ރައީސް އިބްރާހިމް މުހައްމަދު ސޯލިހު ސަރުކާރާ ހަވާލުވެވަޑައިގެންނެވި ފަހުން ސޮވަރިން ޑިވެލޮޕްމަންޓް ފަންޑު (އެސްޑީއެފް) ގައި ހުރި ފައިސާގެ އަދަދު، ދެގުނައަށް އިތުރުވެފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި މާވަށު ދާއިރާގެ މެންބަރު މުހައްމަދު ސައީދު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު އަމީރު ވިދާޅުވީ، 30 ސެޕްޓެމްބަރ 2018 ގެ ނިޔަލަށް އަދި ސަރުކާރާ ހަވާލުވެވަޑައިގެންނެވި އިރު ސޮވެރެން ޑިވަލަޕްމަންޓް ފަންޑުގެ ބެލެންސްގައި ހުރީ 96.3 މިލިއަން ޑޮލަރު ކަމަށެވެ. ނަމަވެސް މި މަހުގެ 3 ވަނަ ދުވަހުގެ ނިޔަލަށް އެސްޑީއެފްގެ ބެލެންސް ވަނީ 181 މިލިއަން ޑޮލަރަށް އިތުރުވެފައި ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އެސްޑީއެފްގެ ބިލެއްގެ މަސައްކަތް ފިނޭންސް މިނިސްޓްރީއާއި އެމްއެމްއޭއާއި ގުޅިގެން ކުރައްވަމުން ގެންދަވާ ކަމަށާއި، އެބިލް ވަރަށް އަވަހަށް މަޖިލީހަށް ފޮނުއްވާނެ ކަމަށެވެ.
މީގެ އިތުރުން 1.2 ބިލިއަން ޑޮލަރު އިންޑިއާ ސަރުކާރުން ދޭނެކަމަށް ސަރުކާރުން ހާމަކޮށްފައިވާތީ އެކަމާގުޅޭ ސުވާލެއް ވެސް މެންބަރު ސައީދު ވަނީ މިނިސްޓަރު އަމީރާއި އަމާޒު ކުރައްވާފައެވެ. އެގޮތުން އޭގެ ކޮސްޓަކީ ކޮބައިތޯއާއި އޭގެ އިންޓްރެސްޓް ރޭޓާ ގްރޭސް ޕީރިއަޑް އަދި އަނބުރާ ދައްކަން ޖެހޭ މުއްދަތަކީ ކޮބައިތޯ ސައީދު ސުވާލުކުރެއްވިއެވެ.
މިނިސްޓަރު ވިދާޅުވީ އިންޑިއާއިން ދޭން ނިންމި 1.2 ބިލިއަން ޑޮލަރުގެ ތެރެއިން 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީއެއް އެބައިން ކަމަށާއި، އޭގެ ބޭނުން ސަރުކާރުން ކުރާނީ، ސަރުކާރުން ހިންގާ ބޮޑެތި ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ތެރެއިން، ޕްރޮޕޯސަލް ހުށަހަޅުއްވައިގެން ކަމަށެވެ.
އޭގެ އިންޓްރެސްޓް ރޭޓަކީ 1.5 އިންސައްތަ. އޭގެ އިތުރުން 200 މިލިއަން ޑޮލަރު ގްރާންޓް އެހީއާއި 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީއެއް އިންޑިއާގެ ރިޒާވް ބޭންކާއެކު ކޮށްފައިވާނެ.ފިނޭންސް މިނިސްޓަރު އިބްރާހިމް އަމީރު
ރައީސް ސޯލިހު އިންޑިއާއަށް ކުރެއްވި ދަތުރުފުޅުގައި އިންޑިއާއިން ރާއްޖެއަށް އެހީގެ ގޮތުގައި ދޭ 50 މިލިއަން ޑޮލަރާ އެކު ޖުމްލަ 1.4 ބިލިއަން ޑޮލަރުގެ ކްރެޑިޓް ފެސިލިޓީ ދިނުމަށް ވަނީ ނިންމާފައެވެ. މިއީ މިފަހުގެ ތާރީހެއްގައި އިންޑިއާއިން މިހާ ބޮޑު މާލީ އެހީތަކެއް ރާއްޖެއަށް ދިން ފުރަތަމަ ފަހަރެވެ.
އިންޑިއާއިން ދޭން ނިންމި އެހީގެ ދަށުން މިހާތަނަށް އެކި ޕްރޮޖެކްޓްތައް ފަށާފައިވާއިރު، މީގެ ތެރޭގައި ސްކޫލްތަކުގެ އާ ކުލާސް ރޫމްތަކާއި މަލްޓި ޕަރޕަސް ހޯލްތައް އެޅުމުގެ އިތުރުން ފުލުހުންގެ ތަރައްގީއަށް ވެސް އެހީތެރިވެދީފައިވެއެވެ.
