ނިލަންދޫގެ މައްޗަށްކުރި ހޯދައި މާޒިޔާއިން ފަސް ޕޮއިންޓްގެ ލީޑެއް ނަގައިފި

ދިރާގު ދިވެހި ޕްރެމިއަރ ލީގުގައި ހޯމަ ދުވަހު ހަވީރު ކުޅުން މެޗުން ނިލަންދޫ ބަލިކޮށް މާޒިޔާއިން އެއްވަނައިގައި ފަސް ޕޮއިންޓްގެ ލީޑެއް ނަގައިފިއެވެ.

ގަލޮޅު ރަސްމީ ފުޓުބޯޅަ ދަނޑުގައި ކުޅުނު މި މެޗު މާޒިޔާއިން ކާމިޔާބުކުރީ 5-0 ގެ ނަތީޖާ އަކުންނެވެ.

މެޗު ފަށައިގެން މޮޅު އެޓޭކިންގ ގޭމެއް މާޒިޔާ ކުޅުންތެރިން ކުޅުނު އިރު މެޗުގެ 10 ވަނަ މިނެޓުގައި މާޒިޔާއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ހަސަން ޝަރީފް (ޑުންގާ) އެވެ. މާޒިޔާގެ ލަނޑާއެކު ނިލަންދޫ އިން އެޓީމުގެ ކުޅުން ރަނގަޅު ކުރި އިރު އެޓީމުން ވަނީ މާޒިޔާގެ ހާފަށް ބާރުބޮޑު ކޮށްފައެވެ. ނަމަވެސް ފުރަތަމަ ހާފު ނިމެން މިނެޓަކަށް ވެފައިވަނިކޮށް މާޒިޔާއިން ވަނީ އިތުރު ލަނޑެއް ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ބިދޭސީ ފޯވާޑް ކޯނެލިއަސް ސްޓެވާޓް އެވެ.

މެޗުގެ ފުރަތަމަ ހާފު ނިމިގެންދިޔައީ 2-0 ގެ ނަތީޖާ އަކުން މާޒިޔާ ކުރީގައި އޮވެގެންނެވެ.

މެޗުގެ ދެވަނަ ހާފުގައި ނިލަންދޫ އިން މޮޅު އެޓޭކިންގ ގޭމެއް ކުޅުނު އިރު މި ހާފުގައި ނިލަންދޫ އިން ވަނީ މާޒިޔާގެ ގޯލަށް ނުރައްކާތެރި ހަމަލާތަކެއް ފޮނުވައިލައިފައެވެ. ނަމަވެސް ނިލަންދޫއިން ރަނގަޅަށް ކުޅެމުން ދަނިކޮށް މާޒިޔާއިން ވަނީ އިތުރު ލަނޑެއް ޖަހާ ނަތީޖާގެ ފަރަގު ބޮޑުކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ކެޕްޓަން އަސަދުﷲ އަބްދުﷲ އެވެ.

މާޒިޔާއިން އެޓީމުގެ ތިންވަނަ ލަނޑު ޖެހިތާ މިނެޓެއް ފަހުން މާޒިޔާގެ ހަމްޒާ މުހައްމަދު (ހަމްޕު) ވަނީ ލަނޑު ޖަހާ މެޗުގެ ނަތީޖާ 4-0 ކަށް ބަދަލުކޮށްލައިފައެވެ. އަދި އެޓީމުގެ ފަހު ލަނޑު މެޗުގެ 74 ވަނަ މިނެޓުގައި ކާމިޔާބުކޮށްދިނީ އިބްރާހީމް މަހުދީ (ފޭދޫ އިއްބެ) އެވެ.

މި ނަތީޖާ އާއިއެކު މާޒިޔާއިން ލީގު ތާވަލުގެ އެއްވަނައިގައި 26 ޕޮއިންޓާއެކު އޮތްއިރު ދެވަނައިގައި ކްލަބް އީގަލްސް އޮތީ 21 ޕޮއިންޓާއެކުގައެވެ. އަދި ލީގު ތާވަލުގެ ތިން ވަނައިގައި ގްރީން ސްޓްރީޓްސް އޮތީ 17 ޕޮއިންޓާއެކުގައެވެ.