އީސީއާއި، އެންއައިސީގެ މެމްބަރުކަމަށް ކުރިމަތިލާފައިވާ ފަރާތްތަކާއި އިންޓަވިއުކުރުން އަންނަ އަންގާރަ އަދި ބުދަ ދުވަހު
14 އޮކްޓޯބަރު 2019 | ހޯމަ 13:28އީސީގެ މެމްބަރުކަމަށް އެކޮމިޝަނުގެ ކުރީގެ ރައީސް ފުއާދުއާއި މިހާރުގެ ނާއިބު ރައީސް އަމްޖަދު ހިމެނޭ
އީސީގެ ނާއިބު ރައީސް އަމްޖަމް، އޭނާ ވަނީ ދެވަނަ ދައުރަކަށް ކުރިމަތި ލައްވާފަ--
އިލެކްޝަންސް ކޮމިޝަނާއި ނޭޝަނަލް އިންޓެގްރިޓީ ކޮމިޝަން (އެންއައިސީ)ގެ މެމްބަރު ކަމަށް ކުރިމަތިލާފައިވާ ބޭފުޅުންނާ އިންޓަވިއު ކުރުމަށް އަންނަ ހަފްތާގެ އަންގާރަ ދުވަހާއި ދުވަހު ކުރިއަށް ގެންދިއުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމެޓީން ނިންމައިފި އެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމެޓީން ނިންމާފައިވަނީ މިމަހުގެ 22 ވާ އަންގާރަ ދުވަހު އިލެކްޝަންސް ކޮމިޝަނަށް ކުރިމަތިލައްވާފައިވާ ބޭފުޅުންނާ އިންޓަވިއު ކުރުމަށްފަހު 23 ވާ ބުދަ ދުވަހު އެންއައިސީއަށް ކުރިމަތިލާފައިވާ ބޭފުޅުންނާ އިންޓަވިއު ކުރުމަށެވެ.
އިލެކްޝަންސް ކޮމިޝަނުން މެމްބަރުކަމަށް ރައީސް އޮފީހުން އިއުލާން ކޮށްފައިވަނީ އެކޮމިޝަނުގެ ނާއިބު ރައީސް އަމްޖަދު މުސްތަފާގެ ދައުރު އަންނަ މަހުގެ ހަތަރު ވަނަ ދުވަހު ހަމަވާތީއެވެ.
ރައީސް އޮފީހުގެ އެއިއުލާނާއި ގުޅިގެން މުސްތަފާ ވެސް ވަނީ ދެ ވަނަ ދައުރަކަށް ކުރިމަތިލައްވާފަ އެވެ.
އީސީގެ މެމްބަރުކަމަށް 10 ބޭފުޅުން ކުރިމަތި ލައްވާފައިވާއިރު އޭގެ ތެރެއިން ރައީސަށް ފެނިވަޑައިގަންނަވާ ހަތަރު ނަމެއް ރައްޔިތުންގެ މަޖިލީހުން މިމަހު ދެވަނަ ދުވަހު ބޭއްވި ޖަލްސާގައި ވަނީ އިއްވާފައެވެ. އޭގެ ތެރޭގައި އެންމެ ފުރަތަމަ ނަމެއްގެ ގޮތުގައި ހިމަނުއްވާފައިވަނީ އީސީގެ ކުރީގެ ރައީސް ފުއާދު ތައުފީގުގެ ނަމެވެ. ދެވަނަ ނަމަކަށް އީސީގެ މިހާރުގެ ނައިބު ރައީސް އަމްޖަދު މުސްތަފާގެ ނަން ވަނީ ހިމަނުއްވާފައެވެ.
ރައްޔިތުންގެ މަޖިލީހުން ވަނީ އެ ހަތަރު ބޭފުޅުންނާ ގުޅޭގޮތުން އާންމުންގެ ޝަކުވާއެއް އޮތްނަމަ މި މަހުގެ 15 ވަނަ ދުވަހުގެ މެންދުރު 2:00 ގެ ކުރިން އެފަރާތެއްގެ ފުރިހަމަ ނަމާއި، ދާއިމީ އެޑްރެސް އަދި ގުޅޭނެ ފޯނު ނަންބަރު އެނގޭ ގޮތަށް ކޮމިޓީގެ މެއިލް އަށް ނުވަތަ ރައްޔިތުންގެ މަޖިލީހުގެ އިދާރާއަށް ލިޔުމުން ފޮނުއްވައި ދިނުމަށެވެ.
އެންއައިސީގެ މެމްބަރު ކަމަށް ކުރިމަތިލުމަށް ހުޅުވާލާފައިވަނީ އެ ކޮމިޝަންގެ މެމްބަރުކަމުގައި ކުރިން ހުންނެވި މުހައްމަދު ފަރުހާދު އިސްތިއުފާ ދެއްވުމާ ގުޅިގެންނެވެ.
ނޭޝަނަލް އިންޓެގްރިޓީ ކޮމިޝަން އުފައްދާފައި ވަނީ 2016 ވަނަ އަހަރެއެވެ. އެއީ ފުލުހުންގެ ގާނޫނުގެ ދަށުން އުފައްދާފައިވާ ޕޮލިސް އިންޓެގްރިޓީ ކޮމިޝަނާއި، ކަސްޓަމްސްގެ ޤާނޫނުގެ ދަށުން އުފައްދާފައިވާ ކަސްޓަމްސް އިންޓެގްރިޓީ ކޮމިޝަން އުވާލުމަށް ފަހު އުފައްދާފައިވާ ކޮމިޝަނެކެއެވެ.
