ޔުއެފާ އެސިސްޓް މުބާރާތުން ރާއްޖެއަށް ރަނގަޅު ކާމިޔާބެއް ލިބޭނެ ކަމުގެ އުންމީދު ބޮޑު: ނިޒާމްބެ

ބަންގްލަދޭޝްގައި 16 އަހަރުން ދަށުގެ ޓީމުތަކަށް އަމާޒުކޮށްގެން އަންނަ ބުދަ ދުވަހު ފަށާ "ޔުއެފާ އެސިސްޓް ޑިވެލޮޕްމެންޓް ޓޯނަމަންޓް" އިން ރާއްޖެއަށް ރަނގަޅު ކާމިޔާބެއް ލިބޭނެ ކަމުގެ އުންމީދު ބޮޑު ކަމަށް ގައުމީ 16 އަހަރުން ދަށުގެ ކޯޗު މުހައްމަދު ނިޒާމް (ނިޒާމްބެ) ބުނެފިއެވެ.

ރާއްޖެއެމްވީއަށް މައުލޫމާތު ދެމުން ނިޒާމްބެ ބުނީ، ނިމިދިޔަ އޭއެފްސީ ކޮލިފައިން އާއި ގަތަރުގައި ކުރިޔަށްދިޔަ ފޯ ނޭޝަންސް ޓޯނަމަންޓަށްފަހު ޓީމަށް ކުރިއެރުންތަކެއް އައިސްފައިވާ ކަމަށާއި، ބަންގްލަދޭޝްގައި ބާއްވާ މުބާރާތުން ރަނގަޅު ކާމިޔާބެއް ލިބޭނެ ކަމުގެ އުންމީދު އެބައޮތް ކަމަށެވެ.

އެގޮތުން ނިޒާމްބެ ބުނީ، އޭއެފްސީ ކޮލިފައިންއަށްފަހު މަދު ދުވަސްކޮޅު ތެރޭގައި މުބާރާތަށް ރަނގަޅަށް ޓީމަށް ތައްޔާރުވެވިފައިވާ ކަމަށާއި، ޓީމަށް ނެގި އާ ކުޅުންތެރިންވެސް ޓީމަށް ހޭނިފައިވާ ކަމަށެވެ.

މި މުބާރާތުގައި ރާއްޖޭގެ އިތުރުން ކެމްބޯޑިއާ އާއި ބަންގްލަދޭޝް އަދި ފެރޯ އައިލޭންޑްސް ވާދަކުރާއިރު، ނިޒާމްބެ ބުނީ ރާއްޖެއަށް މުބާރާތުގައި އެންމެ ބޮޑު ޗެލެންޖަކަށް ވާނީ ފެރޯ އައިލޭންޑްސް ކަމަށާއި، އެޓީމަކީ ވަރަށް އޯގަނައިޒް އަދި ޓެކްނިކަލީ ގޮތުން ބަލާއިރު ވަރުގަދަ ޓީމެއް ކަމަށްވެސް ނިޒާމްބެ ބުނިއެވެ.

ނަމަވެސް ނިޒާމްބެ ބުނީ، އައްޑޫގައި ކުރިޔަށްދިޔަ ޔުއެފާ ފޯ ނޭޝަންސް ޓޯނަމަންޓްގައި ވާދަކުރި ލެޓްވިއާ އަށްވުރެ ފެރޯ އައިލޭންޑްސް ވަރުގަދަވާނެ ކަމަށް ނުބެލެވޭ ކަމަށާއި، އެޓީމާ ދެކޮޅަށް ރާއްޖެއިން ރަނގަޅު ފައިޓެއް ދޭނެ ކަމަށެވެ.

މި މުބާރާތް ކުރިޔަށްދާނީ ބުދަ ދުވަހުން ފެށިގެން މި މަހުގެ 20 ވަނަ ދުވަހުގެ ނިޔަލަށް ޑާކާގައެވެ. މުބާރާތަށް ރާއްޖެ ފުރާނީ އާދީއްތަ ދުވަހުއެވެ.