ޝައިޚް ކަމާލް އިންޓަނޭޝަނަލް ކްލަބް ކަޕްގައި ކުޅުނު ފުރަތަމަ މެޗުން ޗިޓަގޮންގ އަބަހާނީ އަތުން ރާއްޖޭގެ ޓީސީ ސްޕޯޓްސް ކްލަބް ބަލިވެއްޖެއެވެ.

ހޮނިހިރު ދުވަހު ގްރޫޕް ބީގައި ހިމެނޭ ޗިޓަގޮންގއާ ވާދަކޮށް ޓީސީ ބަލިވީ 1-4 ގެ ނަތީޖާއަކުންނެވެ.

ބަންގްލަދޭޝްގެ ޗިޓަގޮންގގައި ކުޅުނު މި މެޗު ފެށިގެން 8 ވަނަ މިނެޓުގައި ޗިޓަގޮންގއިން ވަނީ މެޗުގެ ލީޑު ނަގާފައެވެ. މި ލަނޑު ކާމިޔާބުކުރީ މެތިއުއެވެ. އޭގެ ދެ މިނެޓު ފަހުން ޔާސީފް އަރަފާތު ވަނީ ޗިޓަގޮންގއަށް ލީޑު ފުޅާކޮށްދީފައެވެ.

ފުރަތަމަ ހާފް ނިމުމުގެ ކުރިން ޗިޓަގޮންގއިން ވަނީ ތިންވަނަ ލަނޑު ޖަހާފައެވެ. މި ލަނޑު އެޓީމަށް ކާމިޔާބުކޮށްދިނީ ލޫކާ ރޮޓްކޮވިކްއެވެ.

ދެވަނަ ހާފް ފެށިގެން ޗިޓަގޮންގެ ހަތަރުވަނަ ލަނޑު މެތިއު ކާމިޔާބުކުރިއިރު، މެޗު ނިމުމުގެ ކުރިން ޓީސީގެ ލަނޑު ކާމިޔާބުކުރީ އިސްމާއިލް އީސާ (މެސީ) އެވެ.

މުބާރާތުގެ ގްރޫޕް ސްޓޭޖުގައި ޓީސީ ކުޅޭ ދެވަނަ މެޗުގައި އަންގާރަ ދުވަހު އިންޑިއާގެ މޯހަން ބަގާންއާ ދެކޮޅަށް ކުޅޭއިރު، ފަހު މެޗުގައި ބުރާސްފަތި ދުވަހު ނިކުންނާނީ ލާއޯސްގެ ޔަންގް އެލެފެންޓާ ދެކޮޅަށެވެ.

މުބާރާތުގައި ދެ ގްރޫޕް ހިމެނޭއިރު، ސެމީއަށް ދަތުރުކުރާނީ އެންމެ ގިނަ ޕޮއިންޓް ހޯދާ ދެޓީމެވެ. މި މުބާރާތުގެ އެންމެ ފަހުގެ ޗެމްޕިއަނުންނަކީ ޓީސީއެވެ.