އެންޓިކޮރަޕްޝަން ކޮމިޝަން (އޭސީސީ) ގެ ރައީސް އަކަށް ހަސަން ލުތުފީ ހުންނެވިއިރު، ބޮޑު ހިޔާނާތުގެ މައްސަލާގައި ހިމެނޭ މީހުންގެ އެކައުންޓްތައް ފްރީޒް ނުކުރީ އޭނާ ''ފްރީޒް'' ކޮށްފާނެތީ ކަމަށް ލުތުފީ ވިދާޅުވެފައިވާ ކަމަށް އެސިސްޓެންޓް ޕޮލިސް ކޮމިޝަނަރު މުހައްމަދު ރިޔާޒު ވިދާޅުވެއްޖެއެވެ.
ކުރީގެ ރައީސް އަބްދުﷲ ޔާމީންގެ މައްޗަށް ކުރެވޭ ކޮރަޕްޝަންގެ މައްސަލަތަކުން އެމަނިކުފާނު ސަލާމަތް ކުރައްވަން މަގުފަހި ކުރެވޭ ގޮތަށް ލުތުފީ އަމަލު ކުރެއްވި ކަމުގެ ތުހުމަތުތައް އޭނާގެ މައްޗަށް ކުރެވެއެވެ.
އެގޮތުން އެމްއެމްޕީއާރުސީގެ ހިޔާނާތުގައި ޔާމީންގެ އެކައުންޓަށް ވަން އެއްމިލިއަން ޑޮލަރުގެ މައްސަލަ ބަލަން އޭސީސީން ހިންގި ތަހުގީގުގައި ވެސް އެއް މިލިއަން ޑޮލަރު ޖަމާކުރި ޔާމީންގެ އެކައުންޓް ފްރީޒްނުކޮށް އެކްސްކްރޯ އެކައުންޓެއް ހުޅުވައި، ފައިސާ ޖަމާކުރުމަށް އެއްބަސްވުމެއް ހެދުމަށް އުޅުއްވިކަމުގެ ތުހުމަތު ވަނީ ލުތުފީގެ މައްޗަށް ވަނީ ކުރެވިފައެވެ.
ފުލުހުން ވަނީ އެ މައްސަލާގައި ލުތުފީ ހާޒިރުކޮށް ބަޔާނެއް ނަގާފައެވެ. ބުރާސްފަތި ދުވަހު އިސްކަންދަރު ކޮށީގައި ބޭއްވި ޕްރެސްކޮންފަރެންސްގައި، ނޫސްވެރިއަކު ކުރި ސުވާލަކަށް ޖަވާބުދެއްވަމުން އޭސީޕީ ރިޔާޒް ވިދާޅުވީ، ލުތުފީގެ ތަހުގީގު ހިންގާފައިވަނީ ވަރަށް އެކުވެރި މަހައުލެއްގައި ބިރުދެއްކުމެއް ނުވަތަ ނުފޫޒެއް ނެތި ކަމަށެވެ.
އިންޓަވިއު އަށް ފަހު އެއްމިލިއަން ޑޮލަރުގެ އެކައުންޓް ފްރީޒް ނުކުރެއްވީ ކީއްްވެގެންތޯ ލުތުފީއާ ސުވާލު ކުރިކަމަށް ރިޔާޒް ވިދާޅުވިއެވެ. އެ ސުވާލުގެ ޖަވާބަށް ލުތުުފީ ވިދާޅުވެފައިވަނީ، އެކައުންޓް ފްރީޒް ނުކުރެއްވީ އޭނާ ފްރީޒް ކޮށްފާނެތީ ކަމަށް ކަމަށެވެ.
ލުތުފީ ވަނީ މީގެ ކުރިން ރައީސް ޔާމީންގެ ދެކޮޅަށް ހެކިބަސްދޭނެ ކަމަށް ވިދާޅުވެ ފަހުން ހެކިބަސް ނުދެވޭނެ ކަމަށް ބުނެ ކްރިމިނަލް ކޯޓަށް ސިޓީއެއް ފޮނުވާފައެވެ. ގިނަ ދުވަސްތަކެއް ވަންދެން ވަޒީފާ އަށް ނުނިކުންނަވާ ލުތުފީ މުސާރަނަންގަވަމުން ގެންދާތިވެ ރައްޔިތުންގެ މަޖިލީހުން އޭނާ ވަކިކުރަން ނިންމާފައި ވަނިކޮށް އޭނާވަނީ އަމިއްލަފުޅަށް އިސްތިއުފާ ދެއްވާފައެވެ.
