އަލިފާނުގެ ހާދިސާ ފަދަ ހާދިސާއެއް "މެނޭޖް" ކުރުމުގެ ގާބިލު ކަމެއް މި ސަރުކާރަކު ނެތް: ޝަރީފް
26 ސެޕްޓެމްބަރު 2019 | ބުރާސްފަތި 13:25ދާއިމީ ބޯހިޔާވަހިކަން ހޯދަދިނުމަށް މާ ބޮޑު މަސައްކަތްތަކެއް ނުކުރެވޭ ކަމަށް ވިދާޅުވި
މަޑުއްވަރީ ދާއިރާގެ މެމްބަރު އާދަމް ޝަރީފް
މިދިޔަ ހުކުރު ދިވަހު ހިނގާދިޔަ އަލިފާނުގެ ހާދިސާ ފަދަ ހާދިސާއެއް "މެނޭޖް" ކުރުމުގެ ގާބިލުކަމެއް މި ސަރުކާރަކު ނެތް ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ ބުރާސްފަތި ދުވަހު ޕީޕީއެމްގެ އޮފީހުގައި އޮތް ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުންނެވެ. ޝަރީފް ވިދާޅުވީ މި ހާދިސާގައި ހާލުގައި ޖެހުނު ފަރާތްތަކަށް ސަރުކާރުން އެހީ ދޭގޮތާއި މެދު ކަންބޮޑުވުންތަކެއް އެބަ ހުރި ކަމަށެވެ. މިހާހިސާބަށް އައިއިރު ހާދިސާގައި ގެދޮރު ގެއްލުނު ފަރާތްތަކަށް ވަގުތީ ބޯހިޔާވަހިކަން ދެއްވިކަން ފާހަގަ ކުރައްވާ ޝަރީފް ވިދާޅުވީ ސަރުކާރަށް ޝުކުރު އަދާކުރައްވާ ކަމަށެވެ. ނަމަވެސް މި އެފަރާތްތަަކަށް ދާއިމީ ބޯހިޔާވަހިކަމެއް ފޯރު ކޮށްދެވިފައި ނުވާތީ ކަންބޮޑުވާކަމަށް ޝަަރީފް ވިދާޅުވިއެވެ.
މި ނުރައްކާތެރި ހާދިސާ ތަޖުރިބާ ކުރި ފަރާތްތަކަށް ލިބުނު ބިރުވެރިކަމާއި ނަފްސާނީ އަސަރުތައް ކުރި ފަރާތްތަކަށް ލިބެންޖެހޭ ސައިކޯ ސޯޝަލް ސަޕޯޓު ލިބުން މުހިންމު ކަމަށާއި، ގެއްލުން ލިބިފައިވާ ތަކެތީގެ ބަދަލު ހޯދުމަށް ވެސް އެފަރާތްތަކަށް އުނދަގޫތަކާއި ކުރިމަތިވާ ކަންވެސް ޝަރީފް ފާހަގަކުރެއްވިއެވެ. ޝަރީފް ވިދާޅުވީ ސަރުކާރުން ހާލުގައި ޖެހުނު ފަރާތްތަކުގެ ތެރެއިން ބޮލަކަށް ކެއުމުގެ ހަރަދަށް 200 ރުފިޔާ ދިން ނަމަވެސް، މި ރުފިޔާއިން ކެއުމަށް ހަރަދު ކުރުމަށް ފަހު އެހެން އެއްވެސް ކަމެއް ކުރުމަށް ފައިސާ ނުހުންނާތީވެ އެފަރާތްތަކަށް ވަރަށް ބޮޑެތި ދަތިތަކާއި ކުރިމަތި ލާން ޖެހޭ ކަމަށެެވެ.
މީގެ އިތުރުން އެ ފަރާތްތަކަށް ދާއިމީ ބޯހިޔާވަހިކަން ހޯދަދިނުމަށް މާ ބޮޑު މަސައްކަތް ތަކެއް ނުކުރެވޭ ކަމަށާއި މިއަދާ ހަމަޔަށް ވެސް ގިނަ ފަރާތްތަކަށް ގެއާއި ހަމަޔަށްވެސް ވަދެވިފައި ނުވާ ކަމަށް ވިދާޅުވިއެވެ. އަދިގެއަށް ވަދެވުނު މަދު ފަރާތްތަކަށް ވެސް އެ ގެތަކުގައި ކަރަންޓު ލިބުމުގައި ބައިވަރު ދަތިތަކެއް ދިމާވާ ކަން ޝަރީފް ފާހަގަކުރެއްވިއެވެ.
ޝަރީފް ވިދާޅުވީ މި ހާދިސާގައި އަނދާ އަޅިއަށް ވެގެން ދިޔައީ ހަމައެކަނި ހިފާ ގެންގުޅޭ ތަކެތި ނޫން ކަމަށާއި އަގުހުރި ލިޔެ ކިއުންތަކުގެ އިތުރުން އެ އިމާރާތްތައް ވެސް އަދި އިމާރާތުގައި ހުރި ފާރުތަކާއި އެއްކޮށް ބައެއް ތަންތައް ވެސް އަނދާ އަޅިއަށް ވެގެން ގޮސްފައިވާކަމަށެވެ.
ޝަރީފް ވިދާޅުވީ ކަންތައްތައް މިހެން ހުރުމާއެކު ފާހަގަ ކުރެވިގެންދަނީ މި ފަދަ ހާދިސާ އެއް ހިނގާދިޔުމުން، މި ފަދަ ހާދިސާއެއް "މެނޭޖް" ކުރުމުގެ ގާބިލުކަމެއް މި ސަރުކާރުގައި ނެތް ކަމަށެވެ.
