އަލިފާނުގެ ހާދިސާ: ކުޑަކުޑަ ހުމާމްއަށް ހިތްވަރު ލިބުނީ ބޭބެގެ ބަސްތަކުން!
22 ސެޕްޓެމްބަރު 2019 | އާދީއްތަ 17:22އަބަދަށްފެހި މަގުގައި އަލިފާން ރޯވީ ހުމާމް ފިލާވަޅު ދަސްކުރަން އިންދާ
ހުމާމް ރާއްޖެޓީވީއަށް އިންޓަވިއު ދެނީ
ހުކުރު ދުވަހުގެ ރޭ އަބަދަށްފެހި މަގުގައި އަލިފާން ރޯވި ވަގުތު މަޖީދިއްޔާ ސުކޫލްގައި ކިޔަވަމުން އަންނަ އުމުރުން 11 އަހަރުގެ މުހައްމަދު ހުމާމް ހުސެއިން އިނީ އޭނާގެ ގެ، ހ. އަދޫގައި ފިލާވަޅު ދަސްކުރާށެވެ. ފިލާވަޅު ދަސްކުރަން އިންދާ އެއްޗެއް އަނދާ ވަސްދުވާތީ އޭނާގެ ދައްތާއާ އެއްކޮށް ގޮސް ބެލްކަނިން ބޭރު ބަލާލިއެވެ. އެވަގުތު ބޭރުން ފެންނަން ހުރީ ހުސް ދުމުވެ. އެހެންނަމަވެސް އެކުޑަކުޑަ ހުމާމް އެކަމާ މާބޮޑު ފިކުރެއް ނުކޮށް، އިޝާ ނަމާދަށް ބަންގި ގޮވުމާއެކު އަވަސްވެގަތީ ނަމާދު ކުރުމަށެވެ. އޭނާ ނަމާދު ކުރަން ހުއްޓާ ވަރަށް ބާރު އަޑެއް ގޮވުމާއެކު، ސިއްސައިގެން ދިޔައެވެ. ވަގުތުން ނަމާދު ހުއްޓާލުމަށްފަހު، ދައްތައާއެކު ބޭރު ބަލައިރު ގެ ކުރިމަތީގައި ހުރި ގުދަނުގެ ބޮޑު ހުޅުގަނޑު ފެނިގެން ދިޔައެވެ.
ކުރާނެ ކަމެއް ނޭނގިގެން ހުމާމް ގޮވީ އޭނާގެ މަންމައަށެވެ. އާއިލާ އެންމެން ފޯނު ނެގުމަށްފަހު އެމްއެންޑީއެފް އަށާއި ފުލުހުންނަށް ކެނޑިނޭޅި ގުޅަމުންދިޔައެވެ. އެވަގުތުގެ ގޮތުންނާއި ހާލަތުގެ ސީރިއަސްކަމުން އިތުރަށް ކަންތައް ކުރަންވީ ގޮތެއް ނޭނގުމުން ހުމާމްގެ މަންމަ ގުޅީ ރާއްޖެއިން ބޭރުގައި ހުރި އޭނާގެ ފިރިހެން ދަރިފުޅަށެވެ. ދަރިފުޅަށް ގުޅުމުން ތެތް ތުވާލި އޮޅައިގެން ގޭގެ ތިރިއަށް ފޭބުމަށް ބުންޏެވެ.
ބޭބެގެ އިރުޝާދުގެ މަތިން ގޭގައި ތިބި އެންމެން ސިޑިން ތިރިއަށް ފޭބިއެވެ. ސިޑިން ފޭބިތަނާ އެމްއެންޑީއެފްގެ ފަޔަރ އެންޑް ރެސްކިއު ޓީމާއި ފުލުހުން އެ އާއިލާއަށް އެހީތެރިކަން އިތުރަށް ފޯރުކޮށްދިނެވެ. ތަކުރާރުކޮށް ސުވާލުކޮށްލުމުން ވެސް ހުމާމް ބުނީ މިހާރު އެންމެ ދެރަވާ ކަމަކީ ގެއަށް ނުދެވޭތީ ކަމަށެވެ.
ހުމާމްގެ އާއިލާ މިހާރު ދިރިއުޅެމުންދަނީ ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ އިން ފޯރުކޮށްދީފައިވާ ވަގުތީ ހިޔާގައެވެ. ކުޑަކުޑަ ހުމާމްގެ ނަސޭހަތަކީ އެންމެންވެސް ގޭގައި އަލިފާން ނިއްވާފަދަ އާލަތްތައް ގެންގުޅުމަށާއި ރައްކާތެރިވެ ތިބުމަށެވެ.
