ ލޯބިނުވާނަމަ އަަނެއްކާވެސް ޕޯޗުގީޒުންގެ އަތް ދަށުގައި ރާއްޖެވުމުން ލިބުނު ގެއްލުން ރާއްޖެއަށް ކުރިމަތިވުމަކީ އެކަށީގެންވާ ކަމެއް ކަމަށެވެ.
އެ ހާދިސާތަކުން ދަސްކުރަން ޖެހެނީ، ގައުމެއްގެ އެތެރޭގެ ހަމަޖެހުން އޮތުމަކީ ގައުމެއްގެ އެންމެ މުހިއްމު ރުކުންކަންކަން މިނިސްޓަރ ފާހަގަކުރެއްވިއެެވެ.
މި ޖަލްސާ ގައި އުތީމުގެ ސްކޫލުގެ ދަރިވަރުން ވަނީ ބޮޑުތަކުރުފާނުގެ ޒިކްރާ އަދާކުރުމުގެ ގޮތުން އެކި ކަހަލަ ސްޓޭޖް އައިޓަމްތައް ހުށައަޅާދީފައެވެ.
ސަރުކާރުގެ އެކި މުއައްސަސާތަކުގެ އިތުރުން ގިނަ ބަޔަކު ވަނީ މި ޖަލްސާގައި ބައިވެރިވެފައެވެ. ހޯމް މިނިސްޓަރު އިމްރާން އަބްދުﷲ މިވަގުތު މެލޭޝިޔާގައި ހުންނެވުމުން އެމަނިކުފާނަށް އެ ޖަލްސާގައި ބައިވެރިވެ ވަޑައިނުގެންނެވުނުއިރު، ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އަހުމަދު އަބްދުﷲ ވަނީ ޖަލްސާގައި ބައިވެރިވެ ވަޑައިގެންފައެވެ.
