ސިވިލް ސާވީސް މުވައްޒަފުންނާކީ ވަކިނުކުރެވޭނެ ބައެއް ނޫން: ގާސިމް
1 އޮކްޓޯބަރު 2019 | އަންގާރަ 23:06ގިނަ މުވައްޒަފުން ދަނީ ސޮއިކޮށްލާފައި ބޭރަށްކަމަށް ވިދާޅުވި
ޖޭޕީގެ ލީޑަރު ގާސިމް އިބްރާހިމް
ސިވިލް ސާވީސް މުވަައްޒަފުންނާކީ ވަޒީފާއިން ވަކި ނުކުރެވޭނެ ބައެއް ނޫން ކަމަށާއި، އެމީހުންވެސް މަސައްކަތަށް ފަރުވާ ކުޑަކުރާނަމަ ވަޒީފާއިން ވަކިކުރެވޭނެ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
އަންގާރަ ދުވަހުގެރޭ ޖޭޕީއާ އަލަށް ގުޅުނު މެމްބަރުން ސޮއިކުރުމަށް މ. ކުނޫޒް ގައި ބޭއްވި ރަސްމިއްޔާތެއްގައި ވާހަކަ ދައްކަވަމުން ގާސިމް ވިދާޅުވީ، އޭނާ އަކީ ތަފާތު ދާއިރާތަކުގައި މަސައްކަތް ކޮށްފައިވާ ބޭފުޅެއް ކަމަށާއި، އާއްމުކޮށް ސަރުކާރުގެ އޮފީސްތަކުގައި ރަނގަޅަށް މަސައްކަތް ކުރަން ވެރިން ކަންތައްތަކުގައި ގޮވާލުމުން އެ ވެރިއަކު ދެކެ އެތަނެއްގައި އުޅޭ ގިނަ މުވައްޒަފުން ރުޅިއައިސް ފޫހިވާ ކަމަށެވެ.
އެހެން އެ ވަނީ ގިނަ މީހުން އޮފީސް ތަކުގައި މަސައްކަތް ކުރަނީ ''އަމާބުނީތީ ފަރަށްދާ'' އުސޫލުންކަން ފާހަގަ ކުރައްވަމުން ގާސިމް ވިދާޅުވީ، މިނިސްޓަރަކު އެ މިނިސްޓްރީގައި އުޅޭ މުވައްޒަފުން އެންމެ ރަނގަޅަށް މަސައްކަތް ނުކުރާނަމަ އެވާހަކަ ދައްކަވާނެ ކަމަށެވެ.
ޓްރާންސްޕޯޓް މިނިސްޓްރީގައި މަސައްކަތްކުރާ ގިނަ މުވައްޒަފުންނަކީ ފެންވަރުދަށް މުވައްޒަފުން ކަމަށާއި، އެކަންކަން ހައްލު ކުރުމަށް އަޅަން ޖެހުނު ކޮންމެ ފިޔަވަޅެއް އަޅުއްވާނެ ކަަމަށް ގާސިމްގެ އަނބިކަނބަލުން ނަހުލާ ވިދާޅުވާ އޯޑިއޯއެއް އާއްމު ވެފައިވާތީ އެކަމަނާ ދިފާއު ކުރައްވަމުން ނަހުލާގެ ފިރިކަލުން ވިދާޅުވީ، ސިވިލް ސާވީސް މުވައްޒަފުންނަކީ ވަޒީފާއިން ކަނޑާނުލެވޭނެ ބައެއް ނޫން ކަމަށާއި، ސިވިލް ސާވަންޓުންވެސް ފަރުވާ ކުޑަނަމަ ހެދިފައިވާ ގާނޫނާއި ގަވާއިދުތަކުގެ ދަށުން އެމީހުން ބޭރުކުރަން ޖެހޭނެ ކަމަށެވެ.
ގާސިމް ވިދާޅުވީ، ގިނަ މުވައްޒަފުންގެ އުސޫލަކީ، ސޮއި ކޮށްލާފައި ދިޔުން ކަމަށާއި، އެ މީހުން މާ ބޮޑު މަސައްކަތްތަކެއް ކުރުމަށް ބޭނުންނުވާ ކަމަށެވެ. ނަހުލާ ބަދުނާމު ކުރަން މަަސައްކަތް ކުރި މީހުން ''އަތަށް ގޮވީ'' ކަމަށް ގާސިމް ވަނީ ސިފަކުރައްވާފައެވެ.
