މަގާމުގެ ހައިސިއްޔަތުން ކުރައްވާ ކަންކަމަށް އޮޑިޓަރ ޖެނެރަލަށް ޤާނޫނީ ރައްކާތެރިކަން ނުލިބޭކަމުގެ ކަންބޮޑުވުން

މަގާމުގެ ހައިސިއްޔަތުން ކުރައްވާ ކަންކަމާއި ނިންމަވާ ނިންމެވުންތަކަށް އޮޑިޓަރ ޖެނެރަލަށް ޤާނޫނީގޮތުން ރައްކާތެރިކަން ލިބެން ނެތުމުން އެކަމުގެ ކަންބޮޑުވުން އޮޑިޓް އޮފީހުން ފާޅުކުރައްވައިފި އެވެ.

ރައްޔިތުންގެ މަޖިލީހުގެ މާލިއްޔަތު ކޮމެޓީގައި އޮޑިޓް ޤާނޫނަށް ހުށަހަޅާފައިވާ އިސްލާހު ދިރާސާ ކުރުމަށް ބޭއްވި ބައްދަލުވުމުގައި، އެސިސްޓެންޓް އޮޑިޓަރ ޖެނެރަލް ހުސައިން ނިޔާޒީ ވިދާޅުވީ އޮޑިޓް ޤާނޫނު މިހާރު އޮތްގޮތުން ކަންބޮޑުވާ ކަންތައްތަކެއް އެބަހުރި ކަމުގަ އެވެ. އެގޮތުން އެންމެ ބޮޑަށް ފާހަގަކުރެވޭކަމަކީ މަގާމުގެ ހައިސިއްޔަތުން އޮޑިޓަރ ޖެނެރަލް ކުރައްވާ ކަންކަމަށް ފަހުން ޝަރީޢަތް ކުރެވިގެންދާ ގޮތަށް އޮތުން ކަމަށެވެ.

ނިޔާޒީ އިތުރަށް ވިދާޅުވީ އޭސީސީގެ މެމްބަރުންނާއި މުވައްޒަފުންނަށް ޤާނޫނުގައި ޤާނޫނީ ގޮތުން ރައްކާތެރިކަން ލިބޭކަމުގަ އެވެ. އަދި އެގޮތަށް މާއްދާއެއް ޑްރާފްޓު ކުރުމަށްފަހު ހުށަހެޅިދާނެކަމަށްވެސް ނިޔާޒީ ވިދާޅުވި އެވެ.

އޮޑިޓަރ ޖެނެރަލް މަގާމުގެ ހައިސިއްޔަތުން ކުރައްވާ ކަންކަމުގައި ފިޔަވަޅު އެޅޭ ގޮތަށް އޮންނަ އޮތުމާއި ގުޅޭގޮތުން ވާހަކަފުޅު ދައްކަވަމުން ކޮމެޓީގެ މުޤައްރިރު ކިނބިދޫ ދާއިރާގެ މެމްބަރ މުހައްމަދު ނާޝިޒް ވިދާޅުވީ އެންޓި ކޮރަޕްޝަންގެ ޤާނޫނުގައިވާ ސުލޫކީ ކަންކަން ބަލަމުންދާކަމުގަ އެވެ.

އެއަށްފަހު އެކަންކަން ބަދަލު ވެގެންދާނެކަން ނާޝިޒު ފާހަގަކުރެއްވި އެވެ. މީގެއިތުރުން އެސިސްޓެންޓް އޮޑިޓަރ ޖެނެރަލް ނިޔާޒީ ވަނީ އޮޑިޓަރ ޖެނެރަލް މަގާމުން ވަކިވުމަށްފަހު އެހެން މަގާމަކަށް ނުދިޔުމުގެ ގޮތުން ބައެއް ފައިދާތައް ލިބޭގޮތަށް ދުނިޔޭގެ އެހެން ތަންތާންގައި އޮންނަކަމަށް ވިދާޅުވެފަ އެވެ. އެހެންނަމަވެސް މިހާރު މަގާމުން ވަކިވުމަށްފަހު ލިބޭ އިނާޔަތެއް ނޯންނަކަމަށާއި އެފަދަ އިނާޔަތްތައް ދޭންޖެހެނީ ނަޒާހަތްތެރިކަމާއެކު މަސައްކަތް ކުރުމަށް ބާރުއެޅުމުގެ ގޮތުން ކަމަށް ނިޔާޒީ ވިދާޅުވި އެވެ.

ނިޔާޒީގެ ކަންބޮޑުވުންތަކަށް ޖަވާބު ދެއްވަމުން ކޮމެޓީގެ މެމްބަރުން ވަނީ ޤާނޫނަށް ގެންނަން ބޭނުންވާ އިސްލާހުތައް ކޮމެޓީއަށް ހުށަހެޅުމުން އެއިސްލާހުތައް އެޓަރނީ ޖެނެރަލާ ހިއްސާކުރައްވާނެ ކަމަށެވެ. އަދި އުސޫލެއްގެ ގޮތުން އޮޑިޓް ޤާނޫނަށް ގެންނަންޖެހޭ ހުރިހާ އިސްލާހުތައް ގެނައުމުގެ ވިސްނުން ކޮމެޓީން ނުގެންގުޅޭ ކަމަށް މެމްބަރުން ވިދާޅުވި އެވެ.

އޮޑިޓް ޤާނޫނަށް މިހާރު ހުށަހެޅިފައިވާ އިސްލާހަކީ އޮޑިޓަރ ޖެނެރަލަށް ޤާނޫނީ ގޮތުން ހަވާލުކޮށްފައިވާ ޒިންމާތަކާއި މަސްއޫލިއްޔަތުތައް ތަޢައްސަބުން އެއްކިބާވެ މިނިވަންކަމާއެކު ކުރާކަން ކަށަވަރު ކުރުމަށްޓަކައި ހުށަހަޅާފައިވާ އިސްލާހެކެވެ.