ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އުރުގުއޭގެ ފޯވަރޑް އެޑިންސަން ކަވާނީ ހޯދުމަށް އެތުލެޓިކޯ މެޑްރިޑުންވެސް މަސައްކަތް ފަށައިފިއެވެ.

ފްރާންސްގެ ނޫހަކުން ބުނީ، ކަވާނީ ހޯދުމުގެ ރޭހުގައި އެތުލެޓިކޯއިންވެސް ބައިވެރިވެފައިވާ ކަމަށާއި، އެ ކްލަބުން ބޭނުންވަނީ ކުރިޔަށް އޮތް ޖެނުއަރީ ޓްރާންސްފަރއަށް އޭނާ ގެނައުމަށް ކަމަށެވެ.

އުމުރުން 32 ޕީއެސްޖީއާއެކު ކަވާނީ ހަދާފައިވާ އެއްބަސްވުން 2020 ވަނަ އަހަރު ހަމަވާއިރު، އޭނާ ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި އިޓަލީ އަދި ސްޕެއިންގެ ކްލަބްތައް ހިމެނެއެވެ.

ނަމަވެސް ދާދި ފަހުން އިޓަލީގެ ނޫހަކަށް ދިން އިންޓަވިއުއެއްގައި ކަވާނީ ބުނީ، މިދިޔަ ސީޒަނުގައި ވެސް ބުނިގޮތަށް އެއްބަސްވުން ނިމެންދެން ކްލަބުގައި މަޑުކުރާނެ ކަމަށާއި، އެއީ ވައުދުވި ގޮތް ކަމަށެވެ.

ނަޕޯލީ ދޫކޮށްލުމަށް ފަހު 2013 ވަނަ އަހަރުގެ ޖުލައި މަހު ކަވާނީ ޕީއެސްޖީއަށް ބަދަލުވީ 64 މިލިއަން ޔޫރޯގެ އަގަކަށް ފަސް އަހަރަށެވެ. އެ އަށް ފަހު އޭނާ އެއްބަސްވުން އާކޮށްފައެއް ނުވެއެވެ. އޭނާ ވަނީ އެޓީމަށް މިހާތަނަށް ކުޅުނު 284 މެޗުގައި 195 ލަނޑު ކާމިޔާބު ކޮށްފައެވެ.

ކަވާނީ ވަނީ ޕީއެސްޖީއާ އެކު ފަސް ލީގު ތަށި، ފަސް ލީގް ކަޕް އަދި ތިން ސުޕަރ ކަޕް ކާމިޔާބު ކޮށްފައެވެ. އަދި އޭނާ ވަނީ ފްރާންސްގެ އެންމެ މޮޅު ބިދޭސީ ކުޅުންތެރިޔާގެ މަގާމު 2017 ވަނަ އަހަރު ހޯދުމުގެ އިތުރުން ފްރެންޗް ލީގުގެ އެންމެ މޮޅު ކުޅުންތެރިޔާގެ މަގާމު ހޯދާފައެވެ.

ނަޕޯލީއާ އެކު ކޮޕާ އިޓާލިއާ ކާމިޔާބު ކޮށްފައިވާ ކަވާނީ ވަނީ ތިން ސީޒަނެއްގެ މަތިން "ޓީމް އޮފް ދަ ޔިއަރ" ގައި ހިމެނުމުގެ އިތުރުން 2010 ވަނަ އަހަރު އެ ލީގުގެ ފޭން އެވޯޑްވެސް ހޯދާފައެވެ.

އުރުގުއޭއާއެކު 2011 ވަނަ އަހަރު ކޮޕާ އެމެރިކާ ކާމިޔާބު ކޮށްފައިވާ ކަވާނީ ވަނީ އެ ޓީމަށް ކުޅުނު 114 މެޗުގައި 48 ލަނޑު ކާމިޔާބު ކޮށްފައެވެ.