ބިދޭސީން ރެގިއުލަރައިޒް ކުރުމުގެ މަސައްކަތް މިއަދު ނޯންނާނެ: އިކޮނޮމިކް މިނިސްޓްރީ
26 އޮކްޓޯބަރު 2019 | ހޮނިހިރު 07:31ގަވާއިދާ ހިލާފަށް ރާއްޖޭގައި 105،000 ބިދޭސީން އުޅޭ
ބިދޭސީންތަކެއް ރަޖިސްޓާ ވުމަށް ގަލޮޅު ދަނޑު ސަރަހައްދުގައި ކިޔޫ ހަދާފައި
ރާއްޖޭގައި ޤަވާއިދާއި ޚިލާފަށް އުޅޭ ބިދޭސީން ރެގިއުލަރައިޒް ކުރުމަށް ކޮންމެ ހޮނިހިރު ދުވަހު އިކޮނޮމިކް މިނިސްޓްރީން ގަލޮޅު ދަނޑުގައިި ކުރަމުންއައި މަސައްކަތް މިއަދު ކުރިޔަށް ނުގެންދާނެކަމަށް އިކޮނޮމިކް މިނިސްޓްރީން ބުނެފިއެވެ.
ރާއްޖޭގައި ޤަވާއިދާ ޚިލާފަށް އުޅޭ ބިދޭސީން ޤާނޫނުގެ ތެރެއަށް ވަދެ ޞައްޙަ ޑޮކިއުމެންޓްތަކާއެކު ރައްޖޭގައި މަސައްކަތް ކުރުމުގެ ފުރުޞަތު ފަހިކޮށްދިނުމަށް ކުރިޔަށްގެންދާ ޕްރޮގުރާމް އިކޮނޮމިކް މިނިސްޓްރީން މިއަދު ކުރިޔަށް ނުގެންދާނެކަން އިޢުލާންކޮށްފައި ވީނަމަވެސް ހުކުރު ދުވަހުގެ ރެއިން ފެށިގެން ބަންގްލަދޭޝް މީހުން ގަލޮޅު ދަނޑު ޞަރަޙައްދުގައި ކިއުގަޖެހުނެއެވެ.
އިކޮނޮމިކް މިނިސްޓްރީން ބުނީ މި ހަފުތާގައި ރީރަޖިސްޓްރޭޝަންގެ މަސައްކަތް ކުރިޔަށް ނުގެންދާނެ ކަމަށް ބުނެ ބަންގްލަދޭޝްގެ ބަހުންވެސް އިޢުލާނެއް ޢާއްމުކޮށްފައިވާނެކަމަށެވެ.
މިކަމާއި ގުޅިގެން ރާއްޖެއެމްވީއަށް މަޢުލޫމާތު ދެއްވަމުން އިކޮނޮމިކް މިނިސްޓްރީގެ އެސިސްޓެންޓް ޑިރެކްޓަރ ޒުބާނާ އިބްރާހިމް ވިދާޅުވީ، ކޮންމެ ހޮނިހިރު ދުވަހެއްގައި ރީރެޖިސްޓްރީ ކުރުމަށް އެޕޮއިންޓްމެންޓް ދޫކުރާނެކަމަށް އެމިނިސްޓްރީން ބުނެފައިނުވާނެކަމަށެވެ. އުޞޫލެއްގެ ގޮތުން މިދިޔަ ހަފުތާގެ ހޮނިހިރު ދުވަހުވެސް މަސައްކަތް ކުރިޔަށް ގެންދިޔައީ ބުރާސްފަތި ދުވަހު އެކަން އިޢުލާންކުރުމަށް ފަހުގައި ކަމަށް ޒުބާނާވިދާޅުވިއެވެ.
ރީރަޖިސްޓްރޭޝަންގެ މަސައްކަތް އަލުން ފަށާނެ ތާރީޚެއް އެ މިނިސްޓްރީން ފަހުގެ ތާރީޚެއްގައި އިޢުލާން ކުރާނެކަމަށެވެ.
ރާއްޖޭގައި ޤަވާއިދާ ޚިލާފަށް 105،000 އެއްހާ ބިދޭސީން އުޅޭކަމަށް ވެއެވެ. އަދި އޭގެ ތެރެއިން ގިނަ މީހުންގެ އަތުގައި ޕާސްޕޯޓް އަދި ވޯކްޕާރމިޓް ފަދަ ރަސްމީ ލިޔެކިޔުމެއް ނެތެވެ. ޕާސްޕޯޓް ނެތް މީހުންގެ ޕާސްޕޯޓް ހެއްދުމުގައި ދަތިތަކާކުރިމަތިވެފައި ވެއެވެ.
ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ޙައްލުކުމަށް ސަރުކާރުން ވަނީ "ނެޝަނަލް ޓާސްކްފޯސް އޮން އިޝޫސް ރިލޭޓެޑް ޓު މައިގްރެންޓް ވޯކަރސް" ގެ ނަމުގައި ޓާސްކްފޯހެއް އުފައްދާފަ އެވެ. މިހާތަނަށް އެ މައްސަލަ ޙައްލުކުރުމަށްޓަކައި އެ ޓާސްކްފޯސް ވަނީ އެއް އަހަރު ދުވަހަށް ލޭބަރުން ރާއްޖެ ގެނައުން މަނާކުރުމަށް ނިންމާފަ އެވެ. އަދި ޤަވާއިދާ ޚިލާފަށް އުޅޭ ބިދޭސީން ޤަވާއިދަށް ފެއްތޭތޯ ސަރުކާރުން ދަނީ މަސައްކަތް ކުރަމުން ނެވެ.
