ނޯތު ހާބަރުގައި އޮތް "ބެސްޓް ލައިން" ނަމަކަށް ކިޔާ ބޯޓެއްގައި ގޭސްފުޅިއެއް ގޮވައިގެން ހިނގި ހާދިސާގައި ހާލު ސީރިއަސްވި މީހާގެ ސްޓޭބަލް ކަމަށް އައިޖީއެމްއެޗުން ބުނެފިއެވެ.
އައިޖީއެމްއެޗްގެ މީޑިއާ އޮފިޝަލް ރާއްޖެއެމްވީއަށް ވިދާޅުވީ ގޭސްފުޅިއެއް ގޮވައިގެން ހިނގި ހާދިސާގައި އަނިޔާވެގެން އެ ހޮސްޕިޓަލަށް 08 މީހަކު ގެންގޮސްފައިވާ ކަމަށާއި، އެތަނުން 06 މީހުން އެޑްމިޓްކޮށް ފަރުވާދީފައިވާ ކަމަށެވެ. އަދި ހާލު ސީރިއަސްވި މީހާގެ އިތުރުން 02 މީހަކު އަދި ވެސް ހޮސްޕިޓަލުގައި ފަރުވާ ހޯދަމުންދާ ކަމަށް އެ ހޮސްޕިޓަލުން ބުނެއެވެ.
މި މަހުގެ 11 ވަނަ ދުވަހުގެ ރޭ 7:15 ހާއިރު ހިނގި އެ ހާދިސާގައި އަނިޔާވެފައިވަނީ ފަސް ދިވެހި ފިރިހެނުންނަށާއި ބަންގްލަދޭޝް ދެ މީހުންނަށެވެ. ފުލުހުން ބުނީ މިހާތަނަށް ބެލި ބެލުމުން ބޯޓުގައި ހުރި ގޭސްފުޅިތައް މަތީގައި ގިނަ އަދަދެއްގެ މުދާ ޖަހާފައި ހުރިކަން ފާހަގަވެފައިވާ ކަމަށެވެ.
ފުލުހުން ދަނީ މި މައްސަލަ އިތުރަށް ތަހުޤީޤު ކުރަމުންނެވެ.
