ރޯޑް ޑިވޮލޮޕްމަންޓް ކޯޕަރޭޝަން (އާރުޑީސީ)ގެ މެނޭޖިން ޑިރެކްޓަރުގެ މަގާމަށް އެމްޑީޕީގެ ގައުމީ މަޖިލިސް މެންބަރު، މޫސާ އަލި މަނިކު (މޫކޭ) އައްޔަންކޮށްފި އެވެ.
މޫކޭ ވިދާޅުވީ ޕްރައިވަޓައިޒޭޝަން ބޯޑުން އޭނާ އެ މަގާމަށް އައްޔަނުކުރިކަން ބުރާސްފަތި ދުވަހު އަންގާފައިވާ ކަމަށެވެ. އަދި އެކުންފުނީގެ ބޯޑަށް އިތުރު މެމްބަރުން އައްޔަނުކުރެއްވިކަން ކަށަވަރުނުވެއެވެ.
ގާނޫނީ ދާއިރާއިން ޑިގްރީ ހާސިލްކޮށްފައިވާ މޫކޭއަކީ އެމްޑީޕީގެ ހަރަކާތުގައި އިސްކޮށް ހަރަކާތްތެރިވާ މީހެކެވެ. އަދި މިދިޔަ އޭޕްރީލް މަހު ބޭއްވި ރައްޔިތުންގެ މަޖިލީހުގެ އިންތިޚާބުގައި ރ. މަޑުއްވަރީ ދާއިރާގެ މަޖިލީސް ގޮނޑިއަށް ވެސް އެމްޑީޕީ ޕްރައިމަރީގައި ވާދަކޮށް ނާކާމިޔާބުވެފަ އެވެ.
އާރުޑީސީއަކީ، ރައީސް އިބްރާހިމް މުހައްމަދު ސޯލިހު މަގު ހެދުމުގެ މަސައްކަތްތައް ކުރުމަށް އުފެއްދާފައިވާ އާ ކުންފުންޏެކެވެ. އާރުޑީސީގެ މަސައްކަތްތަކުގެ ތެރޭގައި ރަށްރަށުގެ މަގުތައް ރަނގަޅު ފެންވަރަށް ހަދައި، ބްރިޖްތައް ތަރައްގީކޮށް އެ ތަންތަން ބެލެހެއްޓުމެވެ. މިކުންފުނި އުފެއްދެވީ އެމްއާރްޑީސީ އުވާލުމާ ގުޅިގެންނެވެ.
