ފަލަސްތީންގެ މައްސަލައިގައި އޮގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) ގެ ފަރާތުން ބާއްވާ ޚާރިޖީ ވަޒީރުންގެ އިމަޖެންސީ ކުއްލި ޖަލްސާގައި ބައިވެރިވެ ވަޑައިގަތުމަށް ފޮރިން މިނިސްޓަރ އަބްދުﷲ ޝާހިދު ޖިއްދާއަށް ފުރާވަޑައިގަންނަވައިފި އެވެ.
އާދިއްތަ ދުވަހު ޖިއްދާގައި ބޭއްވުމަށް ހަމަޖެހިފައިވާ އިސްލާމީ ގައުމު ތަކުގެ ޚާރިޖީ ވަޒީރުންގެ ކުއްލި ޖަލްސާގައި ބައިވެރިވެ ވަޑައިގަތުމަށް މިނިސްޓަރ ފުރާވަޑާއިގަންނަވާފައިވަނީ ހޮނިހިރު ދުވަހުގެ ރޭ އެވެ.
ހޮނިހިރު ދުވަހުގެ ރޭ ޝާހިދު ކުރައްވާފައިވާ ޓްވީޓްގައި އެމަނިކުފާނު ވަނީ ރާއްޖެ އަބްދުވެސް ފަލަސްތީނާއި އެކުގައި އޮންނާނެ ކަމަށް ވިދާޅުވެފައެވެ.
އިސްރާއީލުގައި އަންނަ ހަފްތާގައި އޮންނަ އިންތިހާބުން ކާމިޔާބު ވެއްޖެނަމަ ހުޅަނގު އައްސޭރީގެ ޖޯޑަން ވެލީ އިސްރާއީލުގެ ތަނަކަށް ހަދާނެ ކަމަށް އިސްރާއިލުގެ ބޮޑުވަޒީރު ބެންޖަމިން ނަތަން ޔާހޫ ވިދާޅުވުމާއި ގުޅިގެން، އެކަން ކުށްވެރިކޮށް މީގެ ކުރިން ފޮރިން މިނިސްޓްރީން ވަނީ ބަޔާނެއް ވެސް ނެރެފައެވެ.
މި މައްސަލަ އާއި ގުޅުގެން ރާއްޖެ ޓީވީގެ "ފަލަ ސުރުޚީ" ގައި ވާހަކަ ދައްކަވަމުން މިނިސްޓަރ ވިދާޅުވެފައި ވަނީ 1976 ގައި އޯއައިސީ އުފެދިގެން އައީ އަލް ޤުދުސް އައްޝަރީފް މިނިވަން ކުރަން ކަމަށެވެ. އަދި ދިވެހިރާއްޖެ އަކީ އޯއައިސީގެ މެންބަރެއް ކަމަށާއި ފެށުނީއްސުރެން ދިވެހިރާއްޖެ އިން ދަނީ އަމަލީގޮތުން އެކަމުގައި އަޑު އުފުލަމުން ކަމަށެވެ.
މި މައްސަލައިގައި ފަސްޖެހުމެއް ނޯންނާނެ ކަމަށާއި ބަސް ބުނުމުގައި ދިވެހިރާއްޖެ އިން ފަސް ނުޖެހޭނެ ކަމަށް މިނިސްޓަރ ވަނީ ވިދާޅުވެފައެވެ. އަދި ބޭނުންވަނީ އިސްލާމީ އުއްމަތް އެކަތިގަނޑަކަށްވެ މިކަމާއި ނަފްރަތުކޮށް ދެކޮޅުހަދާކަން ސާބިތުކޮށްދިނުން ކަމަށާއި އެއްއަޑަކުން ވާހަކަ ދެއްކުންކަން މިނިސްޓަރ ފާހަގަކުރެއްވިއެވެ.
