ބޭރު ގައުމެއްގެ ހިމާޔަތް ހޯދާފައިވާ ފަރާތްތަކަށް ރިޔާސީ އިންތިޚާބުގައި ވާދަ ނުކުރެވޭ ގޮތަށް ގާނޫނަށް ގެނައި ބަދަލު އުވާލުމަށް އިސްލާހު ހުށަހެޅުނު ބިލް ފާސްކޮށްފި
މި ބިލް ދިރާސާކޮށްފައިވަނީ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީއިން
މަޖިލީހުގެ ރިޔާސަތު
ބޭރު ގައުމެއްގެ ހިމާޔަތް ހޯދާފައިވާ ފަރާތްތަކަށް ރިޔާސީ އިންތިޚާބުގައި ވާދަ ނުކުރެވޭ ގޮތަށް ރިޔާސީ އިންތިހާބުގެ ގާނޫނަށް ގެނައި ބަދަލު އުވާލުމަށް އިސްލާހު ހުށަހެޅުނު ބިލް މަޖިލީހުން ފާސްކޮށްފިއެވެ.
ބިލް ސަރުކާރުގެ ފަރާތުން ހުށަހެޅުއްވީ މައްޗަންގޯޅި ދެކުނު ދާއިރާގެ މެމްބަރު އަހްމަދު ހައިތަމްއެވެ.
މި ބިލް ދިރާސާކޮށްފައިވަނީ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީއިންނެވެ. އެ ކޮމެޓީއިން އެކުލަވާލި ރިޕޯޓަށް ބުދަ ދުވަހުގެ މަޖިލީހުގެ ޖަލްސާގައި ވޯޓަށް އަހާފައިވާއިރު މި ރިޕޯޓު ފާސްކުރުމަށް ވޯޓު ދެއްވާފައިވަނީ 63 މެމްބަރުންނެވެ.
ރިޔާސީ އިންތިޙާބުގެ ބިލަށް އިސްލާހު ގެނައުމުގެ ބިލް ސަރުކާރުން މަޖިލީހަށް ފޮނުވީ އޮގަސްޓު މަހުގެ 18 ވަނަ ދުވަހުއެވެ.
ރިޔާސީ އިންތިޚާބުގެ ޤާނޫނަށް ގެންނަން ހުށަހަޅާފައިވާ އިސްލާހަކީ ރިޔާސީ އިންތިޚާބަށް ކުރިމަތިލާ މީހަކު އެއްވެސް އިރެއްގައި ބޭރު ޤައުމެއްގެ ރައްޔިތަކު ކަމުގައި ވެފައިވާނަމަ، ނުވަތަ ބޭރު ޤައުމެއްގެ ޙިމާޔަތް ހޯދާފައިވާނަމަ އެފަދަ މީހަކަށް ރިޔާސީ އިންތިޚާބަށް ކުރިމަތިލެވޭނީ އެމީހަކު ބޭރު ރައްޔިތުކަން ނުވަތަ ބޭރު ޤައުމެއްގެ ރައްކާތެރިކަން ދޫކޮށްލިތާ މަދުވެގެން ދިހަ އަހަރު ފަހުން ކަމަށް އޮތް ބައި އުނި ކުރުމަށެވެ.
ވަކި މީހަކަށް ނުވަތަ ބަޔަކަށް ގެއްލުމެއް ދިނުމަށް ނުވަތަ މަންފާއެއް ހޯދައިދިނުމަށް ބަދަލުކޮށް ނުވަތަ ފާސްކޮށްފައިވާ ޤާނޫނުތަކާއި ޤަވާޢިދުތައް މުރާޖަޢާކުރުމަކީ މިސަރުކާރުގެ ވަޢުދެކެވެ.
