ބިޑް ކުރުމަކާ ނުލައި ސަރުކާރަށް ޕްރޮޕޯސަލް ހުށަހެޅޭ އުސޫލުގެ ދަށުން, މިހާތަނަށް 130 އަށް ވުރެ ގިނަ މަޝްރޫޢު ހުށަހަޅާފައިވޭ: ފައްޔާޒް
ސަރުކާރުގެ ޢަމާޒަކީ މި ދައުރުގެ ތެރޭގައި ކަރަންޓުގެ މައްސަލަތައް ޙައްލުކުރުން
އިކޮނޮމިކް މިނިސްޓަރ ފައްޔާޒް
ބިޑް ކުރުމަކާ ނުލައި ސަރުކާރަށް ޕްރޮޕޯސަލް ހުށަހެޅޭ އުސޫލުގެ ދަށުން, 130 އަށް ވުރެ ގިނަ މަޝްރޫޢުތަކެއް އެކި ފަރާތްތަކުން މިހާތަނަށް ހުށަހަޅާފައިވާކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ އައްޑޫ ސިޓީގެ ކަރަންޓުގެ ބޮޑު މަޝްރޫއު ހިންގަން ޑޮންގްފެންގ ކުންފުންޏާއެކު ފްރޭމް ވޯކް އެގްރީމެންޓުގައި ސޮއިކުރުމަށް ބޭއްވި ރަސްމިއްޔާތުގައެވެ.
މިނިސްޓަރ ފައްޔާޒް ވިދާޅުވީ ބިޑް ކުރުމަކާ ނުލައި ސަރުކާރަށް ޕްރޮޕޯސަލް ހުށަހެޅޭ އުސޫލުގެ ދަށުން, އެކި އެކި މަޝްރޫޢު ހިންގުމަށް ސަރުކާރަށް މިހާތަނަށް 137 އަށް ވުރެ ގިނަ ޕްރޮޕޯސަލް ލިބިފައިވާ ކަމަށާއި މި މަޝްރޫޢުތަކުގެ ތެރެއިން ނެގޯޝިއޭޓް ކުރާނީ 20 މަޝްރޫއު ކަމަށެވެ. އެއީ ފެނާއި ނަރުދަމާގެ މަޝްރޫޢު ތަކާއި، ކަރަންޓުގެ މަޝްރޫއު ތަކުގެ އިތުރުން ޞިއްޙީ ދާއިރާގެ މަޝްރޫއުތައްކަމަށެވެ.
މިނިސްޓަރ ފައްޔާޒު އިތުރަށް ވިދާޅުވީ ސަރުކާރުގެ ޢަމާޒަކީ މި ދައުރުގެ ތެރޭގައި ކަރަންޓުގެ މައްސަލަ ޙައްލުވެގެން ދިޔުން ކަމަށާއި، އެގޮތުން ސަރުކާރުން ރާއްޖޭގެ ހަތަރު ޞަރަޙައްދުގައި އިކޮނޮމިކް ހަބް ތަރައްޤީކުރާއިރު ކަރަންޓަކީ އެންމެ މުހިންމު އެއްކަން ކަމަށެވެ.
މި ޙަފުލާގައި ވާހަކަފުޅުދައްކަވަމުން އައްޑޫ ސިޓީގެ މޭޔަރ ޢަބްދުﷲ ޞާދިޤް ވިދާޅުވީ އައްޑޫސިޓީގައި މިވަގުތު އޮތީ ވަރަށް ދުވަސްވެފައި އޮތް ހަކަތައިގެ ނިޒާމެއް ކަމަށާއި މި ނިޒާމަކީ ވަރަށް ޚަރަދު ބޮޑު ނިޒާމެއްކަން ފާހަގަކުރެވިފައިވާކަމަށެވެ. އެހެންކަމުން އައްޑޫސިޓީގައި ޒަމާނީ ހަކަތައިގެ ނިޒާމާއް ޤާއިމުކުރެވުމުން އައްޑޫގެ ތަރައްޤީއަށް ބޮޑެތި ފައިދާ ތަކެއް ވެގެންދާނެކަމަށް މިނިސްޓަރ ވިދާޅުވިއެވެ.
އިކޮނޮމިކް މިނިސްޓްރީން ބުނީ މި މަޝްރޫއު ފުރިހަމަކުރެވުމުން ދެކުނުގައި ދިމާވާ ކަރަންޓުގެ މައްސަލައަށް ދާއިމީ ޙައްލެއް ލިބިގެންދާނެކަމަށެވެ. އަދި ނަތީޖާއެއްގެ ގޮތުން ސަރުކާރުން ދެކުނުގައި ހިންގުމަށް ރާވަފައިވާ އިޤްތިޞާދީ މަސައްކަތްތައް ފެށުމަށް އިތުރު ހަލުވިކަމެއް ލިބިގެންދާނެކަމަށް މިނިސްޓްރީން އަންދާޒާކުރެއެވެ.
