ޓޯރކީޑޯ އިންޖީން: މެއިންޓެނަންސް މަދު، ތެލެއް ބޭނުން ނުވާނެ

ރާއްޖޭގެ ބާޒާރަށް އެކި ކަހަލަ އިންޖީނުތަކާއި އެއަށް ބޭނުންވާ ސާމާނު ވިއްކަމުން އަންނަ ޑީ ޓެކް ކުންފުނިން، ޕެޓްރޯލް ޑީސަލް ބޭނުން ނުކޮށް ދުއްވާ އައުޓް ބޯޑު އަދި އިން ބޯޑު އިންޖީނެއް ރާއްޖޭގެ ބާޒާރަށް ތަޢާރަފުކޮށްފިއެވެ.

"ރާއްޖެ އެމްވީ" އަށް މަޢުލޫމާތު ދެއްވަމުން ޑީޓެކްގެ މެނޭޖިންގ ޑިރެކްޓަރ މަސީހް އިމާދު ވިދާޅުވީ އެ ކުންފުނިން މުޅިން އަލަށް ރާއްޖޭގެ ބާޒާރަށް ނެރެފައިވަނީ އަވިން އުފައްދާ ހަކަތަ ބޭނުންކޮށްގެން ހިންގާ ޓޯކީޑޯ ބްރޭންޑުގެ އައުޓްބޯޑު އަދި އިންބޯޑު އިންޖީނު ކަމަށެވެ. އޭނާ ވިދާޅުވީ އެއަށް އެއްވެސް ވައްތަރެއްގެ ތެލެއް އަޅަން ނުޖެހޭނެ ކަމަށާއި، އިންޖީނު ހިންގާނީ ހަމަ އެކަނި ބެޓަރިން ކަމަށެވެ. އަދި ބެޓަރި ރަން ކުރަނީ ސޯލަރ ޕެނަލުން ކަމަށް ވެސް މަސީހު ވިދާޅުވިއެވެ.

މަސީހު ވިދާޅުވީ އިންބޯޑު އިންޖީން ބޮޑަށް ވިސްނާފައި ހުރީ ފެރީފަދަ އުޅަނދުތަކުގެ މަތީގައި ސޯލަރ ޕެނަލް ހަރުކޮށްފައި ކަމަށެވެ. އިންޖީނުގެ އަޖުމަ ބެލުމުގެ ގޮތުން މާލެއާއި އެއަރޕޯޓާ ދެމެދު ދަތުރުކުރާ ފެރީއެއްގައި މި އިންޖީނު ބޭނުންކޮށް ޓެސްޓްކޮށްފައިވާކަމަށާއި ނަތީޖާ ވަރަށް ކާމިޔާބުކަމަށް އޭނާ ވިދާޅުވިއެވެ.

މަސީހު ވިދާޅުވީ އެހެން އިންޖީނުތަކުގައި ވަރަށް ގިނަ މޫވިންގ ޕާޓްސްތައް ހުންނާނެ ކަމަށާއި، އެތެރޭގައި މަސައްކަތްކުރާ ވަރަށްބޮޑު މެޝިންގަނޑެއް ހުންނާނެ ކަމަށެވެ. އެއާ ޚިލާފަށް ޓޯކީޑޯގައި މޫވިންގ ޕާޓްސް ނެތުމުން ކަންފަތިވުން ކުޑަވާނެ ކަމަށެވެ. އަދި މީގައި ޕްރޮޕެލާ ޖަހާފައި ހުންނަ ބައިގައި މޯޓަރު އިންނަ އިރު އެއީ ވަރުގަދަ މޯޓަރެއް ކަމަށާއި، އެއިން ރިވާސްވެސް އަދި ފޯރވަރޑްވެސް ކުރެވޭނެ ކަމަށެވެ.

އޭނާ ވިދާޅުވީ ޕެޓްރޯލް އިންޖީނާ އަޅާބަލާއިރު، ޓޯކީޑޯގެ އަގު ގާތްގަނޑަކަށް 30 އިންސައްތަ ބޮޑުވާނެކަމަށެވެ. މީގެ އިންޖީނެއް ގަންނަން ފުރަތަމަ ކުރާ އިންސްވެސްޓްމެންޓް ބޮޑުވި ނަމަވެސް އޭގެ ފަހުން އެއްވެސް ޚަރަދެއް ފަހުން ކުރަން ނުޖެހޭނެކަމަށް އޭނާ ބުންޏެވެ.

މަސީހު ވިދާޅުވީ ޓޯކީޑޯގައި ހަލާކުވާ އަދި ސްޕެއަރ ޕާޓްސްތައް ނެތުމުން އިންޖީނުގެ ލައިފްޓައިމް ހަތަރުގުނަ ދިގުވާނެ ކަމަށެވެ. އަދި އޭގައި ހުންނަ ކަނެކްޝަންސްތަކާއި ތަންތަނުގައި ދަމިލަ ނުޖަހާގޮތަށް ބަލަހައްޓައިފިނަމަ މިއީ މެއިންޓެއިން ބައި ވަރަށް ކުޑަ އެއްޗެއް ކަމަށް އޭނާ ފާހަގަކުރެއްވިއެވެ.

އޭނާ ވިދާޅުވީ ޓޯކީޑޯ ބްރޭންޑުގެ ބެޓަރިވެސް އެ ކުންފުނިން ވިއްކާނެ ކަމަށެވެ. މަދުންފަހަރަކު މެއިންޓެއިން ކުރަން ޖެހުނު ނަމަވެސް މި އިންޖީނުގެ ބެޓެރި ނުގޮވާނެ ކަމަށްވެސް އޭނާ ވިދާޅުވިއެވެ. ބައެއް ބެޓަރިތަކަށް 9 އަހަރުގެ ވޮރަންޓީ ވެސް ދީފައިވާނެކަމަށް އޭނާ ވިދާޅުވިއެވެ.

ޑީޓެކުން ބުނީ ފަސް ހޯސްޕަވަރުގެ އިންޖީނެއް އެއް ޗާޖަރު މެދުވެރިކޮށް ދެ ގަޑިއިރުގެ ތެރޭގައި ފުލް ޗާޖުކޮށްލެވޭނެ ކަމަށެވެ. މީގެ އިތުރުން 80 ހޯސްޕަވަރުގެ އިންޖީނެއްގެ ބަދަލުގައި ޓޯކީޑޯ އިންޖީނެއް ބޭނުން ކުރުމުން 350 ކާރުން ދޫކުރާ ވިހަ ގޭސް ނައްތާލުމާ އެއްވަރުވާނެ ކަމަށް ޑީޓެކުން ބުނެއެވެ.

ޑީޓެކްއިން ރާއްޖެއަށް ތަޢާރަފު ކޮށްފައިވަނީ ޓޯކީޑޯގެ 5 ހޯސްޕަވަރުން ފެށިގެން 320 ހޯސްޕަވަރާ ދެމެދުގެ އިންޖީނުތަކުގެ ބަދަލުގައި ބޭނުންކުރެވޭ އިންޖީނުތަކެކެވެ. މިހާރު ދުނިޔޭގެ އެކި ކަންކޮޅުތަކުން ޖުމްލަ 90،000 ކަނޑު އުޅަނދުފަހަރުގައި ޓޯކީޑޯ އިންޖީނު ދަނީ ބޭނުން ކުރަމުންނެވެ.