އޭސީސީ އަށް ހާޒިރުވުމަށް ފާރިސް އަށް އަންގައިފި

އެންޓި ކޮރަޕްޝަން ކޮމިޝަން(އޭސީސީ) އިން ތަހުގީގު ކުރަމުންދާ މައްސަލައަކާ ގުޅިގެން ދިއްގަރު ދާއިރާގެ މެންބަރު އަދި ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫން އެ ކޮމިޝަނަށް ހާޒިރުވުމަށް އަންގައިފި އެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި އޭސީސީ އަށް ހާޒިރުވުމަށް ފާރިސް އަށް އަންގާފައިވަނީ އަންގާރަ ދުވަހުގެ ވަގުތަކަށެވެ.

ފާރިސް ކުރެއްވި ޓްވީޓެއްގައި ވިދާޅުވީ އޭސީސީ އަށް ހާޒިރުވާން އަންގާފައި މިވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ހުށަހަޅާފައިވާ މައްސަލައިގެ ވޯޓުގެ ކުރިން ޖެއްސުންކޮށް، ސިޔާސީ މަގުސަދެއް ހާސިލްކުރުމަށް ކަމަށެވެ.

އޭސީސީ އަށް ހާޒިރުވާން އެންގުުމުގެ ކުރިން ވެސް ފާރިސް ވަނީ، މަސީހުގެ އިތުބާރުގެ މައްސަލައާ ގުޅިގެން މެންބަރުންނަށް އެކި ގޮތްގޮތުން ފިއްތުންތައް ކުރިމަތިކުރުވައި، ބިރުދައްކާނެ ކަމަށް ވިދާޅުވެފަ އެވެ. ނަމަވެސް، ޖަލަށް ދާން ޖެހުނު ނަމަވެސް، އިސްލާހީ މަސައްކަތުގައި ސާބިތުވެ ހުންނަވާނެ ކަމަށް ފާރިސް ވިދާޅުވެފައިވެ އެވެ.

މިކަމާ ގުޅޭ ގޮތުން އޭސީސީގެ މީޑިއާ އޮފިޝަލް ހަސަން މަނިކު ވިދާޅުވީ ހާޒިރުކުރާ މީހުންނާ ގުޅޭ އެއްވެސް މައުލޫމާތެއް އަދި ހާޒިރުކުރާ ގަޑި ވެސް އެ ކޮމިޝަނުން ހާމަނުކުރާ ކަމަށެވެ.

އޭސީސީ އަށް ހާޒިރުވުމަށް ފާރިސް އަށް އަންގާފައިވަނީ ތަހުގީގުކުރާ ކޮން މައްސަލައަކާ ގުޅިގެން ކަމެއް ވެސް އެ ކޮމިޝަނުން ނުބުންޏެވެ.

އޭސީސީ އަށް ފާރިސް ހާޒިރުކުރާއިރު، 26 މެންބަރުންގެ ސޮޔާއެކު ހުށަހެޅި މަސީހުގެ އިތުބާރުގެ މައްސަލައިގައި އެންމެ ކުރީސަފުގައި މަސައްކަތް ކުރައްވަމުން ގެންދަވަނީ އޭނާ އެވެ. އެގޮތުން، ރާއްޖެޓީވީގެ ފަލަސުރުޚީ ޕްރޮގްރާމުގައި ހޮނިހިރުގެ ދުވަހުގެ ރޭ ފާރިސް ވަނީ މަސީހުގެ އިތުބާރު ނެތް ކަމަށް ފާސްކުރެވޭ ވަރަށް މެންބަރުން ހަމަވެފައިވާ ކަމަށް ވިދާޅުވެފަ އެވެ.

ޕީޕީއެމް ދެފަޅިވެ، ރައީސް މައުމޫނާއި ރައީސް އަބްދުﷲ ޔާމީނަށް ތާއީދުކުރައްވާ ބޭފުޅުންގެ ދެ ފެކްޝަނެއް އުފެދިފައިވާއިރު، ސަރުކާރުން ރައީސް މައުމޫނަށް އެކި ގޮތްގޮތުން ޖެއްސުންކުރަމުންދާ ކަމަށް އެމަނިކުފާނުގެ ފެކްޝަނަށް ނިސްބަތްވާ ބޭފުޅުން ގެންދަވަނީ ވިދާޅުވަމުންނެވެ.

އެގޮތުން، ރައީސް މައުމޫންގެ އިނާޔަތްތަކަށް ކުޑަކޮށް، އެމަނިކުފާނަށް އެމްއެންޑީއެފް އިން ދެމުން ދިޔަ ސެކިއުރިޓީ ވެސް ކުޑަކޮށްފައިވާ ކަމަށް އެ ބޭފުޅުން ވިދާޅުވެ އެވެ.