އިރާޤުގައި ކާފިއުގެ އަމުރު އިޢުލާން ކޮށްފި

އިރާޤު ސަރުކާރާއި ދެކޮޅަށް ކުރަމުންދާ މުޒާހަރާތައް ހޫނުވެ، އިރާޤު ސަރުކާރުން އެޤައުމުގައި ކާފިއު އިޢުލާން ކޮށްފިއެވެ.

އީރާޤު ސަރުކާރުން ކާފިއު އިއުލާން ކޮށްފައިވަނީ ވެރިރަށް ބަޣުދާދުގައެވެ.

ބަޣުދާދުގައި ކާފިއު އިޢުލާން ކުރިއިރު، ބަޣުދާދުގައި ކުރަމުންދާ މުޒާހަރާގައި މުޒާހަރާ ކުރަމުންދާ މީހުންނާއި ސަލާމަތީ ބާރުތަކާއި ދެމެދު ވަރުގަދަ ކުރިމަތިލުން ތަކެއް ވަނީ ހިނގައިފައެވެ. ހޯމަ ދުވަހުގެ ކުރިމަތިލުންތަކުގައި ޢާންމުންގެ ދެ މީހުން މަރުވެފައިވާއިރު، އެތަށް ސަތޭކަ މީހުން ވަނީ ޒަޚަމްވެފައެވެ.

މީޑިއާއަށް މައުލޫމާތުދެމުން ސަލާމަތީ ބާރުތަކުގެ އޮފިޝަލަކު ބުނީ އިތުރު ނޯޓިސްއެއް ނެރެންދެން ކާފިއު ދެމި އޮންނާނެ ކަމަށެވެ.

މީޑިއާ ރިޕޯޓްތައް ބުނާ ގޮތުން މުޒާހަރާ އިތުރަށް ވަރުގަދަ ވެގެންދިޔައީ އިރާޤުގެ އެތަށްހާސް ކިޔަވާ ކުދިން މުޒާހަރާއާ ގުޅުމުންނެވެ. އިރާޤުގެ ކިޔަވާ ކުދިން މުޒާހަރާއަށް ނިކުމެފައިވާއިރު އިރާޤު ސަރުކާރުން ވަނީ ކިޔަވާކުދިން މުޒާހަރާއަށް ނުނިކުތުމަށް ގޮވާލާ ވަރުގަދަ އިންޒާރެއް ދީފައިވާ ދަނޑިވަޅުގައެވެ.

މި މުޒާހަރާތަކުގައި މިހާތަނަށް 200 އަށް ވުރެ ގިނަ މީހުން މަރުވެފައިވާއިރު އެތައް ހާސް ބަޔަކު ވަނީ ޒަޚަމްވެފައެވެ. މީޑިއާ ރިޕޯޓްތައް ބުނާ ގޮތުން ގިނަ މީހުން މަރުވެފައިވަނީ ސަލާމަތީ ބާރުތަކުން ބަޑި ޖެހުމާއި ގުޅިގެންނެވެ.