ސަރުކާރުން، ޕީޕީއެމްއާއި ޕީއެންސީގެ ދަފްތަރުން މެމްބަރުން ފޭރެނީ: ޝުޖާއު
މެމްބަރުން އެހެން ޕާޓީތަކަށް ބަދަލުކުރަމުން ދަނީ އޮޅުވާލައިގެން
އިބްރާހިމް ޝުޖާއު
ޕީޕީއެމްއާއި ޕީއެންސީގެ ދަފްތަރުން މެމްބަރުން ފޭރުމުގެ މަސައްކަތް މި ސަރުކާރުން ފަށާފައިވާކަަމަށް ޕީއެންސީގެ ރައީސް އަދި ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއު ވިދާޅުވެއްޖެއެވެ.
ޕީޕީއެމްގެ ޢާއްމު މެންބަރުންނަށް ނޭނގި އެޕާޓިގެ މެމްބަރުން އެހެން ޕާޓީތަކަށް ބަދަލުކުރެވިފައިވާ މައްސަލައެއް ޕްރޮގްރެސިވް ކޯލިޝަންގެ ފަރާތުން އިލެކްޝަންސް ކޮމިޝަނަށް ހުށަހެޅުމަށްފަހު ބުދަ ދުވަހުގެ މެންދުރު ނޫސްވެރިންނަށް މަޢުލޫމާތު ދެއްވަމުން، ކޮންގްރެސް ކޯލިޝަނުގައި ހިމެނޭ ޕީއެންސީގެ ނައިބު ރައީސް ޝުޖާއު ވިދާޅުވީ އިލެކްޝަންސް ކޮމިޝަނުން ފޯމް ވެރިފައި ކުރާއިރުވެސް ބޭނުންކުރަމުން ގެންދަނީ އެންމެ ކުރީގެ އުޞޫލުތައްކަމަށެވެ. އެގޮތުން އެކޮމިޝަނުން ހަމައެކަނި ބަލަނީ ފޯމްގައި އޮންނަ ނަމާއި އަައިޑީކާޑު ދިމާވޭތޯ އެކަނި ކަމަށާއި، ޕީޕިއެމްއިން އެވަރަށް މެމްބަރުން ބަދަލުވެދާނެކަމަށް އެއްވެސް ވަރަކަށް ގަބޫލުނުކުރައްވާކަމަށެވެ. މިއީ ސަރުކާރުން ޕީޕީއެމްގެ މެމްބަރުން ފޭރިގަންނަން ކުރާ މަސައްކަތެއްކަން ފާހަގަކޮށް ޝުޖާއު ވިދާޅުވީ އެންމެ ފަހުން ކުރި ދަތުރު ތަކުގައި ޕީޕީއެމާއި ގުޅިވަޑައިގަތުމަށް ރައްޔިތުން ބޭނުންވެފައިތިބި މިންވަރުވެސް ހެއްކަކަށް ފުދޭނެކަމަށެވެ.
ޕީޕީއެމްގެ ނައިބު ރައީސް ނައިފަރު ދާއިރާގެ މެމްބަރު އަޙްމަދު ޝިޔާމް ވިދާޅުވީ އީސީގެ މެމްބަރުންނާއި ބައްދަލުކޮށް ކަންބޮޑުވުންތައް ޙިއްސާކޮށްފައިވާނެކަމަށާއި ޕާޓީގެ ދަފްތަރު ހާމަކުރާއިރު ހާހުން މެންބަރުން މަދުވާކަން ފާހަގަކުރެވިފައިވާކަމަށެވެ. ވަކިވާ މެމްބަރުންނާއި ގުޅުއްވަމުން އަންނަ ކަން ފާހަގަކުރައްވައި ޝިޔާން ވިދާޅުވީ 60 އިންސައްތަ ބޭފުޅުން ޕާޓީން ވަކި ނުވާކަމަށް ބުނެފައިވާކަމަށެވެ. އަދި އެ މެމްބަރުންނަށް ނޭނގި އެހެން ޕާޓީތަކަށް ރަޖިސްޓްރީކޮށްފައިވާކަމަށް ބުނެ، އެއީ ޕީޕީއެމްގެ ދަފްތަރުން މެމްބަރުން ފޭރުމަށް ސަރުކާރުން ހިންގާ ޢަމަލެއްކަމަށް ޝިޔާން ވިދާޅުވިއެވެ.
ޕީޕީއެމަކީ ރާއްޖޭގައި މިހާރުވެސް އޮތް އެންމެ ބޮޑު ޕާޓީކަން އެބޭފުޅުން ވަނީ ތަކުރާރުކޮށް ވިދާޅުވެފައެވެ. އަދި ކޮންމެ މެމްބަރުކުވެސް ކޮންމެ ދުވަހެއްގެ 24 ގަޑިއިރުން އެއް މިނިޓު، އިލެކްޝަންސް ކޮމިޝަނަށް މެސެޖްކޮށް ރަޖިސްޓްރީވެފައިވަނީ ކޮން ޕާޓީއެއްގައި ތޯ ބެލުމަށް ލީޑަރޝިޕުން ވަނީ އިލްތިމާސްކޮށްފައެވެ. ޕީޕީއެމުން ވަނީ، މެމްބަރުން ބަދަލުކުރި ޕާޓީތަކުގެ ތެރޭގައި ސަރުކާރު ކޯލިޝަނުގައި ހިމެނޭ ޖުމްހޫރީ ޕާޓީއާއި، އަދާލަތު ޕާޓީ އަދި އެމްއާރުއެމްކަމަށް ތުހުމަތު ކުރައްވާފައެވެ.
