ބީއެމްއެލް ކޮމިއުނިޓީ ފަންޑުގެ އެހީގެ ދަށުން އިތުރު 5 ރަށަކަށް އެހީތެރިކަން ފޯރުކޮށްދީފި
އެހީތެރިކަން ފޯރުކޮށްދީފައިވަނީ ބޭންކް ކޮމިނިއުޓީ ފަންޑުގެ ތިންވަނަ ކުއާޓަރގައި ހުށަހެޅުނު ޕްރޮޕޯސަލްތަކުގެ ތެރެއިން އެންމެ ފާހަގަ ކޮށްލެވޭ 5 ޕްރޮޖެކްޓް ހޮވުމަށްފަހު
\'އަހަރެންގެ ބޭންކް ކޮމިއުނިޓީ ފަންޑު\' އިފްތިތާހްކޮށްފައިވަނީ ދިވެހިންނާއި ދިވެހި މުޖުތަމައުތަކާ އޮތް ގުޅުން ބަދަހި ކުރުމަށް
ބޭންކް އޮފް މޯލްޑިވްސް (ބީއެމްއެލް) ގެ ކޮމިއުނިޓީ ފަންޑުގެ އެހީގެ ދަށުން އިތުރު 5 ރަށަކަށް އެހީތެރިކަން ފޯރުކޮށްދީފިއެވެ.
އަމިއްލަ ފަރުދުންނާއި ހިލޭސާބަހަށް މަސައްކަތްކުރާ ޖަމިއްޔާތަކުން ދެމެހެއްޓެނިވި ގޮތެއްގައި ރަށްރަށުގައި ހިންގުމަށް ބޭނުންވާ މަޝްރޫޢޫތަކަށް އެހީވުމުގެ ގޮތުން ބޭންކް އޮފް މޯލްޑިވަސް އިން ތަޢާރަފުކުރި "އަހަރެންގެ ބޭންކް ކޮމިނިއުޓީ ފަންޑު" ގެ ތިންވަނަ ކުއާޓަރގައި ހުށަހެޅުނު ޕްރޮޕޯސަލްތަކުގެ ތެރެއިން އެންމެ ފާހަގަ ކޮށްލެވޭ 5 މަޝްރޫޢެއް އެ ކުންފުނިން ވަނީ ހޮވާފައެވެ.
އެގޮތުން އެހީތެރިކަން ފޯރުކޮށްދީފައިވަނީ ނ. ހޮޅުދޫ ބަނދަރު ޞަރަޙައްދުގައި މަސް ކަނޑާ ތަނެއް ހެދުމަށާއި، ހދ. ކުޅުދުއްފުށީގައި ކުޑަކުދިންގެ ޕާކެއް ތަރައްޤީކުރުމަށާއި، ރ. ހުޅުދުއްފާރުގައި އަތިރިމަތީ ޞަރަޙައްދުގައި ހިތްފަސޭހަ މައިޒާނެއް ތަރައްޤީކުރުމަށާއި، ހއ. ކެލާ ސްކޫލު ކުރިމަތީގައި ދަރިވަރުންނާއި ބެލެނިވެރިން ބޭނުންކުރުމަށް ހިޔާވާ ތަނެއް ހެދުމުގެ އިތުރުން ތ. ކަނޑޫދޫގެ ތުނޑީކޮޅުގައި ޕިކްނިކް ޞަރަޙައްދެއް ޤާއިމުކުރުމަށެވެ.
ބީއެމްއެލްގެ މެނޭޖަރ ޕަބްލިކް ރިލޭޝަންސް މުޙައްމަދު ސަޢީދު ވިދާޅުވީ ބޭންކުގެ އެންމެ ބޮޑު އެއް ޢަމާޒަކީ ބޭންކަށް ލިބޭ ފައިދާ އަނބުރާ މުޖުތަމަޢަށް ފޯރުކޮށްދިނުން ކަމަށާއި، ކޮމިއުނިޓީ ފަންޑާއެކު ރާއްޖޭގެ އެކި ކަންކޮޅުތަކުގައި ހިންގަމުންދާ މަޝްރޫޢުތަކަށް މާލީ ގޮތުން އެހީތެރިކަން ފޯރުކޮށްދިނުމަށް ކަމަށެވެ. މީގެ ސަބަބުން މުޖުތަމަޢުގެ ކުރިއެރުމަށާއި ލާބައަށް ކުރާ މަސައްކަތް އިތުރުވެގެން ގޮސްފައިވާ ކަން ފާހަގަކުރައްވާ އޭނާ ވިދާޅުވީ، މި ފަންޑުގެ ދަށުން މިހާތަނަށް ދިހަ ރަށެއްގައި މުޖުތަމައަށް ފައިދާކުރަނިވި މަޝްރޫޢޫތަކެއް ހިންގުމަށް އެހީތެރިކަން ފޯރުކޮށްދީފައިވާ ކަމަށެވެ.
'އަހަރެންގެ ބޭންކް ކޮމިއުނިޓީ ފަންޑު' އިފްތިތާޙުކޮށްފައިވަނީ ދިވެހިންނާއި ދިވެހި މުޖުތަމަޢުތަކާ އޮތް ގުޅުން ބަދަހި ކުރުމަށް "އަހަރެންގެ ބޭންކް"ގެ ނަމުގައި މުޅި ރާއްޖެއަށް ޢަމާޒުކޮށްގެން ބޭންކުން ކުރިއަށްގެންދާ ޕްރޮގްރާމުގެ ދަށުންނެވެ. މި ޕްރޮގްރާމުގެ ދަށުން މިއަހަރު ތެރޭ ބީއެމްއެލް އިން ވަނީ ނުކުޅެދުންތެރިކަން ހުންނަ 60 ފަރާތަކަށް މޮޓޮރައިޒްޑް ވީލްޗެއަރ ހަދިޔާކޮށްފައެވެ.
