ގައުމީ ސަލާމަތަށްހުރި ނުރައްކާތަކާ ބެހޭގޮތުން އަހުލުވެރިކުރުމަށް ސެމިނަރއެއް ބާއްވައިފި
26 ސެޕްޓެމްބަރު 2019 | ބުރާސްފަތި 17:08ދާޚިލީ މަޝްރަހުގައި ކުރިމަތިވާ ތަފާތު ގޮންޖެހުންތަކާ ބެހޭ ގޮތުން މަޝްވަރާކުރި
އެމްއެންޑީއެފްއިން ކުރިއަށް ގެންދިޔަ ސެމިނަރގެ ތެރެއިން
އިސްތިރާޖީ މާހައުލާއި ގައުމީ ސަލާމަތަށް ހުރި ނުރައްކާތަކާއި އަދި އެމްއެންޑީއެފްގެ ކެޕްސްޓޯން ޑޮކްޓަރިންއަށް، ސިފައިންގެ ސީނިއަރ އެންލިސްޓެޑް ލީޑަރުން އަހުލުވެރިކުރުމުގެ ގޮތުން ސެމިނަރއެއް ބާއްވައިފިއެވެ.
އެމްއެންޑީއެފް ކޮލެޖު އޮފް ޑިފެންސް އެންޑް ސެކިޔުރިޓީ ސްޓަޑީޒްއިން ބަންޑާރަކޮށީގައި ބުރާސްފަތި ދުވަހު ބޭއްވި އެއްދުވަހުގެ ސެމިނަރ ފައްޓަވައިދެއްވީ، އެމްއެންޑީއެފް ކޮލެޖު އޮފް ޑިފެންސް އެންޑް ސެކިޔުރިޓީ ސްޓަޑީޒްގެ ކޮމާންޑިންގ އޮފިސަރ، ބްރިގޭޑިއަރ ޖެނެރަލް ވައިޘް ވަޙީދުއެވެ.
"ސެމިނަރ އޮން ސްޓްރެޓެޖީ، ނޭޝަނަލް ސެކިޔުރިޓީ އެންޑް ޑޮކްޓަރިންގ"ގެ ނަމުގައި ސިފައިންގެ ސީނިއަރ އެންލިސްޓެޑުންނަށް އަމާޒުކޮށްގެން ކުރިއަށްގެންދިޔަ މިސެމިނަރގެ ސެޝަންތަކުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ބައިވެރިވެ ވަޑައިގަންނަވައި ބައިވެރިންނަށް ވަނީ މައުލޫމާތު ހިއްސާކުރައްވާފައެވެ.
އެމްއެންޑީއެފުން ބުނީ މިސެމިނަރ އަކީ ބަވަނަވަމުންދާ ދުނިޔެއާއި ނުތަނަވަސް އަދި ހަމަނުޖެހުންބޮޑު އިސްތިރާޖީ މާހައުލުގައި ސިފައިން މަސައްކަތްކުރާއިރު، ބައިނަލްއަގްވާމީ އަދި ދާޚިލީ މަޝްރަހުގައި ކުރިމަތިވާ ތަފާތު އޮއިވަރުތަކާއި ސަލާމަތީ ގޮންޖެހުންތަކާ ބެހޭ ގޮތުން އަހުލުވެރިކުރުމުގެ ގޮތުން ހިންގި ސެމިނަރއެއް ކަމަށެވެ.
މީގެ އިތުރުން، މި ސެމިނަރގައި ސިފައިންގެ އިދާރީ އަދި އޮޕަރޭޝަނަލް އޮނިގަނޑާއި ހިންގުން އިތުރަށް ހަރުދަނާކުރުމުގެ ގޮތުން ކުރެވެމުންދާ މަސައްކަތްތަކުގެ ތެރެއިން އެމްއެންޑީއެފް ކެޕްސްޓޯން ޑޮކްޓްރީންއަށް އަހުލުވެރިކުރުމުގެ ސެޝަންތައް ވެސް ވަނީ ކުރިއަށްގެންގޮސްފައިވާ ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ މިސެމިނަރގައި ކުރިއަށްގެންދިޔަ ސެޝަންތަކުގެ ތެރޭގައި، މޫސުމީ ބަދަލު އަދި ދޭދޭ ގައުމުތަކުގެ ގުޅުންތަކާއި، ސޯޝަލް މީޑިއާ ޓެކްނޮލޮޖީ އަދި އެހެނިހެން ހައިބްރިޑް ނުރައްކާތަކާއި، ރާއްޖޭގެ ޚާރިޖީ ސިޔާސަތު އަދި އިންޑިޔާ ކަނޑުގެ އިސްތިރާޖީ މަޝްރަހާއި، ރާއްޖޭގެ ގައުމީ ސަލާމަތަށް ހުރި ނުރައްކާތައް އަދި، ނިރުބަވެރިކަމާއި ނުރައްކާތެރި ހައްދުފަހަނައެޅުމާއި އޭގެ ހައްލާ ބެހޭގޮތުން ކުރިއަށްގެންދިޔަ މިސެޝަންތަކުގައި އެ ދާއިރާތަކާ ގުޅުންހުރި ތަޖުރިބާކާރުން މައުލޫމާތު ފޯރުކޮށްދީފައިވާ ކަމަށެވެ.
މިސެމިނަރގައި އެމްއެންޑީއެފްގެ ކޮމާންޑް ސާޖަންޓް މޭޖަރުންނާއި، ސާޖަންޓް މޭޖަރުންނާއި، އެންސީއޯ އެޑްވާންސްޑް ކޯހުގެ ބައިވެރިން އަދި ވޮރަންޓް އޮފިސަރސް ކޯހުގެ ބައިވެރިން ވަނީ ބައިވެރިވެފައެވެ.
