ފެނަކަ އެމްޑީއަކަށް ސައީދު
16 ޑިސެމްބަރު 2018 | އާދީއްތަ 16:38ފެނަކައިގެ އެމްޑީއަކަށް ސައީދު ހަމަޖެއްސެވީ އާދިއްތަ ދުވަހު
ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު
ފެނަކަ ކޯޕަރޭޝަންގެ މެނޭޖިންގް ޑިރެކްޓަރގެ މަގާމަށް ގދ. ވާދޫ، މައިފޫނާ އަހްމަދު ސައީދު މުހައްމަދު ހަމަޖައްސައިފިއެވެ.
ޕްރައިވައިޓޭޒެޝަން އެންޑް ކޯޕަރޭޝަންގެ ރައީސް މުހައްމަދު ނިޒާރު ކުރެއްވި ޓުވީޓެއްގައި ވިދާޅުވީ ސައީދު އެ މަގާމަށް ހަމަޖެއްސީ އާދިއްތަ ދުވަހު ކަމަށެވެ.
ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ މުހައްމަދު ލަމްއާން ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހުވާކުރެއްވުމުގެ ކުރިން އިސްތިއުފާ ދެއްވާފައެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަޤާމަށް ސައީދު އައްޔަންކުރުމާއެކު، ދައުލަތުގެ މުހިންމު ގިނަ ކުންފުނިތަކަށް މެނޭޖިން ޑިރެކްޓަރުން އައްޔަންކުރެވުނީ އެވެ. އެގޮތުން އެސްޓީއޯގެ އެމްޑީއަކަށް ހުސެއިން އަމްރު އަދި ފެން ކުންފުނީގެ އެމްޑީއަކަށް އާދަމް އާޒިމް ހަމަޖައްސާފައިވާއިރު، އެމްޓީސީސީގެ އިސްވެރިޔަކަށް ހަމަޖެއްސެވީ ޝާހު އެވެ. އޭގެއިތުރުން އައިލެންޑް އޭވިއޭޝަންގެ އެމްޑީއަކަށް ރިޒްވީ ހަމަޖައްސަވާފައިވާއިރު، އެމްޕީއެލްއަށްވެސް ވަނީ ބޭފުޅަކު އައްޔަނުކުރައްވާފަ އެވެ.
ދައުލަތުގެ ބޮޑެތި ކުންފުނިތަކުގެ ތެރެއިން އިސް ބޭފުޅަކު ހަމަނުޖައްސަވަނީ އެޗްޑީސީގެ އިތުރުން، ޕަބްލިކް ސާރވިސް މީޑިއާއަށެވެ. އޭގެއިތުރުންވެސް އެހެން ބައެއް ކުންފުނިތަކަށް އިސް ބޭފުޅުން އަދި އައްޔަންކުރައްވާފައެއް ނުވެ އެވެ.
ފެނަކަ އަކީ ރައީސް މުހައްމަދު ވަހީދު ހަސަން މަނިކުގެ ވެރިކަމުގައި ރައީސް ނަޝީދުގެ ސަރުކާރުން އެކުލަވާލި ޔޫޓިލިޓީސް ކުންފުނިތައް އުވާލުމަށްފަހު އެ ހުރިހާ ކުންފުންޏެއް އެއްކޮށް އުފެއްދި ކުންފުންޏެކެވެ. ފެނަކައަކީ ރާއްޖޭގެ ރަށްތަކުގެ ފެނާއި، ނަރުދަމާ އަދި ކަރަންޓްގެ ހިދުމަތްދޭ ދައުލަތުގެ ކުންފުނި އެވެ.
