ދީނީ ޖަމްޢިއްޔާއަކުން އެމްޑީއެންގެ ރިޕޯޓާމެދު 2016 ވަނަ އަހަރުވެސް ކަންބޮޑުވުން ފާޅުކުރި ؛ އިސްލާމިކް މިނިސްޓްރީ
މި ދިރާސާ ކުރެވިފައިވަނީ ބޭރު ޤައުމެއްގެ ފަންޑުގެ އެހީތެރިކަމާއެކު
އިސްލާމިކް މިނިސްޓްރީން ބޭއްވި ނޫސްވެރިންގެ ބައްދަލުވުމުގެ ތެރެއިން
މޯލްޑިވްސް ޑިމޮކްރަސީ ނެޓްވޯކުން "ޕްރިލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސް" ގެ ނަމުގައި ނެރެފައިވާ ރިޕޯޓާމެދު ކަންބޮޑުވުން ފާޅުކޮށް 2016 ވަނަ އަހަރު ދީނީ ޖަމިއްޔާއަކުން އެ މިނިސްޓްރީއަށް މައްސަލަ ހުށަހެޅިކަމަށް މިނިސްޓްރީ އޮފް އިސްލާމިކް އެފެއަރޒުން ބުނެފިއެވެ.
ހޯމަ ދުވަހު އެ މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިސްލާމިކް މިނިސްޓްރީގެ ސްޓޭޓް މިނިސްޓަރ އިލްޔާސް ޖަމާލް ވިދާޅުވީ ކޮންމެ އަހަރަކު ވެސް މި ދިރާސާއަށް އިތުރު އަޕްޑޭޓްތައް އަންނަމުންދާ ކަމަށެވެ.
މި ދިރާސާކޮށްފައިވަނީ ބޭރު ޤައުމެއްގެ މާލީ އެހީތެރިކަމާއެކުގައި ކަން ފާހަގަކުރައްވާ އިލްޔާސް ވިދާޅުވީ، އެ މުއްދަތުގެ ތެރޭގައި ނެޓްވޯކްގައި މަސައްކަތްކުރި ބައެއް ކުދިންނަށް ވިހި ހާހާއި އަށާރަ ހާހާއި ދެމެދުގެ އުޖޫރައެއް ދީފައިވާކަން އިނގޭކަމަށެވެ. ރިޕޯޓު އެކުލަވާލާފައިވަނީ ރިޕޯޓެއްގައި ގެންގުޅެންޖެހޭ ދިރާސާ މިންގަނޑުތަކައް ފެތޭގޮތައް ނޫންކަމަށް ބަޔާންކުރައްވާ، މި ރިޕޯޓަށް މިނިސްޓްރީގެ ފަރާތުން އިލްމީ ދިރާސާއެއް ކުރާނެ ކަމަށް އޭނާ ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ އޮފް އިސްލާމިކް އެފެއަރޒް ޑރ. އަޙްމަދު ޒާހިރު ވިދާޅުވީ އެ މައްސަލައަކީ އެއްވެސް ގޮތަކަށް މިނިސްޓްރީން ބަލައިގަންނާނެ ކަމެއް ނޫން ކަމަށާއި ފިޔަވަޅު އަޅަންޖެހޭ ފަރާތްތަކާމެދު ފިޔަވަޅު އަޅާނެ ކަމަށެވެ.
އެމްޑީއެންގެ ރިޕޯޓާއި ގުޅިގެން ގިނަ ފަރާތްތަކުން ވަނީ ކަންބޮޑުވުން ފާޅުކޮށްފައެވެ. އަދި އާންމުންގެ ފާޑު ކިޔުންތައް އަމާޒުވުމުން އެ ރިޕޯޓް ނެގުމަށް ފަހު އެމްޑީއެންއިން ވަނީ މާފަށް އެދި އެފަދަ ކަމެއް ތަކުރާރު ނުވާނެ ކަމަށް ބުނެފައެވެ. އެ ރިޕޯޓުގެ މައްސަލަ އިސްލާމިކް މިނިސްޓްރީން ފުލުހުންނަށް ހުށަހަޅާފައިވާއިރު ފުލުހުން ވެސް ވަނީ އެ މައްސަލަ ސީރިއަސް މައްސަލައެއްގެ ގޮތުގައި ތަހުޤީޤު ކުރަމުންދާ ކަމަށް ބުނެފައެވެ.
