މިހާރު ހުރި އަގުތަކުގައި ޓެކްސީ ކޮށްގެން ގެއްލުމެއް ނުވާނެ: ޓްރާންސްޕޯޓް މިނިސްޓްރީ

މާލޭ ސަރަހައްދުގައި ޓެކްސީ ކުރުމަށް ކަނޑައަޅާފައިވާ އަގުތަކުން، ޓެކްސީ ކުރާ ފަރާތްތަކަށް ގެއްލުމެއް ނުވާނެ ކަމަށް ޓްރާންސްޕޯޓް މިނިސްޓްރީން ބުނެފިއެވެ.

ރައްޔިތުންގެ މަޖިލީހުގެ ގައުމީ ތަރައްގީ އަދި ތަރިކައިގެ ކޮމިޓީގައި ވާހަކަފުޅު ދައްކަވަމުން، ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ އަލީ ޝިމާޒް ވިދާޅުވީ، ޓެކްސީ ކުރާ ފަރާތްތަކަށް ކުރިން ލިބުނު އާމްދަނީއަށް ވުރެ މަދު އަދަދެއް މިހާރު ލިބޭނެއެކޭ ނުދަންނާވާނެ ކަމަށެވެ.

ޝިމާޒް ވިދާޅުވި ގޮތުގައި، ޓެކްސީ ކުރުމުގެ އަގުތައް ކަނޑައަޅާފައިވަނީ މީޓަރު ހަރުކޮށްގެން ޓެކްސީ ކުރުމުން، ކިލޯ މީޓަރަކަށް ޖެހޭ ރޭޝިއޯއަށް ބަލާފައެވެ. އަދި ޓެކްސީ ކުރާ ފަރާތްތަކުން ބޭނުންކުރާ އެޕަކީ ވެސް މީޓަރ ބޭސިސްއަށް ބެލުމަށް ފަހުގައި ތައްޔާރުކޮށްފައިވާ އެޕެއް ކަމަށް ޝިމާޒް ވިދާޅުވިއެވެ.

ޓްރާންސްޕޯޓް މިނިސްޓްރީން ކުރިން ނިންމާފައި އޮތީ ޓެކްސީތަކުގައި މީޓަރު ހަރުކުރާ ގޮތަށް ކަމަށް ބުނެ ޓެކްސީ ޑްރައިވަރުން ޖަމިއްޔާއިން ދައްކާ ވާހަކަތައް މިނިސްޓްރީން ވަނީ ދޮގުކޮށްފައެވެ. އެގޮތުން ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވީ، އެއްވެސް އިރެއްގައި މީޓަރު އެކަނި ބޭނުންކުރާ ގޮތަކަށް ޓެކްސީ ޑްރައިވަރުންނާ އެކު އެއްބަސްވެވިފައި ނުވާ ކަމަށެވެ.

ނަހުލާ ވިދާޅުވީ، ދެކެވުނީ އެޕް ނުވަތަ މީޓަރު ހަރުކުރާ ވާހަކަ ކަމަށާއި، މިކަމުގައި ގޮތެއް ނިންމުމުގައި ބަލާފައި ވަނީ ރައްޔިތުންނަށާއި އަދި ޓެކްސީ ޑްރައިވަރުންނަށް ވެސް އެންމެ ލުއި ފަސޭހަ ގޮތް ބެލުމަށް ފަހުގައި ކަމަށެވެ.

އެޕަކަށް ދިއުމަށް ނިންމާފައިވަނީ، ކަމާބެހޭ ވުޒާރާތަކާއި ރައީސް އޮފީހާއި މާލެ ސިޓީ ކައުންސިލް ހިމެނޭ ކޮމިޓީއެއްގައި މަޝްވަރާކުރުމަށްފަހުގައެވެ. މިނިސްޓަރ ނަހުލާ ވެސް ވަނީ، އެޕްލިކޭޝަން ބޭނުންކުރުމާ ގުޅިގެން އެއްވެސް ފަރާތަކަށް ގެއްލުމެއް ވެގެން ނުވާނެ ކަމަށް ވިދާޅުވެފައެވެ.

މިނިސްޓަރ ނަހުލާ ވިދާޅުވީ، ރައްޔިތުންނަށް ލުއި ފަސޭހައީ މީޓަރު ކަމުގައި ވަނީނަމަ، އެކަން އެގޮތައް ކުރައްވަން ތައްޔާރަށް ހުންނެވި ކަމަށެވެ.

މާލޭ ސަރަހައްދުގައި ޓެކްސީ ކުރެވޭނެ އަގުތައް ޓްރާންސްޕޯޓް މިނިސްޓްރީން އާންމުކުރުމާ އެކު، ބައެއް ޑްރައިވަރުންނާއި، ޑްރައިވަރުންގެ ޖަމިއްޔާއިން ވެސް ވަނީ ކަންބޮޑުވުން ފާޅުކޮށްފައެވެ. އަދި އެ އަގުތައް އާންމުކުރުމާ އެކު ބައެއް ޑްރައިވަރުން ވަނީ މުޒާހަރާ ވެސް ކޮށްފައެވެ.