އެޖެންސީތައް މެދުވެރިކޮށް ރާއްޖެއިން ބޭރުންގެންނަ ޞިއްޙީ ޚިދުމަތްތެރިން ރެކްރޫޓު ކުރާނެ އުޞޫލެއް އެއްމަސްދުވަހުގެ ތެރޭގައި ކޮމިޓީއަށް ހުށަޙަޅާނެކަމަށް މިނިސްޓްރީ އޮފް ހެލްތުން ބުނެފިއެވެ.

ހޯމަ ދުވަހު ބޭއްވި ރައްޔިތުންގެ މަޖިލީހުގެ އިޖްތިމާޢީ ކޮމެޓީގައި ހެލްތް މިނިސްޓްރީގެ އެސިސްޓެންޓް ޑިރެކްޓަރ އަނީޤާ އިބްރާހިމް ވިދާޅުވީ އެޖެންސީންތައް މެދުވެރިކޮށް މީހުން ރެކްރޫޓް ކުރުމުގައި ވަކިއުޞޫލެއް ކަނޑައަޅާފައި ނުވާކަމަށެވެ. އެހެންކަމުން މިހާރު ޑޮކްޓަރުންނާއި އެހެނިހެން ޞިއްޙީ ފަންނީ ޚިދްމަތްތެރިން ރާއްޖެ ގެންނަނީ ރަޖިސްޓްރީކޮށްފައިވާ އޭޖެންސީތައް ދަފްތަރުކޮށްގެން އެ އެޖެންސީތަކުގެ އެހީގައި ކަމަށެވެ.

އޭޖެންސީތައް މެދުވެރިކޮށް ޑޮކްޓަރުންނާއި އެހެނިހެން ފަންނީ މުވައްޒަފުން ރާއްޖެގެންނަން މިހާރު ޢަމަލުކުރަމުންދާ ނިޒާމު ހަރުދަނާ ކުރުމުގެ މުހިންމުކަން ފާހަގަކުރައްވާ އަނީގާ ވިދާޅުވީ، ކުރިއަށް އޮތް މަސްދުވަހުގެ ތެރޭގައި އުސޫލު ނިންމައި ކޮމެޓީއަށް ހުށަހަޅާނެ ކަމަށް މިނިސްޓްރީން ބުނެފިއެވެ.

އަނީޤާ ވިދާޅުވީ މުއައްޒަފުން އައްޔަން ކުރުމުގައި މިހާރުވެސް އަމަލުކުރަމުންދަނީ ސިވިލްސަރވިސް މިންގަނޑަށް ކަމަށެވެ. އެހެން ނަމަވެސް ތަފާތު ގިނަ ގޮންޖެހުންތައް ކުރިމަތިވާކަން އޭނާ ފާހަގަކުރެއްވިއެވެ.

މިކަން ޙައްލުކުރުމުގެ ގޮތުން މިހާރު މަސައްކަތްކުރަނީ އެޖެންސީތައް މެދުވެރިކޮށް ރާއްޖެއިން ބޭރުންގެންނަ ޞިއްޙީ ޚިދުމަތްތެރިން ރެކްރޫޓު ކުރާނެ އުޞޫލެއް ކަނޑައެޅުމުގެ މަސައްކަތްކުރަމުންދާކަމަށް އޭނާ ވިދާޅުވިއެވެ. ހެލްތު މިނިސްޓްރީން މިހާރު އެ އުސޫލު ޑްރާފްޓް ކުރަމުންދާކަން ފާހަގަކުރައްވާ އަނީގާ ވިދާޅުވީ، އެ އުސޫލު އެކުލަވާލާ ތަންފީޒުކުރަން ފެށުމުން ޑޮކްޓަރުންނާއި ޞިއްޙި ފަންނުވެރިން ރެކްރޫޓް ކުރުމުގެތެރެއިން ފެންމަތިވާ އަދު ތުހުމަތު ކުރެވޭ ކޮރަޕްޝަނުގެ ކަންކަމަށް ހައްލުލިބޭނެ ކަމަށެވެ.

މީގެ އިތުރުން އަނީޤާ ވިދާޅުވީ ރާއްޖެ އަންނަ ހެލްތް ޕްރޮފެޝަނަލުންނާއި، ޑޮކްޓަރުންނާ ހެލްތް މިނިސްޓްރީން ފޭސްޓު ފޭސް އިންޓަވިއު ކުރާނެ ކަމަށާއި، އޭނާ ކުރަން ބޭނުންވާ ސުވާލުތައް ކުރުމުގެ ފުރުޞަތުތައް ލިބޭނެ ކަމަށެވެ. އަދި މިއިންޓަވިއުގެ ތެރެއިން އެމީހާގެ ފެންވަރު ވަޒަން ކުރެވިގެންދާނެ ކަމަށް އޭނާ ވިދާޅުވިއެވެ.

އަނީޤާ ވިދާޅުވީ ހެލްތް ޕްރޮފެޝަނަލުން ގެންނަ 10 ވަރަކަށް އެޖެންސީ ހަރަކާތްތެރިވާއިރު، އެއްބަޔަކު ގެންނަނީ މެޑިކަލް އޮފިސަރުން ކަމަށެވެ. އަދި އަނެއް ބަޔަކު ލެބް ޓެކްނީޝަރުން ގެންނައިރު، އަނެއްބަޔަކު ޑޮކްޓަރުން ގެނެއެވެ. ނަމަވެސް މިއެޖެންސީތައް އަނެއް އެޖެންސީއާ މައްސަލަ ބޮޑުކަން އޭނާ ފާހަގަކުރެއްވިއެވެ.