މިއީ ބްރެއިން އެންޑް ސްޕައިން ކޮންފަރެންސްގެ 3 ވަނަ ކޮންފަރެންސް
އޭޑީކޭގެ ސާރޖަނުން
އޭޑީކޭ ހޮސްޕިޓަލުން ކޮންމެ އަހަރަކުވެސް ކުރިއަށްގެންދާ "ބްރެއިން އެންޑް ސްޕައިން ކޮންފަރެންސް" ގެ 3 ވަނަ ކޮންފަރެންސްގެ ދަށުން ލައިވް ސާރޖަރީ ކޮށްފިއެވެ.
އަންގާރަ ދުވަހު އޭޑީކޭ ޓްރެއިނިންގ ކްލިނިކްގައި ކުރިއަށް ގެންދިޔަ މި ލައިވް ސާރޖަރީގައި ރާއްޖެ އާއި ރާއްޖެ އިން ބޭރުގެ ތަޖުރިބާކާރުން ބައިވެރިވެ ވަޑައިގެންފައިވާއިރު، އެކަމާ ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން އޭޑީކޭގެ މެނޭޖިން ޑިރެކްޓަރު އަހުމަދު އައްފާލް ވިދާޅުވީ، މި ސަރޖަރީތަކުގައި ރާއްޖެއިން ބޭރުގެ މަޤުބޫލު ސަރޖަނުން ބައިވެރިވެފައިވާ ކަމަށާއި، މި ކޮންފަރެންސް މެދުވެރިކޮށް ކުރެވޭ ސާރޖަރީތަކުގެ ތެރެއިން އިތުރު މައުލޫމާތުތަކާއި ހުނަރުތައް ދަސްވެގެންދާނެ ކަމަށެވެ.
އަންގާރަ ދުވަހު ކުރިއަށްގެންދިޔަ ސާރޖަރީ ތެރެއިން ބައިވެރިންނަށް ލައިވްކޮށް ސުވާލު ކުރުމުގެ ފުރުސަތު ހުޅުވާލާފައިވާއިރު، އައްފާލް ވިދާޅުވީ، ކޮންމެ އަހަރަކުވެސް ތަފާތު ސާރޖަރީއެއް ކުރިއަށްގެންދަވާ ކަމަށާއި، އޭގެ މަޤްސަދަކީ އިތުރު ހުނަރުތައް ސާރޖަނުންގެ ޓީމުތަކަށް ދަސްކޮށްދެއްވުން ކަމަށެވެ.
އަންގާރަ ދުވަހު އޭޑީކޭ ޓްރެއިނިންގ ސެންޓަރުގައި 2 ލައިވް ސާރޖަރީއެއް ތާވަލު ކޮށްފައިވާއިރު، އޭޑީކޭއިން ކުރިއަށްގެންދާ މި ކޮންފަރެންސްގައި ސިކުނޑި އާއި މައިބަދައިގެ ބަލިތަކާއި އެ ބަލިތަކަށް ފަރުވާދިނުމަށް ކުރެވޭ ދިރާސާ ތަކުގެ އިތުރުން އެ ދާއިރާގައި ބޭސްފަރުވާ ދިނުމަށް ހޯދިފައިވާ އެންމެ ފަހުގެ އީޖާދުތަކާއި ހޯދުންތަކާއި ބެހޭގޮތުންވެސް މަޝްވަރާ ކުރެވިގެންދާނެއެވެ.
