"ކޮސް ގިނަ މިސްޓޭކް" ގެ ފަސްޓްލުކް: ސަޅިކަމުން ހަމަ ކޮސްކޮށްލައިފި!
26 އޮކްޓޯބަރު 2019 | ހޮނިހިރު 03:25ޓީޒާގައި ފިލްމުގެ ލަވަތަކުގެ ތަންތަން ހިމެނޭ
ކޮސް ގިނަ މިސްޓޭކްގެ ޓީޒާގެ މަންޒަރެއް
ވީމީޑިއާގެ ދެވަނަ ފީޗަރ ފިލްމު "ކޮސް ގިނަ މިސްޓޭކް" ގެ ފަސްޓްލުކް އާންމުކޮށް ބެލުންތެރިން ހަމަ ރަނގަޅަށް ވެސް ކޮސް ކޮށްލައިފިއެވެ.
އެ ޓީޒަރ ލޯންޗުކުރީ ހުކުރު ދުވަހުގެ ރޭ ރާއްޖެ ޓީވީން ދެއްކި ކުލަ ސްކްރީން ޕްރޮގްރާމުގައެވެ. ފިލްމުގެ ދެތަރިން ކަމަށްވާ މަރިޔަމް އައްޒަ އާއި އިރުފާނާ އިބްރާހީމް ހިމެނޭ ގޮތަށް އެ ޕްރޮގްރާމުގައި އެ ޓީޒަރ ދައްކާލިއިރު ތަރިންގެ އެކްޓިން އިން ބެލުންތެރިން އާޝޯޚުކޮށްލާނެއެވެ.
ޓީޒަރ ގެނެސްދީފައިވަނީ ފިލްމުގައި ހިމެނޭ ފަސް ލަވައިގެން ބައެއް މަންޒަރުތައް ހިމެނޭގޮތަށެވެ. ލަވަތައް ވެސް އެހާމެ ހިތްގައިމެވެ. އެ ފަސް ލަވަ އަކީ ވެސް ކޮޕީ ރާގުތަކަށް ތައްޔާރުކޮށްފައިވާ ލަވަތަކެކެވެ.
ޓީޒަރ ފެށިގެންވެސް ދިޔައީ ހިތްގައިމުގޮތަކަށެވެ. "ރޮމޭންޓިކް ކޮމެޑީ" އެއްކަން ހާމަކޮށްދެއެވެ. އެހެން ނަމަވެސް ޓީޒަރގެ ފަހުކޮޅު ބެލުންތެރިންގެ ހިތުގައި ޖައްސުވާނެ މަންޒަރުތަކެއް ވެސް ތަރިންގެ އެކްޓިން އިން ފެނިގެންދިޔައެވެ. ޓީޒަރ ވަރަށް އަވަހަށް "ކޮސް ގިނަ މިސްޓޭކް" ގެ ރަސްމީ ފޭސްބުކް ޕޭޖުގައި ވެސް އާންމުކުރާނެއެވެ.
ޔޫސުފް ޝަފީއު (ޔޫއްޕެ) ގެ އަމިއްލަ ވާހަކައަކަށް އޭނާ ޑައިރެކްޓްކުރާ "ކޮސް ގިނަ މިސްޓޭކް" ގެ ބޮޑު ބައި ޝޫޓް ކޮށްފައިވަނީ އދ. ފެންފުށީގައެވެ. އަދި ފިލްމުގެ ބައެއް މަންޒަރުތައް ސަން އައިލެންޑް ރިސޯޓްގައި ވެސް ނެގިއެވެ.
ގިނަ ތަރިން ހިމަނައިގެން އުފައްދާ އެ ފިލްމުގެ މައި ރޯލުތަކުން 14 ތަރިން ފެންނާނެއެވެ. އޭގެ ތެރޭގައި ހާމިދު އަލީ، އަހުމަދު އީސާ، އިރްފާނާ އިބްރާހީމް، މަރިޔަމް އައްޒަ، ނުޒުހަތު ޝުއައިބް، އަހުމަދު ނިމާލް، އަލީ އާޒިމް، އިބްރާހިމް ޝާފިއު، ގުލިސްތާން މުހައްމަދު، އަލީ ސީޒަން، އަހުމަދު ސައީދު، އައިޝަތު ލަހުފާ، މުހައްމަދު ނަވާލް އަދި ޔޫއްޕެ ހިމެނެއެވެ.
އަންނަ ނޮވެމްބަރު މަހު ފިލްމު ސިނަމާއަށް ގެންނަން ނިންމާފައިވީނަމަވެސް ސީދާ ވަކި ތާރީޚެއް އަދި ކަނޑަ އަޅާފައެއް ނުވެއެވެ.
