ހާލުގައި ޖެހުނު މީހުންގެ ތެރެއިން 95 އިންސައްތަ މީހުންނަށް އެހީތެރިކަން ފޯރުކޮށްދެވިފައިވޭ: އެންޑީއެމްއޭ
ދިވެހިންނާއި އެއްފަދައިން ބިދޭސީންނަށް ވެސް އަންނަނީ އެހީތެރިކަން ފޯރުކޮށްދެމުން
ރައީސް އިބްރާހިމް މުހައްމަދު ސޯލިހް، ކަލާފާނު ސުކޫލުނުގައި ޤާއިމްކުރެވުނު މަރުކަޒުގައި ތިބި އާއިލާތަކާ ބައްދަލުކުރައްވަނީ
އަލިފާނުގެ ހާދިސާގައި ހާލުގައި ޖެހުނު މީހުންގެ ތެރެއިން 95 އިންސައްތަ މީހުންނަށް ވަނީ އެހީތެރިކަން ފޯރުކޮށްދެވިފައިކަމަށް ޑިޒާސްޓަރ މެނޭޖްމެންޓް އޮތޯރިޓީއިން ބުނެފިއެވެ.
ޑިޒާސްޓަރ މެނޭޖްމެންޓް އޮތޯރިޓީގެ ޑެޕިއުޓީ ޗީފް އެގްޒެކެޓިވް، އުމަރު މޫސާ ފިކުރީ ވިދާޅުވީ ހ. ތިލަފުށި ގޭގައި ހުރި ގުދަނެއްގައި ރޯވެ، ހިނގި އަލިފާނުގެ ހާދިސާގައި ހާލުގައި ޖެހުނު ގާތް ގަނޑަކަށް 443 މީހުންނަށް އެހީތެރިކަން ފޯރުކޮށްދެވިފައިވާކަމަށެވެ. އަދި ބިދޭސީންނަށް ވެސް ދިވެހިންނެކޭ އެއްފަދައިން އެހީތެރިކަން ފޯރުކޮށްދެވުނުކަމަށް އޭނާ ވިދާޅުވި އެވެ.
އުމަރު ވިދާޅުވި ގޮތުގައި އަލިފާން ރޯވި ސަރަހައްދުގައި ވަދެވެންހުރި އިމާރަތްތަކުގެ އެސެސްމެންޓެއް ދަނީ ހެދެމުނެވެ. އަދި ހާލަތު ރަނގަޅަށްހުރި އިމާރަތްތަކަށް މީހުން ވެއްދުމުގެ މަސައްކަތްކުރަމުން އަންނަކަމަށް އޭނާ ވިދާޅުވި އެވެ.
އުމަރު އިތުރަށް ވިދާޅުވީ އެންޑީއެމްއޭގެ ރެޖިސްޓްރޭޝަނުގައި ތިބި މީހުންގެ ތެރެއިން 95 އިންސައްތަ މީހުންނަށް ވަނީ މިހާރު އެހީތެރިކަން ފޯރުކޮށްދީފައި ކަމަށެވެ. އަދި މީގެތެރެއިން ވަގުތީ ބޯހިޔާވަހިކަން ބޭނުންވާ ފަރާތްތަކަށް މިހާރުވަނީ ވަގުތީ ބޯހިޔާވަހިކަން ހަމަޖެހިފައިކަމަށެވެ.
އަލިފާނުގެ ހާދިސާ ހިނގި ވަގުތުން ފެށިގެން އެމްއެންޑީއެފް އާއި ޑިޒާސްޓާ މެނޭޖްމެންޓާއި، ސިޓީ ކައުންސިލްގެ މުވައްޒަފުން، މޯލްޑިވްސް ރެޑްކްރެސެންޓް އިތުރުން އާންމު ރައްޔިތުން ވަނީ ހާލުގައި ޖެހުނު އާއިލާތަކަށް އެހީތެރިވަމުންނެވެ.
