ދީނުގެ ނަމުގައި ހަރުކަށި އަމަލުތައް ހިންގުމަކީ ޤައުމިއްޔަތު ދިރުވުމަށްޓަކައި ފަރުވާ ކުރަން ޖެހިފައިވާ މައްސަލައެއް : އިމްރާން
29 އޮކްޓޯބަރު 2019 | އަންގާރަ 03:29ގައުމިއްޔަތު ދިރުވުމަކީ އެގަމުގެ ހުރިހާ ރައްޔިތުންގެ ޒިންމާއެއް ކަމަށް ވިދާޅުވި
ހޯމް މިނިސްޓަރ އިމްރާން އަބްދުﷲ
މާތްވެގެންވާ އިސްލާމް ދީނަށް ކުޑައިމިސް ބަހެއް ރައްދުކުރުމާއި، ދީނާއި މެދުގައި ޒުވާނުންގެ ހިތުގައި ޝައްކު އުފެދޭފަދަ ވާހަކަ ދެކެވުމާއި، ދީނުގެ ނަމުގައި ހައްދުފަހަނަ އަޅާފައިވާ ހަރުކަށި އަނިޔާވެރި ޢަމަލުތައް ހިންގުމަކީ ދިވެހި ގައުމިއްޔަތު ދިރުވުމަށްޓަކައި ފަރުވާ ކުރަން ޖެހިފައިވާ މައްސަލައެއް ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެ އެވެ.
ޤައުމީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަ ދައްކަވަމުން މިނިސްޓަރ އިމްރާން ވިދާޅުވީ މިކަމުގައި ރައީސުލް ޖުމްހޫރިއްޔާ އިބްރާހިމް މުހައްމަދު ސާލިހު ގެންގުޅުއްވާ ހިކުމަތްތެރި ވިސްނުންފުޅަކީ މިކަމުން ދިވެހިރާއްޖެ ސަލާމަތް ކުރުމުގައި މުހިއްމު ސިފަތަކެއް ކަމަށެވެ.
އަދި މި ނުރައްކާތެރި ކަންކަމުން އަރައިގަތުމުގައި ރައީސުލް ޖުމްހޫރިއްޔާ އާއި ސަރުކާރަށް އެއްބާރުލުން ދީގެން ދިވެހި ހުރިހާ ރައްޔިތުން ޤައުމުގެ އެކުވެރިކަމާއި އެއްބައިވަންތަ ކަމުގެ ތެރެއިން ކުރިއަށް ދިއުމަށް ޤައުމީދުވަހު ގެ މުނާސަބަތުގައި މިނިސްޓަރ ވަނީ އިލްތިމާސް ކުރައްވާފައެވެ.
މިނިސްޓަރ ވިދާޅުވީ ޤައުމިއްޔަތުގެ އުފަލަކީ އެންމެންގެ އުފަލެއް ކަމަށާއި ޤައުމިއްޔަތުގެ ލޯތްބަކީ އެންމެންގެ ލޯތްބެއް ކަމަށެވެ.
މިނިސްޓަރުގެ ޚިޠާބުގައި ޤައުމިއްޔަތު ދިރުވުމަކީ ހުރިހާ ރައްޔިތުންގެ ޒިންމާއެއްކަމަށް ވީހިނދު މި މުނާސަބަތުގައި އެ ޒިންމާ ހަނދާންކޮށް ޒިކުރާ އާކުރަމުން އަންނަން އޮތް ޖީލުތަކަށް ގައުމު ގެންގޮސް ދިނުމުގައި ކޮންމެ ފަރުދެއްމެ އެފަރުދެއްގެ ފުރިހަމަ ޒިންމާ އަދާކުރުމަކީ ގައުމީ ދުވަހުގެ މުނާސަބަތުގައި އެންމެން އަޒުމް ކަނޑައަޅަން ޖެހޭ ކަމެއްގެ ގޮތުގައި ފާހަގަކުރިއެވެ.
ދިވެހި ގައުމިއްޔަތުގެ މިނިވަންކަމުގެ ޢަސާސަކީ މާތްވެގެންވާ އިސްލާމްދީނާއި ދިވެހި ބަސް އަދި ދިވެހިންގެ ފަޚުރުވެރި އާދަކާދައާއި ޘަޤާފަތް ކަމަށާއި، އެހެންކަމުން ދިވެހި ދައުލަތުގެ މިނިވަންކަން ރައްކައުތެރިކަމަށްޓަކައި ޤައުމިއްޔަތުގެ އަސާސްތައް ދިރުވާ އާލާކުރުމަކީ އެންމެންގެ މަސްއޫލިއްޔަތެއް ކަމަށް ވިދާޅުވިއެވެ.
ބަވަނަ ވެފައިވާ ދުނިޔޭގައި މިއަދު ކުރިމަތިލާން ޖެހިފައި މިވަނީ ކުރީގައި ދިމާވިފަދަ ކަންކަން ނޫންކަން ފާގަހަ ކުރައްވާ މިނިސްޓަރ ވިދާޅުވީ، އެކަންކަމުން އަރައިގަނެ ދިވެހި ޤައުމިއްޔަތު ހިމާޔަތްކޮށް ގައުމުގެ މުސްތަޤްބަލު އާރާސްތު ކުރުމަށްޓަކައި އެކަންކަމާއި ކުރިމަތިލާން ޖެހެނީ މިއަދުގެ ވިސްނުމާއި ފިކުރާ ޒިންމާގެ ތެރެއިން ކަމަށެވެ.
މިނިސްޓަރ އިމްރާންގެ ވާހަކަފުޅުގައި އެމަނިކުފާނުވަނީ، މި ސަރުކާރުން ޤައުމީ ދުވަސް ފާހަގަކުރުމަށް ދެއްވާ އަހަންމިއްޔަތުކަމަށްވެސް އަލިއަޅުއްވާލައްވާފައެވެ. އެގޮތުން ސަރުކާރުން ދެއްވާ ޤައުމީ އިނާމްތައް ޤައުމީ ދުވަހު ދިނުމަށް ރައީސުލްޖުމްހޫރިއްޔާ ނިންމެވި ނިންމެވުމަކީ މިކަމުގެ ހެއްކެއްކަމަށް މިނިސްޓަރ އިމްރާން ވިދާޅުވިއެވެ.
