ޖަޕާން އިންޓަނޭޝަނަލް ކޯޕަރޭޝަން އެޖެންސީން (ޖޭއައިސީއޭ ) އިން ހިންގަމުން ގެންދާ ޔަންގް ލީޑަރސް ޓްރެއިނިންގ ޕްރޮގްރާމް ފޮރ މޯލްޑިވްސް (ވައިއެލްޓީޕީ) ގައި ފިޝަރީޒް މިނިސްޓްރީގެ ފަސް މުވައްޒަފުން ބައިވެރިވެއްޖެއެވެ.

ޖޭއައިސީގެ މިއަހަރުގެ ޕްރޮގްރާމް ޢަމާޒު ކޮށްފައިވަނީ ދަނޑުވެރިކަމުގެ ދާއިރާއަށެވެ. އެގޮތުން މި މިމަހު 6-24 އަށް ކުރިޔަށް ގެންދާ މި ޕްރޮގްރާމްގައި ބައިވެރިވުމަށް އެ މިނިސްޓްރީގެ މުވައްޒަފުން ފުރާފައިވަނީ ހޮނިހިރު ދުވަހުއެވެ.

ފިޝަރީޒް މިނިސްޓްރީން ބުނީ، ޕްރޮގްރާމްގައި ބައިވެރިވި މުވައްޒަފުންނަކީ، ފުވައްމުލައް، ރ. ފައިނު، ތ. ކަނޑޫދޫ، ފ. ދަރަނބޫދޫގެ އިތުރުން އެ މިނިސްޓްރީން ހަނިމާދޫގައި ޤާއިމުކޮށްފައިވާ އެގްރިކަލްޗަރ ސެންޓަރުގެ މުވައްޒަފުން ކަމަށެވެ.

ޕްރޮގްރާމްގައި ކިޔަވައިދޭ މައިގަނޑު ބައިތަކުގެ ތެރޭގައި، ޖަޕާނުގެ ރަށްފުށުގެ ތަރައްޤީގައި ދަނޑުވެރި ގްރޫޕްތަކުގެ ދައުރާއި، ޖަޕާނު ސަރުކާރުގެ މައިގަނޑު ސިޔާސަތުތަކާއި އިދާރީ ހިންގުމުގެ އޮނިގަނޑު އެކުލަވާލާފައިވާ ގޮތުގެ ޢަސާސީ މަޢުލޫމާތުތަކާއި، ރަށްފުށުގެ ތަރައްޤީގެ ޕްރޮގްރާމްތައް ރާވާ ހިންގުމުގައި ޖަޕާނުގެ ތަޖުރިބާތަކުން ފިލާވަޅު ލިބިގަތުމާއި އެފަދަ އިޖްތިމާޢީ މަސައްކަތްތައް ކުރިއަށްދާ ގޮތް އަމިއްލައަށް ތަޖުރިބާކުރުން ހިމެނޭއެވެ.

ޖަޕާނަށް ކުރާ އެ ދަތުރުގެ ތަޖުރިބާގެ އަލީގައި ރާއްޖޭގެ ރަށްފުށު ތަރައްޤީގައި ބޭނުން ހިފޭނެ ކަންތައްތައް ދެނެގަނެ އެކަންކަން ޢަމަލީގޮތުން ކުރިއަށް ގެންދިއުމަށް އެކްޝަން ޕްލޭނެއް އެކުލަވާލުމުގެ މަސައްކަތްވެސް ޕްރޮގްރާމުގެތެރެއިން ކުރިޔަށްގެންދާނެކަމަަށް ފިޝަރީޒް މިނިސްޓްރީން ބުންޏެވެ.

ޔަންގް ލީޑަރސް ޓްރެއިނިންގ ޕްރޮގްރާމް ފޮރ މޯލްޑިވްސް (ވައިއެލްޓީޕީ) ގެ ސަބަބުން ލާމަރުކަޒީ އުޞޫލުން ޕްރޮގްރާމުތައް ބައްޓަންކުރުމަށް ދަސްވެ، ދަނޑުވެރިންނާއި ކައިރިން ޚިދުމަތްތައް ފޯރުކޮށްދިނުމަށް ކުރަމުންދާ މަސައްކަތްތަކަށް ވަރަށް ފަސޭހަވެގެންދާނެ ކަން މިނިސްޓްރީން ފާހަގަކުރެއެވެ.