ފަތުރުވެރިކަން ރާއްޖެއަށް ގެނެވުނީ ވަރަށް ބޮޑެތި ގުރުބާނީތަކެއް ވެގެން ކަމަށް ވިދާޅުވި
ނައިބު ރައީސް ފައިސަލް ނަސީމް
ރިސޯޓުތަކުގައި މަސައްކަތްކުރާ ފަރާތްތަކަކީ ދިވެހިރާއްޖެއަށް ކުރިއެރުންތައް ގެނެސްދިނުމުގައި ބޮޑެތި ގުރުބާނީތައްވީ ބައެއް ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ދުނިޔޭގެ ފަތުރުވެރިކަމުގެ ދުވަސް ފާހަގަ ކުރުމުގެ ގޮތުން ވ. އަތޮޅުގައި ބޭއްވި ޖަޒީރާ ކެނޯ ރޭސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ ފަތުރުވެރިކަން ރާއްޖެއަށް ގެނެވުނީ ވަރަށް ބޮޑެތި ގުރުބާނީތަކެއް ވެގެން ކަމަށެވެ.
ރާއްޖެއިން މިއަދު ފެންނަ ތަރައްޤީގެ ކުރިއެރުމަކީ ފަތުރުވެރިކަންކަމަށާއި، އެކަމުގައި އެންމެ ބޮޑޫ ޤުރުބާނީއެއް އަދާކޮށްފައިވަނީ އާއިލާއާއި ވަކިން މިސިނާއަތުގައި މަސައްކަތްކުރާ މުވައްޒަފުންކަން އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. އަދި މީގެ 27 އަހަރު ދުވަސް ކުރިން އެމަނިކުފާނުވެސް ފަތުރުވެރިކަމުގެ ދާއިރާގައި މަސައްކަތް ކުރެއްވި ކަމަށާއި އެއިރުން ފެށިގެން މިދާއިރާއަށް މިހާތަނަށް އައިސްފައިވާ ކުރިއެރުން ވަރަށް ގާތުން ފެނިފައިވާކަމަށް ނައިބު ރައީސް ވިދާޅުވިއެވެ.
ނައިބު ރައީސް އިތުރަށް ވިދާޅުވީ، ދުނިޔޭގެ އެކިކަންކޮޅުތަކުން ފަތުރުވެރިން ރާއްޖެ އަންނަނީ މައިގަނޑު ދެކަމެއްގެ ސަބަބުންކަމަށާއި އެއީ ރާއްޖޭގެ ރީތިކަމާއި ދިވެހިންގެ ހިނިތުންވުމުގެ ސަބަބުން ކަމަށެވެ.
ނައިބު ރައީސް ވިދާޅުވީ ރާއްޖޭގެ މަސައްކަތްތެރިންނަށް އެމީހުންގެ ހައްގު ލިބެންޖެހޭ ކަމަށާއި ރިސޯޓުތަކުގައި ވަޒީފާ އަދާކުރާ ފަރާތްތަކަށް ހިތްހަމަޖެހިގެން ވަޒީފާ އަދާކުރެވެން ޖެހޭނެ ކަމަށެވެ.
