މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ)ގެ މެނޭޖިން ޑިރެކްޓަރަކަށް އައްޔަންކުރުމަށް ފަހު ވަކިކުރި މުހައްމަދު ޝަފާއު ހަސަން އެމްޑީއަށް ސޮއި ކުރައްވައިފިއެވެ.
މޯލްޑިވްސް އިސްލާމިކް ބޭންކު (އެމްއައިބީ) ހެޑް އޮފް މާކެޓިން އެންޑް ކޯޕަރޭޓް އެފެއާޒްގެ މަގާމުވެސް އަދާކުރައްވާފައިވާ ޝަފާއު އެމްޑީޕީއަށް ސޮއި ކުރީ ބުރާސްފަތި ދުވަހުގެ ރޭ "ހުވަދޫ އަޓިގެޔާ" ނަމުގައި ޖަގަހަ ހުޅުވުމަށް ބޭއްވި ހަފްލާގައެވެ. އެ ހަލްފާގައި ޝަފާއުގެ އިތުރުން ގއ. އަތޮޅު ކައުންސިލްގެ ކުރީގެ ނައިބް ރައީސް އަދި ރައީސް ޔާމީން ސަރުކާރުގެ ކޫންޑޫގެ ރީޖަނަލް މެނޭޖަރ މައްސޫދު އަހުމަދާއި އެނާގެ އަނބިކަނބަލުން މަރިޔަމް ޝިހާބު ވެސް ވަނީ ސޮއިކުރައްވާފައެވެ. އެމްޑީޕީއަށް ސޮއި ކުރުމަށް ފަހު އެ ތިން ބޭފުޅުން ވެސް ފޯމް ހަވާލު ކުރައްވާފައި ވަނީ ގުޅިފައިވާ ސިޔާސީ ޕާޓީގެ ފަރާތުން ރިޔާސީ އިންތިހާބުގައި ވާދަކުރައްވާ އެމްޑީޕީގެ ރިޔާސީ ކެނޑިޑޭޓް އިބްރާހިމް މުހައްމަދު ސޯލިހު (އިބޫ)އާއެވެ.
އެމްއާރުޑީސީގެ މެނޭޖިން ޑިރެކްޓަރުގެ މަގާމުގައި ޝަފާޒު ހުންނެވިއިރު ޕީޕީއެމްގެ ކެމްޕެއިން ހަރަކާތްތަކުގައި ވެސް އޭނާ ބައިވެރިވެވަޑައިގެންނެވިއެވެ.
އެމްޑީޕީ ހުވަދޫ ކެމްޕެއިން ހަރަކާތްތަކުގައި އުޅުއްވާ ބޭފުޅުން ވިދާޅުވީ އެ ޕާޓީއަށް އަލަށް ގުޅުނު ބޭފުޅުންނާ އެކު ހުވަދު އަތޮޅުގެ ކެމްޕެއިން ހަރަކާތަށް އިތުރަށް ވަރުގަދަ ވެގެންދާނެ ކަމަށެވެ. ރިޔާސީ އިންތިހާބުގައި ހުވަދު އަތޮޅުން ގުޅިފައިވާ ސިޔާސީ ޕާޓީތަކުގެ ކެނޑިޑޭޓް އިބޫ ބޮޑު ތާއިދެއް ހޯދާނެ ކަމަށެވެ.
ޖަގަހަ ހުޅުވުމުގެ ހަފްލާގައި ގއ. ވިނލިގިލީ ދާއިރާގެ ރައްޔިތުންގެ މަޖިލީހުގެ މެމްބަރު ސައުދު ހުސެއިންނާއި، ތިނަދޫ އިތުރު ދާއިރާގެ މެމްބަރު ސައުދުﷲ ހިލްމީގެ އިތުރުން އެމްޑީޕީގެ ލީޑަރޝިޕްގެ އިސްބޭފުޅުން ވަނީ ބައިވެރިވަޑައިގެންފައެވެ. އެ ހަފްލާ ނިންމާލީ "ހުވަދޫ އަޓިގެޔާ" ޖަގަހައިގެ ފަރާތުން ބޭއްވި ބޮނޑިބަތް ކެޔުމަކުންނެވެ.
