މިއަހަރުގެ 4 ވަނަ ޔޫތް ލީޑަރސް ފޯރަމް މަތިވެރީގައި ފަށައިފި
މިފޯރަމްގައި 80އަށް ވުރެ ގިނަ ޒުވާނުން ބައިވެރިވޭ
ޔޫތް ލީޑާރސް ފޯރަމްގެ ތެރެއިން
ޒުވާނުންނަށް އަމާޒުކޮށްގެން ކުރިއަށް ގެންދާ، ހަތަރުވަނަ ޔޫތް ލީޑަރސް ފޯރަމް އއ.މަތިވެރީގައި ފަށައިފިއެވެ.
ބުރާސްފަތި ދުވަހު މަތިވެރީގައި ފެށި މިފޯރަމްގައި އަތޮޅުގެ 8 ރަށަކުން ދަރިވަރުން ހިމެނޭގޮތަށް 80 އަށްވުރެ ގިނަ ޒުވާނުން ބައިވެރިވެއެވެ. ފޯރަމްގައި ބައިވެރިވުމުގެ ފުރުސަތު ދެނީ ކޮލެޖް ޔުނިވަރސިޓީ އަދި މަތީ ސާނަވީ ދަރިވަރުންނަށެވެ. ނަމަވެސް މިފަހަރުގެ ފޯރަމްގައި އެހެން ބައެއް ޒުވާނުންނަށް ވެސް ވަނީ ފުރުސަތުދީފައެވެ.
ތިން ދުވަހުގެ މުއްދަތަށް ކުރިއަށްގެންދާ މިފޯރަމްގައި ބައިވެރިވެފައިވަނީ މަތިވެރީގެ އިތުރުން ތޮއްޑޫ، ރަސްދޫ، އުކުޅަސް، ބޮޑުފުޅުދޫ، މާޅޮސް، ހިމަންދޫ އަދި ފެރިދޫންނެވެ. ހޯމް މިނިސްޓްރީން ބުނީ މިފޯރަމްގައި ތަފާތު އަށް ދާއިރާއަކުން ސެޝަންތައް ހިންގާނެ ކަމަށެވެ.
އޭގެ ތެރޭގައި މޯލްޑިވްސް ޕޮލިސް ސަރވިސްގެ ކޮމިއުނިޓީ އެންގޭޖްމަންޓް އަދި ކޮމިއުނިކޭޝަން ސްކިލްސް ސެޝަނާއި، ނޭޝަނަލް ޑްރަގް އެޖެންސީގެ ސެޝަނާއި، ކައުންޓަރ ރެޑިކަލައިޒޭޝަން އެންޑް ރިހިބިލިޓޭޝަން ސެޝަނާއި، ގައުމިއްޔަތު ދިރުވާ އާލާކުރުމުގެ މައްޗަށް މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖުން ކުރިއަށްގެންގޮސްދެއްވާ ސެޝަނާއި، ރައްކާތެރިގޮތުގައި ކުނި ނައްތާލުމުގެ މުޙިންމުކަމުގެ މައްޗަށް މިނިސްޓްރީ އޮފް އެންވަޔަރަމަންޓްގެ ފަރާތުން ކުރިއަށްގެންދާ ސެޝަން ހިމެނެއެވެ.
މީގެއިތުރުން ކެރިއަރ ގައިޑެންސް ޕްރޮގްރާމްތަކާ ގުޅޭގޮތުން މިނިސްޓްރީ އޮފް ޔޫތް، ސްޕޯރޓްސް އެންޑް ކޮމިއުނިޓީ އެމްޕަވަރމަންޓްގެ ފަރާތުންވެސް ސެޝަނެއް ކުރިއަށްގެންދާނެއެވެ. ދިވެހި މަސްވެރިންގެ ޖަމިއްޔާގެ ފަރާތުން މިފޯރަމްގައި ބައިވެރިވެ، މަސްވެރިކަމުގެ މުހިއްމު މައުލޫމާތާއި، މަސްވެރިކަމުގައި ފާހަގަކޮށްލެވޭ ނަމޫނާ ޒުވާނަކާ ގުޅޭގޮތުން ވެސް މައުލޫމާތު ހިއްސާކުރާނެ ކަމަށް މިނިސްޓްރީން މައުލޫމާތުދެއެވެ.
ހޯމް މިނިސްޓްރީން ބުނީ ފޯރަމްގެ ތެރެއިން ޔޫތް ލީޑާރސް ނެޓްވޯކާ ގުޅޭ މައުލޫމާތު ވެސް ހިއްސާކުރާނެ ކަމަށެވެ. ޔޫތް ލީޑާރސް ނެޓްވޯޯކަކީ މިނިސްޓްރީގެ މަސްއޫލިއްޔަތުތަކުގެ ތެރޭގައި ހިމެނޭ ޒިންމާދާރު ރައްޔިތެއް ބިނާކުރުމުގެ މަސައްކަތުގެ ތެރެއިން ޒުވާނުންނަށް އިސްކަންދީގެން އުފައްދާފައިވާ ނެޓްވޯކެކެވެ.
މިނެޓްވޯކްގެ ތެރެއިން މަސައްކަތްކުރާނީ ރާއްޖޭގެ ދީނީ އަގީދާއާއި، އެއްބައިވަންތަކަން ހަރުދަނާކުރުމަށާއި، ދިވެހީންގެ ސަގާފަތާއި އާދަކާދަތައް ގެއްލިގެން ނުދާނެ ގޮތްތައް ހޯދުމަށާއި، ވީރާނާވަމުންދާ އިޖުތިމާއީ ފޭރާން އިޔާދަކުރުމަށެވެ. އަދި ދިވެހި ރައްޔިތުންނަކީ ޒިންމާދާރު ބަޔަކަށް ހަދައި، ޒިންމާދާރު ގޮތެއްގައި ހަރަކާތްތެރިވެ އުޅުމަށް މަގުފަހިކޮށްދިނުމަށާއި، އިޖުތިމާއީ ބޮޑަތި މައްސަލަތަކުން ކުޑަކުދީންނާއި، ޒުވާނުން ދުރުހެލިކުރުވުމަށް ވެސް މަސައްކަތްކުރާނެއެވެ. މިނެޓްވޯކަކީ ޔުނިވަރސިޓީ ކޮލެޖްތަކުގެ ދަރިވަރުން އެކުލެވޭގޮތަށް އުފައްދާފައިވާ ނެޓްވޯކެކެވެ.
މިއަހަރުގެ 4 ވަނަ ފޯރަމް މިމަހުގެ 26 ގެ ނިޔަލަށް ކުރިއަށްދާނެއެވެ. މިއަހަރުގެ ފުރަތަމަ ފޯރަމް ބޭއްވީ ހއ.ހޯރަފުށީގައެވެ. ދެވަނަ ފޯރަމް ބޭއްވީ ހުޅުމާލޭގައެވެ. ތިންވަނަ ފޯރަމް ބޭއްވީ ގދ.ތިނަދޫގައެވެ.
